1 Daudi andaga na mwana kike mndele andaga ni lumbudye dya Abisalomu. Uyo andaga lumbudye dya Amnoni mwana mtala, uyo Amnoni amuungisaga. 2 Amnoni asulumilaga vitendese na kuketenda mnyonge kwaajili ya lumbudye Tamali na viya Tamali andile mwali na mazanga, naho neioneka kugamba mbuli iyo heikudahika kwa Amnoni kudamanya chochose. 3 Mna Amnoni andaga na mbwiyaye etangwagwa Yonadabu mwana Shamu, nduguye Daudi. Yonadabu andaga mnt'hu mbala vitendese. 4 Yonadabu niyo amgamba Amnoni, "Weye ni mwana seuta, nii wanyala naho waoneka huna kinyemi kila zuwa? Nii hukuunga kunigambila." Amnoni niyo amgamba, "Namuungisa Tamali, lumbudye dya ndugu yangu Abisalomu."

5 Yonadabu niyo amgamba, "Weye kegoneze ho lusazi uketende enga mnyonge. Iso akeza kukusinya, weye mlombeze umgambe, ‘Mlekele lumbudyangu Tamali anigaile mkate nidye, naho anambikile nk'hande akajika anank'hize.’ " 6 Ivo, Amnoni niyo agendeela kugona mwo lusazi, akaketenda mnyonge. Seuta eze aite kokumkaula, Amnoni amgambaga, "Nakulombeza Tamali eze aha anidamanyile mikate migeke uku hamsinya. Naho yehe mwenye anank'hize."

7 Ivo Daudi atumaga wegala ulosi kwa Tamali kugamba "Aite kwa mkuluwe Amnoni akamdamanyile nk'hande." 8 Tamali niyo aita, na kumbwila Amnoni kagona. Niyo aguha unga, na kudamanya mikate akanda na Amnoni. 9 Mikate iyo ize yajike, Tamali niyo aiyokola kulawa mwe nyungu. Na kumwigaila Amnoni, mna Amnoni alemelaga ukudya, akagamba kila yumwenga afose kuse, niyo wose wahalawa. 10 Niyo Amnoni amgambila Tamali, "Haluse nigaile mikate iyo kwe chumba changu, niyo wanank'hiza." Tamali niyo aiguha mikate iyo na kuigala kwe chumba cha mkuluwe Amnoni. 11 Aho akanda amwink'ha mikate iyo, Amnoni amgwilaga na kumgamba, "Soo kigonanye!"

12 Tamali niyo amgamba, "Bule." "Usekunitigiza. Mbuli ino heikudamanywa mwe isi ino ya Izilaeli. Usekudamanya mbuli ino ya uhezi! 13 Miye nenikefisehi ne zisoni izi! Naho weye, nounde yumwenga ywa wahezi mwe Izilaeli. Miye nakulombeza ulonge na seuta kwaviya haakulemeze usekunilomba." 14 Mna Amnoni haungile kumtegeleza na kwaviya amhumaga ludole niyo agenda naye kwa kumkakalisa.

15 Niyo, Amnoni amwiihiya Tamali vitendese, kujink'ha hadya nk'hongo amuungisaga. Na kumgamba Tamali, "Halawe aha haluse ivi."

16 Tamali niyo amhitula, "Bule mkulu, mbuli ino ya kunigulusa ihisa vitendese kujink'ha idya unidamanyile."

Mna Amnoni haungaga kumtegeleza, 17 Amwitangaga mndima ywakwe, akamgamba, "Mhause mvele oyu aha. Naho ulwivi luvugale ne didanga!" 18 Amnoni na yudya mndima ywakwe wamhausaga na kuvugala ulwivi ne didanga. Tamali andaga kavala valo tali dina mikono mitali enga ivo wakuvala wali na mazanga mwo lupisi lwa seuta. 19 Ivo, Tamali akehakaga maivu mwo mtwi, na kuditatula valo dyakwe, na kuika mikono yakwe mwo mtwi, niyo ahalawa uku akaila kwa izwi. 20 Mkuluwe Abisalomu eze amuone, amuuzaga, "Togola mkuluo Amnoni kagona na weye? Lumbu dyangu nyamala. Uyo ni mkuluo du. Usekufanyanya mbuli iyo mwo moyo wako." Ivo Tamali ekalaga mwe nyumba ya Abisalomu akanda na kinyulu. 21 Seuta Daudi eze eve mbuli iyo aihiyagwa vitendese. 22 Abisalomu amwiihiyaga Amnoni vitendese hata kulonga naye, kwaviya amkakalisaga lumbudye Tamali na kugona naye.

