1 Umwo Malikia ywa Sheba eze eve kugamba Zumbe kamtenda seuta Selemani amanyikise, amtalamkilaga uko Yelusalemu na kugenda kumuuza mbuli ndala. 2 Abulaga Yelusalemu akanda na ludongo lukulu lwa want'hu wakanda na ngamia zinule vint'hu va mhemp'he na zahabu zibindile ingi, na maiwe ya yombe kulu. Ezaga kwa Selemani na kusimuila naye mwa yose andaga akayafanyanya. 3 Selemani ayahitulaga yose, hakwandaga na dyodyose dala dyamhumaga kuhitula. 4 Umwo Malikia ywa Sheba evaga imizungu ya seuta Selemani no kuiona inyumba ye kiseuta iyo aizengile, 5 ne nk'hande yegalwagwa ho ludyo, wakulu wakwe nawo ivo wekalaga ho ludyo, wandima wakwe ivo wasank'hanaga naivo wavalaga, ivo wandima wakwe wapasaga uludyo ne divai, ne nt'hambiko yegalwagwa kwe Nyumba ya Mnungu vileke ikalavilwe Zumbe, vamtendaga aluluwale na kweheelwesa. 6 Ivo Malikia niyo agamba, "Yadya nivile mwe isi yangu ni kindedi ne mizungu yako. 7 Mna hyahuile zimbuli izi mpaka hadya nizile kuyaona mwenye. Mna kumbe mbuli nigambilwe hazikubula hata inusu ye zimbuli ivo zili. Mizungu yako no ugoli wako ukulisa kujink'ha ivo nivile. 8 Want'hu wako ne vilongozi wo useuta wako wakukudamanyila ndima mazuwa yose naho wana kinyemi kwaviya wategeleza mzungu wako. 9 Naatogolwe Zumbe Mnungu ywako elelwe na weye na kukuika mwe difumbi dya useuta dya Izilaeli. Kwajili yo lukunde lwakwe lwa mazuwa yose kwa Izilaeli kakutenda weye kunda seuta vileke kugendeleza imiko no uwagilwa."

10 Niyo Malikia amwink'ha seuta Selemani kilo zijink'hile alafu kane za zahabu na vint'hu va mhemp'he na maiwe ya yombe kulu. Havinati naho vigalwe vint'hu va mhemp'he vingi enga ivo.

11 Zimeli za Hilamu zegalaga zahabu kulawa Ofili. Kulawa uko naho zaguhaga mbao nyingi za miti ikwitangwa msandali hamwega na maiwe ya yombe kulu. 12 Zimbao izo nizo seuta azengelaga mihindo ye Nyumba ya Mnungu hamwenga ne nyumba ye kiseuta na kudamanyila vinanda ne ving'weng'we va wakemi. Miti iyo ya misandali yaletwagwa Izilaeli yandilisaga yedi. Hainati ilaile naho miti iyo ya misandali haiyoneke hata ivi dielo.

13 Seuta Selemani amwink'haga Malikia ywa Sheba kila kiya aungaga, hamwenga ne vituhu amwink'hile viligane no ukise wakwe we kiseuta. Malikia uyo hamwenga na want'hu wakwe wakeuiyaga kwe kaya uko Sheba.

14 Kila mwaka seuta Selemani egailwagwa kilo zijink'hile alufu milongo miidi na magana matatu za zahabu. 15 Kilo izo ze zahabu apataga, ni kuleka maliho wayapataga kwa wachuuzi na want'hu na kwa maseuta wa Alabia na wakulu wa Izilaeli.

16 Selemani asanaga nk'hindo nk'hulu magana maidi za zahabu, kila nk'hindo yandaga ya kilo mfungate za zahabu. 17 Naho asanaga nk'hindo nt'huhu ndodondodo magana matatu za zahabu, kila imwenga yandaga ya kilo imwenga na nusu. Aziikaga mwe nyumba ya kiseuta uwo wetangwagwa Mbago ya Lebanoni.

18 Selemani adamanyaga iviyaiviya fumbi kulu dye kiseuta dya mahembe ya nt'hembo niyo agubika kwa zahabu yedi. 19 Fumbi idyo dya kiseuta dyandaga na mihindo mtandatu. Kulanga kwa kunyuma nedinda enga mkungilo naho kwandaga na mahili enga simba yandaga mwe mihindo uku na uku hokwikila mikono yakwe. 20 Naho kwandaga na mahili mlongo na maidi ya simba yakimalaga mwe idya mihindo mtandatu, simba imwenga mwe kila uheelo. Hakunati kudamanywe fumbi dya kiseuta enga idyo mwo useuta wowose udya.

21 Vyombo vose va kunywela hamwenga ne vyombo vose mwe Nyumba yetangwagwa Mbago ya Lebanoni vandaga va zahabu yedi. Hakwandaga na chochose chadamanywagwa kwa masawa, kwaviya mwo lupisi ulo want'hu wayaonaga kunda hi kint'hu cha yombe kulu. 22 Seuta Selemani andaga na meli za Talishishi zandaga zikatamba hamwenga ne zimeli za Hilamu. Ivo kila mwaka wa katatu meli izi za Talishishi zandaga zikamwigaila zahabu na masawa na mahembe ya nt'hembo na manyani na dege dikwitangwa tausi.

23 Ivo seuta Selemani andaga kasump'huula mwo ugoli na mizungu kujink'ha seuta yeyose yudya, 24 want'hu wa si zose waungisaga kutegeleza mizungu enk'higwe ni Zumbe Mnungu. 25 Kila yumwenga amwigailaga mageleko ya masawa na vint'hu va zahabu na mavalo yedi na vitowanilo na vint'hu va mhemp'he na falasi na nyumbu. Want'hu wagendeelaga ivo kila mwaka.

26 Uyo seuta Selemani aduganyaga magali alufu imwenga na magana mane yakugendezwa ni falasi na falasi alufu mlongo na mbili. Falasi zimwenga aziikaga kwe mizi ya magali yakugendezwa ni falasi, matuhu nayo agendaga kuyaika uko Yelusalemu. 27 Mwo lupisi lwo uzumbe wakwe, Selemani ayatendaga masawa kunda enga maiwe yazoelwe. Mielezi nayo yandaga ibinda ingi enga mikuyu ya Shefela ya mwe isi ya diwandamo. 28 Seuta Selemani asigiilaga zifalasi kulawa Misili na kulawa Kilikia, uko wachuuzi wakwe wa kiseuta watagilagwa ni want'hu wa Kilikia. 29 Gali dimwenga dikugendezwa ni falasi dyagulagwa kulawa Misili kwa kilo mfungate za masawa. Falasi imwenga nayo yagulagwa kwa kilo mbili za aayo masawa. Iviyaiviya wachuuzi wa kiseuta awo wayatagaga magali ne zifalasi izo kwa kuwatagila maseuta wose wa Wahiti na Wasilia.