1 Beni Hadadi seuta ywa Asilia aduganyaga idifyo dyakwe dyose dya watowani no kwambizwa ni maseuta milongo mitatu na waidi watuhu wakanda na magali yawe yo kugendezwa ni zifalasi, waubasaga mzi wa Samalia niyo wauzunguluka na kuutowa. 2 Egalaga wegala ulosi kwo mzi kwa seuta Ahabu ywa Izilaeli akamgamba, "Seuta Beni Hadadi agamba ivi, 3 Masawa ne zahabu zako zose ni ugoli wangu.Wavele wako wahombweele na wanao wose nawande wangu."

4 Ahabu seuta ywa Izilaeli niyo amhitula, "Zumbe dyangu seuta, enga ivo ulongile, miye mwenye na vose nnanavo, vako weye."

5 Wadya want'hu wegale ulosi wamwiziilaga naho Ahabu seuta ywa Izilaeli wakagamba, Seuta Beni Adadi kagamba, "Nehikwigaila ulosi kugamba unink'he masawa na zahabu na wavele wako na wanawo wande wangu, 6 Haluse lupisi enga ulu aho luvi, nenigale wandima wangu weze wakaule nyumba yako ye kiseuta na ya wandima wako naho waguhe kila kint'hu chako cha ugoli."

7 Seuta Ahabu awetangaga vilongozi wose we isi niyo awagamba, "Mmuona uyu mnt'hu ivo akuzungula maihi kwetu. Anitumilaga ulosi wa kuwaunga wakazangu na wanangu na zahabu na masawa yangu, name nehizumila."

8 Niho want'hu wose ne vilongozi wamgambaga, "Usekumzumila naho use kumtegeleza."

9 Ivo niyo awagamba wadya wamwigaile ulosi kulawa kwa seuta Beni Hadadi kugamba, "Mgambileni seuta Beni Hadadi ivii, nehizumila ulosi wakwe udya wa nk'hongo, mna uno wa kaidi hikudaha kuuzumila du."

Wadya want'hu wegale ulosi wahalawaga niyo wagenda kumwink'ha seuta Beni Hadadi uhituzi wa Ahabu seuta ywa Izilaeli. 10 Beni Hadadi niyo asigiila ulosi uno kugamba, "Milungu inikome uneva nokunde na vumbi dikukint'ha kila mtowani ywangu kuguha fumba dimwenga dya maivu disigale mwo mzi wa Samalia!"

11 Ahabu Seuta ywa Izilaeli amhitulaga kugamba, "Mgambeni seuta Beni Hadadi kugamba mtowani heekogoha aketogola kwo uheelo we nk'hondo, hiyo umwo nk'hondo ikanda ikei."

12 Beni Hadadi auhokelaga uhituzi wa Ahabu umwo yehe ne vilongozi watuhu wandaga kwe dihema dyawe wakanywa. Yehe niyo awagamba watowani wakwe wakeike lumwe vileke wautowe mzi, ivo niyo wakeika lumwe.

13 Mwo lupisi uulo, mlotezi aitaga kwa seuta Ahabu ywa Izilaeli niyo amgamba, "Zumbe agamba, ‘Kuuona uwingi wa mafyo ya watowani awa. Dielo idi nohwink'he ludole lwa kuwahuma, nawe noumanye kugamba ni miye Zumbe Mnungu.’"

14 Ahabu niyo amuuza, "Niani naakilongoze kwe nk'hondo?"

Mlotezi niyo ahitula, "Zumbe kagamba, Ni wabwanga we difyo dya watowani wakulongozwa ni mnyamp'hala ywe wilaya."

Seuta niyo auza, "Niani naakonge nk'hondo?"

Mlotezi niyo ahitula, "Ni weye."

15 Ivo seuta awetangaga wabwanga wose wandaga watowani we difyo dyandaga dikalongozwa ni wakulu wa watowani we zi wilaya uwazilo wawe, wandaga magana maidi na milongo mitatu na waidi. Naho akajiaka etangaga idifyo dya watowani dyose dya Izilaeli, uwazilo wawe wandaga alufu mfungate.