23 Umwo miyaka miidi ize yomboke, Abisalomu andaga na ndima ya kuzikant'ha ngoto zakwe mazoya mwo mzi wa Baal Hasoli, hagihi no mzi wa Ifulaimu. Awalalikaga wana wose wa seuta. 24 Abisalomu amwitilaga seuta Daudi, akamgamba, "Kaula miye mndima ywako nnanawo want'hu wakukant'ha ngoto mazoya. Nakulombeza weye seuta na wandima wako, kiitanye hamwenga na miye, mndima ywako?"

25 Seuta niyo amhitula, "Bule, mwanangu, sema kina kuzamile." Mna Abisalomu agendeelaga kumlombeza ise, seuta naye alemelaga, mna amvikilaga.

26 Niyo Abisalomu amgamba, "Uneva howiite, haya mlekele ndugu yangu Amnoni kiite hamwenga?" Seuta niyo amhitula,

"Mna nii aite hamwenga na nyuwe?" 27 Mna Abisalomu niyo akombekesa kumlombeza, niyo seuta amlekela Amnoni na wanawe wiite kwe kinyemi icho. 28 Abisalomu niyo awagamba wandima wakwe, "Mkauliseni Amnoni umwo anakolwa na kunda na kinyemi. Aho neniwagambe, ‘Mtoeni Amnoni naho mkomeni.’ Iyo ni sigilizi yangu kwenyu. Kenk'heni ludole naho mnde wadahi!" 29 Ivo wandima wa Abisalomu wamtendelaga Amnoni enga ivo wasigiilwe ni seuta, na kila yumwenga niyo akwela mwe mp'hunda falasi yakwe na kuguluka.

30 Umwo wandaga mwe sila, Daudi evaga kugamba wanawe wose wakomigwa ni Abisalomu hehali hata yumwenga asigale. 31 Seuta Daudi niyo enuka, akatatula mavalo yakwe kwa kinyulu na kugona hasi. Hata wandima wakwe we hagihi nae watatulaga mavalo yawe. 32 Mna Yonadabu, mwana ywa Shemea, nduguye Daudi niyo amgamba, "Zumbe ywangu, usekugamba wanawo wose wakomigwa. Amnoni yehe ekedu niye akomigwe. Abisalomu ayamanyaga aya kukongela hadya agendaga na lumbudye Tamali. 33 Ivo, zumbe ywangu, usekufanyanya mwo moyo wako kugamba wanawo wose wakomigwa. Ni Amnoni du akomigwe."

34 Mna Abisalomu andaga kanyilika kale. Na mndima andile na wamizi, aonaga fyo kulu dya want'hu wakwiza kulawa kwo mnima mwe sila ya Holonaimu. 35 Yonadabu niyo amgamba Daudi, "Seuta kaula, wanawo weza enga ivo hugambile miye mndima ywako." 36 Yudya mndima eze ajike kulonga, wana we kilume wa seuta niyo wengila na kukonga kuila kwa izwi kulu, seuta na wandima wakwe wose niyo waila kwa usungu.

37 Mna Abisalomu niyo agulukila kwa Talimai mwana ywa Amihudi, seuta ywa mzi wa Geshuli. Daudi niyo amuhongezela mwanawe kwa mazuwa mengi. 38 Abisolomu anyilikilaga kwo mzi wa Geshuli, na kwikala uko kwa miyaka mitatu. 39 Seuta Daudi eze ajike kuhongeza ndilo ya mwanawe Amnoni, andaga na nkw'hina ya kumuwona mwanawe Abisalomu.