1 Zuwa dimwenga, Daudi auzaga, "Togola, kuna mt'hu yeyose asigale mwe mp'huga ya Sauli? Naunga nimdamanyile uwedi kwajili ya Yonasani." 2 Kwandaga na mndima mwe mp'huga ya Sauli etangwagwa Siba. Siba etangwagwa aite kwa Daudi. Seuta Daudi niyo amuuza, "Togola weye ni weye Siba?"

Naye niyo amhitula, "Heye, ni miye mndima ywako."

3 Seuta niyo amuuza, "Togola eyaho mnt'hu yeyose asigale mwe mp'huga ya Sauli? Uneva eyaho naunga nimdamanyile uwedi wa Mnungu?"

Siba niyo amhitula, "Eyaho mwana Yonasani, mna yehe kaholomp'hala iviga."

4 Seuta niyo amuuza naho, "Ekuhi uyo?" Siba niyo amhitula,

"Eyuko kaya kwa Makili mwana Ahimieli uko Lo Debali." 5 Ivo, seuta Daudi niyo asigiila want'hu, niyo wakamlete kulawa kwe kaya ya Makili mwana Ahimieli uko Lo Debali.

6 Ivo, Mefibosheti mwana Yonasani naho mwezukuluwe dya Sauli aitaga kwa seuta Daudi, na kufunamiza mtwi wakwe hasi aho ha seuta Daudikwa kumtunya. Daudi niyo amwitanga, "Mefibosheti." Naye niyo etika, "Woe."

7 Daudi niyo amgamba, "Usekogoha miye nohutendele uwedi kwaajili ya iso Yonasani. Idya isanga yose yandile ya babaako Sauli nohuvuzile. Weye nawe noudye holudyo lwangu mazuwa yose."

8 Mefibosheti niyo afunamiza mtwi wakwe hasi, na kugamba, "Miye mndima ywako hi kint'hu, nii unidamanyile ayo?"

9 Niyo, seuta Daudi amwitanga Siba mndima ywa Sauli, akamgamba, "Udya ugoli wose wandile wa Sauli na mp'huga yakwe himwink'ha mwezukuluwe ywa seuta ywako. 10 Weye na wanawo na wandima wako. nomumlimile Mefibosheti naho nommwigaile ulozo vileke mwezukuluwe ywa seuta ywako ande na nk'hande mazuwa yose. Mna yehe naye nekindanye ho ludyo mazuwa yose." Mwo lupisi ulwo, Siba andaga na wana kilume mlongo na washano na wandima milongo miidi.

11 Niyo, Siba amgamba seuta, "Miye mndima ywako nenidamanye viligane na ivo seuta ywangu aungile."

Ivo, Mefibosheti andaga ho ludyo hamwenga na seuta, andaga enga mwana seuta Daudi. 12 Mefibosheti andaga na mwana mdodo ywa kilume etangwagwa Mika. Want'hu wose we mp'huga ya Siba niyo wanda wandima wa Mefibosheti. 13 Naho Mefibosheti uyo andaga kaholomp'hala iviga vakwe vose ekalaga Yelusalemu. Mazuwa yose nawandanya na seuta aho ho ludyo.