16 Ahabu ne difyo dyakwe wakongaga nk'hondo nomsi umwo Beni Hadadi na wadya maseuta weyawe milongo mitatu na waidi wamwambizaga wandaga wakanywa mp'hombe na kukolwa kwa mahema yawe. 17 Wadya wabwanga watowani wandaga hasi ya wakulu we ziwilaya nawo walongolaga. Beni Hadadi andaga kegala kale wapelembi awo wamwigailaga ulosi kugamba watowani dingila mwe isi kulawa Samalia. 18 Beni Hadadi niyo awagamba, "Wagwileni wakanda wagima, inde weza kink'hondo hegu weza kwa utondowazi."

. 19 Wadya wabwanga watowani wandaga walongola kwe nk'hondo uku wakatimilwa ni difyo dya watowani dya Waizilaeli. 20 Kila yumwenga akomaga mnk'hondo yumwenga. Wasilia wanyilikaga, Waizilaeli nawo wawagulusaga kunyuma kwawe mna Beni Hadadi anyilikaga akanda mwe falasi yakwe hamwenga na watowani watuhu mwe zifalasi zawe. 21 Seuta ywa Izilaeli andaga mhumi we nk'hondo niyo ataha zifalasi na magali ya kugendezwa ni zifalasi na kuwakoma want'hu wa Asilia wabindile ingi.

22 Mlotezi agendaga kugambila seuta ywa izilaeli akamgamba, "Uya ukaikile lumwe difyo dyako dya watowani ukafanyanye mizungu ya kudamanya kwaviya mwaka ukwiza seuta ywa Asilia neeze naho mtowane."

23 Wambizi wa seuta Beni Hadadi wamlangilizaga wakamgamba, "Milungu ya Izilaeli ni milungu ya mwe milima, nivo vilekile wakakihuma. Mna nekiwahume uneva kina towana nawo nk'hondo mwe nt'hindiga. 24 Haluse tenda ivi. Wause wadya maseuta milongo mitatu na waidi wandile wakawalongoza watowani, niyo hant'hu hawe waika vilongozi watuhu wa mafyo ya watowani. 25 Uduganye fyo kulu dya watowani enga diya dyagile, uwazilo we zifalasi zawe uligane na magali yawe. Nekiwatowe Waizilaeli kwe nt'hindiga, naho ikindedi nekiwakome."

Seuta Beni Hadadi azumilaga ulangilizi wawe niyo atenda enga iivo. 26 Lupisi ulo lwize lubule msimo wa mp'heho, seuta Beni Hadadi awaduganyaga watowani wakwe niyo waita kwo mzi wa Afeka vileke wakatowane na Wazilaeli. 27 Waizilaeli nawo waduganywagwa niyo wenk'higwa vitowanilo, niyo wawabasa Wasilia. Want'hu wa Izilaeli waikaga nk'hambi, waonekaga enga vifyo viidi vidoododo va mbuzi, mna Wasilia wenelaga isi yose.

28 Mlotezi agendaga kumgamba seuta Ahabu, "Mnungu agamba, ‘Kwaviya Wasilia wagamba Zumbe ni Mnungu ywa mwe milima naho hiye ywa mwe zint'hindiga, nohwink'he ludole lwa kuditowa idifyo idi dikulu dya wank'hondo, nawe niho noumanye kugamba ni miye Zumbe Mnungu.’"

29 Mazuwa mfungate Waizilaeli na Wasilia wandaga wakei kukonga kutowana mna nawakakekaula kulawa kwe zink'hambi zawe. Mwe dizuwa dya mfungate nk'hondo yakongaga, aho kwa zuwa dimwenga Waizilaeli wawakomaga Wasilia laki imwenga wakugenda lwaviga. 30 Wadya wasigalaga wanyilikilaga kwo mzi wa Afeka. Uko nako nk'handula zo mzi zawagweelaga na kukoma want'hu wa Asilia alufu milongo miidi na mfungate.

