1 Naye seuta Hilamu ywa Tilo uyo andaga mbwiyaye ywa Daudi, eze eve ivo atumaga want'hu wakwe kwa seuta Selemani. 2 Selemani naye niyo amwigaila uhituzi seuta Hilamu ywa Tilo akamgamba, 3 "Umanye tate Daudi hadahaga kumzengela Zumbe Mnungu nyumba ya kumvika, kwaviya andaga na nk'hondo kulawa nt'hendelo zakwe zose mpaka aho Zumbe Mnungu eze amwink'he uhumi mwa wank'hondo wakwe awo. 4 Mna haluse Zumbe Mnungu kanink'ha utondowazi mwe zint'hendelo zangu zose, hakuna nk'hondo hegu mnk'hondo wowose. 5 Naivo elo nafanyanya kuzenga nyumba ya kumvika Zumbe Mnungu. Ivi nivo Zumbe Mnungu alaganaga na tate Daudi akamgamba, ‘Mwanao huunga nimwiike mwo useuta hant'hu hako naanizengele nyumba nk'hulu ya kunivika.’ 6 Ivo wagambe want'hu wanikant'hile mielezi ya Lebanoni. Naho nawambizane na want'hu wangu, name neniwalihe want'hu wako chochose noulonge, umanye kugamba hina yeyose amanyize kusenga vedi maziti enga ivo weli awako."

7 Hilamu elelwagwa eze eve ulosi uwo wa Selemani, niyo agamba, "Naatunywe Zumbe dielo, kwaviya kamwink'ha Daudi mwanawe ywa kilume mta mizungu aikaile isi iyo ink'hulu!" 8 Ivo Hilamu amwigailaga ulosi Selemani akagamba, "Hiwiva ulosi wako name nohwink'he maziti ye mielezi ne miti ikwitangwa mibeloshi. 9 Want'hu wangu nawayaseleze uko kwe bahali kulawa Lebanoni. Nawayafunge mazilozilo na kuyatenda yayeye mwa mazi mpaka uko ukuunga. Want'hu wako nawadohole niyo wayatutika. Weye nawe nounink'he nk'hande du kwajili ya want'hu wa mwe nyumba yangu."

10 Ivo Hilamu amwink'haga Selemani maziti ye mielezi na miti ikwitangwa mibeloshi enga ivo aungaga, 11 Selemani naye amwink'haga Hilamu madebe laki mbili na milongo mine ya ngano na madebe magana maidi ya mavuta ya zeituni, kila mwaka enga ivo waivane.

12 Ivo Zumbe amwink'haga Selemani mzungu enga ivo alaganaga. Kwandaga na umbuya wa utondowazi mwa Hilamu na Selemani. Waidi awo wakeikilaga Ndagano.

13 Seuta Selemani aduganyaga want'hu alufu milongo mitatu kulawa mwe Izilaeli yose wande wandima wa kutigizwa, 14 naho amwiikaga Adonilamu kunda mnyamp'hala ywawe. Wapangaga mwe mafyo matatu ya want'hu alufu mlongo kila dimwenga. Ayegalaga mafyo ayo kwa kuhokelana, ivo wekalaga Lebanoni mwezi umwenga, kaya nako miezi miidi. 15 Naho, Selemani andaga na want'hu wakusongola maiwe alufu milongo mnane, na wakwinula nt'hanu alufu milongo mfungate, 16 na wakulu alufu nt'hatu na magana matatu wandaga wakakimaila indima na kuwalangiliza awandima awo. 17 Kwa sigilizi ya seuta wasimbaga maiwe makulu naho ya yombe kulu ya kuizengela ink'hongelo ye Nyumba ank'hulu ya Mnungu. 18 Wazesi wa Selemani na Hilamu na want'hu wa Gebali wakant'haga na kuika lumwe zimbao na maiwe yo kuzengela Nyumba ya Mnungu.