1 Seuta Selemani awetangaga vilongozi wose wa makabila na nk'holo za Izilaeli weze kwakwe uko Yelusalemu, vileke wadiuse Disanduku dye Ndagano kulawa Sayuni mzi wa Daudi. 2 Wakeduganyaga wose kwa seuta Selemani mwe dizuwa dye kinyemi mwo mwezi wa Etanimu, nuwo mwezi wa mfungate. 3 Umwo wadala vilongozi wose wa Izilaeli weze wabule, walavant'hambiko wadinulaga Disanduku dye Ndagano, 4 Walawi na walavant'hambiko wadinulaga Disanduku dya Ndagano nakudigala mwe Nyumba ya Mnungu wadiguhaga Disanduku dye Ndagano dya Zumbe hamwenga ne vint'hu vose vikukile vandaga mwe dihema. 5 Seuta Selemani na Waizilaeli wose awo wakeduganyaga ha Selemani wandaga kulongole ye Disanduku dye Ndagano. Walavaga nt'hambiko za ngoto na ng'ombe hezikuwazika. 6 Wadya walavant'hambiko wadigalaga Disanduku dye Ndagano kwe Nyumba ya Mnungu Hant'hu Hakukise na kudiika hasi ye viumbwa vina mawawa. 7 Viumbwa ivo vina mawawa wagubikaga Disanduku idyo dye Ndagano ne mihiko yakwe yo kwinuila. 8 Kwaviya mihiko iyo yandaga itendesa utali, neidaha kuoneka kulawa Hant'hu Hakukise kulongole ye chumba cha kundani, mna heikaoneka kulawa kwa kuse. Mihiko iyo iyaho hata ivi dielo. 9 Vint'hu vandaga mwe Disanduku Dye Indagano vandaga du vihant'hi viidi va maiwe viya vaikagwa ni Musa kudya kwo mnima wa Sinai umwo Zumbe aikaga Ndagano na Waizilaeli aho wakalawa Misili.

10 Walavant'hambiko umwo wandaga wakafosa kuse ye Nyumba ya Mnungu, aaho Inyumba yamemaga vunde, 11 walavant'hambiko hawadahaga kudamanya undima wawe kwaviya undiilo wa Zumbe Mnungu wamemezaga Inyumba yakwe. 12 Selemani niyo agamba,

"Zumbe, agambaga

neekale mwe divunde dititihale.

13 Ikindedi hikuzengela Nyumba nk'hulu yedi

aho nowikale mazuwa yose."

14 Umwo mdugano wose wa Waizilaeli wandaga ukimala hadya, seuta ahitukaga niyo awavikila. 15 Agambaga, Atogolwe Zumbe Mnungu, Mnungu ywa Izilaeli! Kakint'hiza lagano alaganaga na tate Daudi umwo amgambaga, 16 Kukongela aho nawalavaga Waizilaeli want'hu wangu uko Misili, hyasagulaga mzi wowose mwe isi ya Izilaeli wa kunizengela Nyumba umwo nenivikwe. Mna hikusagula weye Daudi unde seuta, wikaile want'hu wangu Waizilaeli.

17 Tate Daudi afanyanyaga mwo moyo wakwe kumzengela Zumbe Mnungu Nyumba umwo naavikwe Mnungu ywa Izilaeli. 18 Mna Zumbe amgambaga, tate Daudi, kwaviya kufanyanya mwo moyo wako unizengele Nyumba, aho want'hu wangu nawanivike, kufanyanya vedi, 19 Hamwenga na ayo hiyo weye nouzenge Nyumba ya Mnungu, ni mwanawo mwenye umweleke, niye naanizengele Nyumba.

20 Naho haluse, Zumbe kaikint'hiza lagano dyakwe. Higuha hant'hu ha tate seuta Daudi, hinda seuta ywa Izilaeli enga ivo Zumbe Mnungu alaganaga. Hizenga Nyumba ya Mnungu aho Zumbe Mnungu naavikwe. 21 Iviyaiviya kadamanya hant'hu ho kuikila Disanduku dye Ndagano ne vihant'hi vine va maiwe ve Ndagano ya Zumbe aikaga na wakale wetu umwo awalavaga uko Misili.