Seuta Beni Hadadi naye anyilikilaga kwo mzi niyo akefisa kwe chumba. 31 Wandima wakwe wagendaga kumgamba, "Kiva kugamba maseuta wa Izilaeli ni want'hu wana mbazi, elo goja kivale magunia mwe vigudi na na sigi mwe zisingo zetu kimbase seuta ywa Izilaeli, mafa naakuhonye ugima wako." 32 Ivo wakezinganizaga magunia mwe vigudi vawe na sigi mwe zisingo zawe niyo wagenda kumgamba Ahabu, "Mndima ywako Beni Hadadi akweiila umneke use kumkoma." Seuta Ahabu niyo ahitula, "Ivo akei mgima? Vedi! Yehe ndugu ywangu!"

33 Wandima wa Beni Hadadi wandaga wakakawiila kilagiso chochose cha wedi, naho Ahabu eze agambe "ndungu ywangu." Woho niyo wapowela wakagamba, "Ni kindedi ivo ulongile Beni Hadadi nduguyo!"

Ahabu niyo agamba, "Mwigaleni aha hangu." Beni-hadadi eze abule, Ahabu amhokelaga engile mwe digali dikugendezwa ni falasi hamwenga naye. 34 Beni Hadadi niyo amgamba , Nohuvuzile imizi idya tate atahaga kulawa kwa iso, nawe nowiitende inde mizi yako ya uchuuzi uko Damesiki enga ivo tate atendaga uko Samalia.

Ahabu niyo ahitula, "Nohulekele kwa aya ulongile." Ivo aikaga Ndagano niyo amlekela aite.

35 Kwa sigilizi ya Zumbe Mnungu, yumwenga mwa walotezi amgambaga miyawe, "Nitowe!" Mna yudya miyawe alemelaga. 36 Ivo mlotezi niyo agamba, "Kwaviya huungile kutenda enga ivo alongile Zumbe, simba neikukome haluse ivi ukahalawa aha." Naho ni kindedi aaho weze wapangane niyo abwiilana ne simba niyo yamkoma.

37 Naho niyo mlotezi uuyo abwiilana na mnt'hu mtuhu niyo amgamba "Nitowe." Yudya mnt'hu amtowaga na kumlumizisa. 38 Ivo yudya mlotezi agendaga kukimaala he sila. Andaga akamgoja seuta ywa Izilaeli omboke. Andaga kakezinganiza kitambala mwe kihanga chakwe vileke ase kumanyika. 39 Umwo seuta andaga akomboka, yudya mlotezi alongaga kwa izwi kulu akagamba, "Zumbe, miye mndima ywako nandaga kwe nk'hondo, niyo eza mtowani yumwenga niyo anigaila mtahigwa yumwenga niyo anigamba, ‘Mwamile mnt'hu uyu. Uneva ana kunyilika, noulihe ugima wako hegu vibesu alufu nt'hatu va masawa.’ 40 Haluse, umwo nandaga hadamanya ndima nt'huhu, yudya mnt'hu niyo anyilika."

Yudya seuta niyo ahitula, "Kumbe kukesengela mwenye, uwo nuwo nounde usengelo wako."

41 Yudya mlotezi niyo atatula kiya kitambala kigubike uso wakwe, aaho niyo seuta abunk'hula kugamba kumbe nakanda yumwenga mwa walotezi. 42 Mlotezi niyo amgamba seuta, "Zumbe agamba ivi, ‘Kwaviya yudya mnt'hu nakugambile akomwe kumlekela kanyilika, weye niwe noukomwe hant'hu hakwe. Want'hu wako wakomwe hant'hu ha want'hu wakwe.’"

43 Niyo seuta ywa Izilaeli auya Samalia kwe kaya yakwe akanda na kinyulu na maya.