1 Mwo mwaka wa mlongo na mnane, wo useuta wa Yeloboamu mwana Nebati, Abiya akongaga useuta wakwe mwe dikabila dya Yuda. 2 Alongozaga kwa miyaka mitatu uko Yelusalemu. Nine etangwagwa niye Maaka mwana Abisalomu. 3 Yehe atendaga wavu wose uudya atendaga ise, andaga hiye mhuwilwa kwa Zumbe Mnungu ukaliganyiza na babakwe Daudi ivo andaga. 4 Mna kwajili ya Daudi mndima ywakwe, Zumbe Mnungu ywakwe, amwink'haga mwana kilume alongoze mwe Yelusalemu na kuwiika mzi uwo utoge. 5 Zumbe atendaga ivo kwaviya Daudi amwelelaga mwo udamanyi wakwe, naho halekaga kutimila zisigilizi zakwe, mna ni dilema dimwenga du dya Ulia alaiile kwa Wahiti. 6 Kwandaga na nk'hondo mwa Leoboamu na Yehoboamu mwo lupisi lwose lwo wikazi wa Abia. 7 Zimbuli zakwe zose zisigale na ziya atendaga Abia, zawandikwagwa mwe kitabu che misimo cha maseuta wa Yuda. Kwandaga na nk'hondo yagendeelaga mwa Abiya na Yeloboamu.

8 Abia abanikaga niyo amoselwa msanga mwo mzi wa Daudi, niyo Asa mwanawe anda seuta hant'hu ha ise.

9 Mwo mwaka wa milongo miidi yo useuta wa Yeloboamu ywa Izilaeli, Asa niho akongaga kunda seuta ywa Yuda, 10 andaga seuta uko Yelusalemu kwa miaka milongo mine na umwenga. Zina dya weyakwe etangwagwa niye Maaka mwana Abisalomu. 11 Seuta Asa atendaga ayedi kwa Zumbe enga ivo atendaga mkale ywakwe seuta Daudi. 12 Awagulusaga mwe isi wagosi na wavele wandaga wakekaila aaho wakatenda uhabwasi hant'hu he miviko yawe na kuyausa mahili yose yadamanywagwa ni wakale wakwe. 13 Iviyao iviya amuusaga weyakwe mwo umalikia kwaviya adamanyaga hili dya kuvika dya Ashela. Asa adibogozolaga dihili idyo niyo aditimp'ha moto uko kwe dikolongo dya Kidiloni. 14 Mna Asa andaga hausile hant'hu henukile ha kulavila nt'hambiko, hata ivo yehe nakanda na moyo mhuilwa kwa Zumbe Mnungu mwo wikazi wakwe wose. 15 Avivuzaga mwe Nyumba ya Mnungu vint'hu vose viya avikukizaga ise na vakwe mwenye, zahabu, na masawa na vint'hu vose va masawa na vituhu.

16 Kwandaga na nk'hondo mwa seuta Asa ywa Yuda na seuta Baasha ywa Izilaeli mwo lupisi lwose lwo kwikaila kwakwe. 17 Baasha seuta ywa Izilaeli akwelaga kwe isi ya Yuda niyo azenga gomela Lama kukindila mnt'hu yeyose ase kwingila hegu kufosa mwe isi ya Asa seuta ywa Yuda. 18 Asa niyo aguha masawa yose ne zahabu zasigalaga mwe kindolo che Nyumba ya Mnungu na ye kiseuta niyo azink'hiza kwa wandima wakwe na kuwatuma uko Damesiki kwa seuta Beni Hadadi ywa Asilia umwana Tabilimoni uyo mwezukuluwe dya Hezioni seuta ywa Asilia, niyo amgamba. 19 "Nekiike mwivano weye na miye, enga ivo watendaga tate na iso, kaula hikwigaila mageleko, masawa na zahabu, haluse ita ukause mwivano wako wiikile na Baasha seuta ywa Izilaeli vileke ause mafyo ya watowani wakwe mwe isi yangu."

20 Beni Hadadi naye azumilaga zifanayanyi za seuta Asa, ivo egalaga wakulu wa mafyo ya watowani wakwe wakatowane na want'hu we mizi ya Izilaeli. Waitahaga mizi ya Iyoni, Dani, Abeli- Beti- Maaka na Keneloti yose hamwenga ne isi ya Nafutali. 21 Seuta Baasha eze eve ivo alekaga indima yo kuuzenga umzi wa Lama niyo auya Tiliza.

22 Niho seuta Asa awetangaga want'hu wose wa Yuda haheina kumleka mnt'hu yeyose, wasamize maiwe ne zimbao kulawa Lama, ivint'hu ivo Baasha andaga akavizengela. Ivo nivo seuta Asa avizengelaga imizi ya Geba na Mizipa mwe isi ya Benjamini

23 Hamwenga ne zimbuli zose zisigale izo seuta Asa adamanye no udahi wakwe, ne mizi azengile, neziwandikwa mwe kitabu che misimo cha maseuta wa Yuda. Mna kwo kudalahala kwakwe andaga na unyonge wa viga. 24 Asa abanikaga niyo amoselwa msanga kwe vikuta va wakale wakwe kwo mzi wa Daudi uyo ise. Yehoshafati uyo mwanawe, andaga seuta hant'hu ha ise.

25 Nadabu mwana Yeloboamu akongaga useuta mwe Izilaeli mwo mwaka wa kaidi wa seuta Asa ywa Yuda. Andaga seuta mwe Izilaeli kwa miyaka miidi. 26 Nadabu atendaga wavu ha Zumbe niyo anda enga ise uyo awatendaga want'hu wa Izilaeli watende wavu.

27 Baasha mwana Ahiya ywe dikabila dya Isakali, amtendelaga usezengi Nadabu niyo amkoma uko kwo mzi wa Wafilisiti uko Gibetoni, umwo Nadabu hamwenga na Waizilaeli wose wandaga wakauzungulukila mzi uwo. 28 Ivo Baasha amkomaga Nadabu mwo mwaka wa katatu wa kwikaila kwakwe seuta Asa ywa Yuda Baasha naye niyo anda seuta ywa Izilaeli. 29 Aaho eze ande seuta, akongaga kuwakoma imp'huga yose ya Yeloboamu, hasigaze hata mnt'hu yumwenga akanda mgima, enga ivo Zumbe alongaga kwombokela mndima ywakwe mlotezi Ahiya alawaga Shilo. Imp'huga yose ya Yeloboamu yakomwagwa, hakwandaga na yeyose andaga mgima. 30 Aya yalailaga kwo wavu wa Yeloboamu, awatendaga Waizilaeli watende wavu. Kwajili yo kuihiza kwakwe, amtendaga Zumbe Mnungu ywa Izilaeli ande na maya.

31 Elo, zimbuli zose zint'huhu na ziya adamanyaga Nadabu zawandikwagwa mwe kitabu che misimo cha maseuta wa Izilaeli. 32 Asa na Baasha seuta ywa Izilaeli wandaga wank'hondo mwo lupisi lwose lwo useuta wawe.

33 Mwo mwaka wa katatu wo useuta ywa Asa uko Yuda, Baasha mwana Ahiya naye akongaga useuta wakwe mwe Izilaeli yose mwe mzi wa Tiliza kwa miaka milongo miidi na mine. 34 Amtendelaga wavu Mnungu, niyo awatenda Waizilaeli nawo watende.