22 Selemani akimaalaga ho kulavila nt'hambiko na ho mdugano wa Waizilaeli, akunjulaga mikono yakwe akaonyekeza kwe mbingu, 23 niyo alombeza akagamba, Zumbe Mnungu ywa Izilaeli, hahali Mnungu mtuhu enga weye, uko kwe mbingu, hegu hasi he isi. Weye kukint'hiza Indagano yako kwa want'hu wako na kuwalagisa lukunde lwako kwa awo wakutimila kwa miyoyo yawe yose yadya ukulonga. 24 Weye kukint'hiza kiya walagane na tate Daudi mndima ywako, kwa udahi wako mkulu enga ivo ili dielo. 25 Naho haluse, weye Zumbe Mnungu ywetu, Mnungu ywa Izilaeli, nakulombeza ukumbukile malagano matuhu walaganaga na tate Daudi mndima ywako, aho wamgambaga, Mazuwa yose yumwenga mwa welekwa wako naande seuta ywa Izilaeli uneva wadamanya yakukwelela kwa wengele enga ivo Daudi atendaga. 26 Haluse elo Mnungu ywa Izilaeli nakulombeza uyakint'hize yadya walaganaga na tate Daudi mndima ywako.

27 Mna, mwe kindedi weye nowikale mwe isi? Hata zimbingu zikulanga vitendese du hazikukukint'ha. Togola noukint'he mwe Nyumba niizengile miye? 28 Naho elo Zumbe dyangu, Mnungu ywangu miye ni mndima ywako. Nitegeleze aya hulombeza niyo wanink'ha aya hulombeza ivi dielo. 29 Idime kilo na msi Inyumba, aho nawo neninde. Unitegeleze umwo heza kulombeza kuhinga aha. 30 Nakulombeza ukive kikakulombeza miye na want'hu wako Izilaeli kuhinga hant'hu aha. Uko kwako kwe mbingu ukwikala ukitegeleze niyo wakiusila wavu wetu.

31 Mnt'hu anamtendela maihi miyawe niyo egalwa aha ho kulavila malavo, akaungwa akelise aha he Nyumba ya Mnungu niyo akelisa, 32 nakulombeza, tegeleza uko kwe mbingu niyo wasengela mwa want'hu wako. Mta masa umsengele viligane na masa yakwe. Heena masa naye umwink'he uwagilwa wakwe.

33 Umwo want'hu wako Waizilaeli wanatoigwa ni wank'hondo wawe kwaviya wakutendela wavu mna niyo wakuhitukila nakukutunya kwe Nyumba yako kwakweseleza wakakulombeza uwausile wavu wawe, 34 wategeleze uko kwe mbingu. Wausile wavu want'hu wako Waizilaeli uwavuze kwe isi wawenk'haga wakale wawe.

35 Umwo mbingu zinalemela kunya fula kwaviya want'hu wako wakutendela wavu, niyo wakulombeza kuhinga hant'hu aha kwe Nyumba ino na kuditunya dizina dyako na kuuleka wavu wawe kwaviya weye kuwasulumiza, 36 uwategeleze uko kwe mbingu. Wausile wavu wawe, wandima wako na want'hu wako Izilaeli na kuwahiniza kudamanya yakuwagilwa. Zumbe, naho chalombeza ukigaile fula mwe isi ukink'hile suwe want'hu wako kunda yetu.

37 Umwo kunanda na gumbo hegu unyonge wa tauni na nk'hangu na unyonge we vihandwa na sige hegu vigoda. Naho uneva want'hu wako wazungulukwa ni wank'hondo mwe mizi yawe, hegu vuma dyodyose na maine yoyose, 38 ivo chakulombeza wive ayo nayalombezwe ni want'hu wako Izilaeli hegu na mnt'hu yeyose naho kila mnt'hu akamanya makunt'ho yo moyo wakwe akakulombeza uku akahinga kwe nyumba ino. 39 Mtegeleze kulombeza kwakwe. Mtegeleze uko kwako kwe mbingu, umuusile wavu wakwe niyo wamwambiza. Ni weye wikedu umanyize zifanyanyi za moyo wa kila mnt'hu. Msengele kila mnt'hu viligane no udamanyi wakwe, 40 vileke want'hu wako wakutunye na kuzumila yadya ukulonga lupisi lwose wakwikala mwe isi wawenk'haga wakale wetu.

41 Umwo mtakwiza hiye yumwenga ywa want'hu wako Izilaeli eneza kulawa hale vileke akuvike na kukulombeza mwe Nyumba ino, 42 kwaviya, want'hu hi Waizilaeli naweve zint'hogola zako no ludole no udahi wako, umwo mnt'hu akaunga kulombeza kuhinga mwe Nyumba ino. 43 Nakulombeza mtegeleze ukwo kwe mbingu, ukwo ukwikala, umwink'he kiya akulombeza uyo mtakwiza, vileke want'hu wose we isi wakutunye kugamba Nyumba ino niizengile ni hant'hu ha weye ho kuvikilwa.

44 Umwo want'hu wako wakaita kwe nk'hondo wakatowane na wank'hondo wawe, kokose nounawegale, naho wakalombeza kwa Zumbe uku wakahinga mwo mzi uusagule ne Nyumba niizengile vileke want'hu wakuvike umwo, 45 wategeleze kulombeza kwawe. Weve ukwo kwe mbingu naho uwenk'he uhumi.

