1 Zumbe Mnungu awaihiyaga Waizilaeli vituhu. Amtendaga Daudi awasulumize, Zumbe amgambaga " Wawaze want'hu wa Izilaeli na want'hu wa Yuda."

2 Ivo seuta niyo amgamba Yoabu na wakulu wa mafyo ya watowani yose yandile hamwenga naye, "Iteni kwa makabila yose ya izilaeli kulawa Dani mpaka Beel Sheba, mkawawaze want'hu nimanye uwazilo wawe."

3 Mna Yoabu niyo amgamba seuta, "Zumbe Mnungu ywako, awongezele watowani wakwe nk'hanana gana kujink'ha ivo weli ivi haluse, weye nawe mkulu ukaule mgenyezo uwo weye mwenye. Mna nii weye mkulu welelwa na mbuli ino?"

4 Mna ulosi wa seuta nounda na udahi kujink'ha wa Yoabu na wakulu wa watowani wadahi we difyo, ivo Yoabu na watowani we difyo niyo wahalawa ha seuta na kugenda kuwawaza Waizilaeli.

5 Wadendelukaga mto Yolodani na kuika kank'hambi kwa mwenye mzi wa Aloeli mzi uhagati ye dikolongo mwe isi ya Gadi kulawa aho wahingaga kasikazini ya Yazeli. 6 Niyo waita Gileadi na Kadeshi mwe isi ya Wahiti, naho waitaga Dani na kulawa Dani wazungulukaga kuita isi ya Sidoni, 7 na mpaka kwe digomela dyo mzi wa Tilo, wengilaga mwe mizi yose ya Wahivi na Wakanaani. Niyo wahalawa kuita kwa mwenye mzi ya Yuda uko Beel Sheba.

8 Umwo yombokaga miezi kenda na mazuwa milongo miidi, wabindaga kugenda mwe isi yose, niyo wauya Yelusalemu.

9 Niyo Yoabu amwigaila seuta uwazilo wa want'hu. Mwe Izilaeli nokunda na wagosi wakudaha kutowana nk'hondo laki mnane, mwe isi ya Yuda nokunda na wagosi laki shano wana udahi wa kuita kwe nk'hondo.

10 Mna Daudi mwo moyo wakwe nokunda na kiyangayanga umwo wajikaga kuwawaza want'hu. Ivo Daudi amgambaga Zumbe Mnungu, "Hidamanya wavu mkulu mwe mbuli ino nidamanye. Mna haluse Zumbe Mnungu, nakulombeza unilekele miye mndima ywako, kwaviya hidamanya mbuli ya kihezi vitendese."

11 Daudi umwo andile akei kwinuka, mwo lupisi ulwo Zumbe Mnungu amwink'haga ulosi mlotezi Gadi ywa seuta Daudi, akagamba. 12 "Ita ukamgambile Daudi ivi. ‘Zumbe Mnungu agamba, nakwink'ha mbuli izi nt'hatu, kesaguile imwenga weye mwenye na miye nohutendele.’"

13 Ivo Gadi niyo aita kwa Daudi na kumgamba, "Togola waunga sala ya miyaka mfungate ize mwe isi yako? Hegu weye uwanyilike wank'hondo wako kwa miyaka mitatu wakakutimila? Hegu kunde na maine yaihile? Fanyanya unink'he uhituzi vileke nimwigaile yudya anisigiile."

14 Daudi niyo amhitula Gadi, "Nina wogohi mkulu! Mna vaungwa nisengelwe ni Zumbe Mnungu, kujink'ha kuikwa mwo udahi wa want'hu kwaviya yehe ana mbazi zitendese."

15 Ivo Zumbe Mnungu niyo awegaila Waizilaeli manyonge yaihile, kukongela mtondo mpaka lupisi luikigwe. Want'hu alufu milongo mfungate wabanikaga mwe isi yose kulawa Dani mpaka Beel Sheba. 16 Mna umwo mtumigwa ywa kwe mbingu eze achulule mkono wakwe kuhinga mwo mzi wa Yelusalemu vileke aubanange, Zumbe Mnungu ahitulaga ulamuzi wakwe. Zumbe Mnungu niyo amgamba yudya mtumigwa uyo naakaunga aubalange umzi uwo, "Leka, vuza mkono wako!" Mtumigwa ywa Zumbe Mnungu andaga kakimala hagihi na hant'hu ha kuhutila ulozo wa Alauna uyo Myebusi.

17 Daudi eze amuone uyo mtumigwa akuwakoma want'hu, amgambaga Zumbe Mnungu, "Kaula miye ni miye mta masa! Awa want'hu wajalamu hawadamanye wavu. Nakulombeza vitendese unisengele miye hamwenga ne mp'huga yangu."

18 Mwe dizuwa idyo Gadi aitaga kwa Daudi akamgamba, "Kwela kukenya kwe kiwasa ukamzengele Zumbe Mnungu kilingo, mwa hant'hu ha kiwasa cha kuhutila ulozo cha Alauna uyo Myebusi." 19 Ivo Daudi akwelaga kukenya enga ivo alongile Gadi naivo Zumbe Mnungu amsigiile. 20 Alauna eze akaule mondwaisi amuonaga seuta akanda hagihi hamwenga na wandima wakwe, yehe naye niyo aita kwa seuta kufunamiza mtwi wakwe hasi kwa kumtunya.

21 Niyo Alauna amuuza seuta, "Nii zumbe ywangu kaniiziila miye mndima ywakwe?"

Daudi niyo amgamba "Hiza nigule kiwasa chako cha kuhutila ulozo vileke nimzengele Zumbe Mnungu kilingo vileke naho manyonge yawapatile want'hu wako yasile."

22 Alauna naye niyo amgamba Daudi, "Mkulu ywangu seuta, guha chosechose kiya ukuona chedi kilavigwe malavo. Miye nalava njeku izi kunda malavo ya kokwa na vint'hu ivi va kuhutila ulozo na ziya zikutoza magembe kunda nk'huni." 23 Seuta ivo vose nakwink'ha, "Zumbe Mnungu ywako akuzumile."

24 Mna seuta niyo amgamba Alauna, "Bule! weye hounink'he bule, miye nenivigule kwako kwa yombe dyakwe. Henimlavile Zumbe Mnungu, malavo ya kokwa ayo hayeena yombe." Ivo seuta Daudi niyo agula kiwasa cha kuhutila ulozo na njeku kwa vibesu milongo mishano va masawa. 25 Akaheza seuta Daudi niyo amzengela Zumbe Mnungu kilingo cha kumlavila malavo ya kokwa. Ivo Zumbe Mnungu niyo azumila malombezo ayo kwaajili ya Waizilaeli, na malombezo ya mavuma mwe isi ya Izilaeli yose niyo yasila.