46 Uneva want'hu wako wanakutendela wavu, kwaviya hahali mnt'hu yeyose heekutenda wavu, na weye niyo wawaihiya, niyo wawaleka wahumigwe ni wank'hondo wawe na kuwatenda watahigwe na kwigalwa kwe ziisi za wank'hondo za hale hegu za hagihi, 47 mna niyo wakweiila kindedindedi kwako kwe isi watahigwe niyo wagamba, kitenda wavu, naho kitenda wiihi. 48 Uneva wanakweiila kwa kindedindedi, mwe isi ya wank'hondo wawe uko watahigwe niyo wakulombeza wakahinga mwe isi yawe uwenk'hile watati zawe na mzi uno uusagule na Nyumba ino nizengile vileke uvikwe umwo, 49 elo wategeleze kulombeza kwawe, uko kwe mbingu, naho uwaonele mbazi naho kuwaambiza. 50 Wausile wavu want'hu wawe no wiihi wakutendele, uwatende wank'hondo wawe wawaonele mbazi naho wawadamanyile ayedi. 51 Kwaviya ni want'hu wako uwasagule na kuwalava mwe isi ya Misili kulawa mwe masulumizo makulu.

52 Nakulombeza utegeleze kulombeza kwa mndima ywako hamwenga na want'hu wako Izilaeli, lupisi lwolwose wakakulombeza. 53 Kwaviya weye Zumbe Mnungu wawasagulaga kulawa mwa want'hu wose, vileke wande want'hu wako mwenye enga ivo walongaga kwombokela mndima ywako Musa, umwo wawalavaga wakale wetu kulawa mwe isi ya Misili.

54 Selemani eze ibinde kulombeza kwa Zumbe akimalaga hant'hu afunamaga na kuinula mikono yakwe kulawa hadya naakavika kulongole kwe kilingo cho kulavila nt'hambiko. 55 Akimalaga na kuwavikila Waizilaeli wose wadugane aho akalonga kwa izwi kulu akagamba, 56 Atogolwe Zumbe awenk'hile kutondowala want'hu wakwe Izilaeli enga ivo alaganaga hakihali kint'hu chochose kikint'hile. Akint'hizaga lagano dyakwe dyedi kwombokela kwa mndima ywakwe Musa. 57 Namlombeza Zumbe Mnungu ywetu ande hamwenga na suwe enga ivo andaga na wakale wetu, chalombeza asekukileka hegu kukiduula. 58 Yehe aihituile mioyo yetu kwakwe, kitimile viya akuunga, ne miko yakwe ne zisigilizi zakwe ziya awenk'haga wakale wetu. 59 Naho zimbuli zangu izi nilombeze kwa Zumbe zinde hagihi naye msi na kilo. Ande na mbazi na want'hu wakwe Waizilaeli hamwenga na mndima ywakwe. Awenk'he yadya wakuyaunga kila zuwa. 60 Naivo want'hu wose we si zose wamanye kugamba Zumbe Mnungu ni yehe ekedu naho hahali mtuhu. 61 Nanywe want'hu wakwe mnde wahuilwa kwa Zumbe Mnungu ywetu, mkatimila miko yakwe ne zisigilizi zakwe enga ivo mwili dielo.

62 Akajika Seuta Selemani na want'hu wose wa Izilaeli niyo wamlavila Zumbe Mnungu nt'hambiko za kokwa. 63 Atambikaga kwa kulava ng'ombe alufu milongo miidi na mbili na ngoto laki imwenga na milongo miidi alufu kunda malavo ya utondowazi. Ivo nivo seuta Selemani na want'hu wose wa Izilaeli waiikaga Nyumba ya Mnungu kwa Zumbe. 64 Mwe dizuwa iidyo, seuta Selemani awikaga ha Zumbe hagatigati ye uwa wili kulongole ye Nyumba ya Mnungu, aho niyo alavila malavo yo kokwa pele, malavo ya nk'hande na mavuta ya mifugwa kunda malavo ya utondowazi kwaviya kilingo kiya che shaba hachadahaga kwinula malavo ayo yose.

65 Elo, Selemani adamanyaga zuwa dya kinyemi kwa mazuwa mfungate na mazuwa mfungate matuhu, mazuwa mlongo na mane. Yehe na Waizilaeli wose wandaga na mdugano, mnyamp'hala wa want'hu kulawa kwo mwingilo wa Hamasi mpaka Misili. 66 Mwe dizuwa dya mnane Selemani awalagaga awant'hu. Wamvikilaga seuta niyo wakeitila kwe zikaya wakanda na kinyemi na kwanga mwe mioyo kwa yose ayedi Zumbe amdamanyile mndima ywakwe Daudi na want'hu wakwe Waizilaeli.