1 Mbuli izo zize zajike, Daudi nakamlombeza Zumbe, akagamba, "Togola, nikwele niite mwe mzi umwenga mwe mizi ya Yuda?" Mnungu niyo amgamba ita! Daudi niyo amuuza, "niite mzi uhi?" Mnungu niyo amhitula. "ita mwe mzi wa Hebuloni?" 2 Ivo, Daudi nakakwela Hebuloni, hamwenga na wakaziwe waidi, Ahinoamu kulawa mwo mzi wa Yezileeli, na Abigaili, afiilwe ni mgosiwe, kulawa mwe mzi wa Kalmeli. 3 Nakawaguha want'hu wakwe, kila mnt'hu akanda na mp'huga yakwe, na woho watenda wikazi mnk'handa mwe mizi indile mnk'handa mwe Hebuloni. 4 Want'hu wa Yuda nawaita kwa Daudi uko Hebuloni wakamhaka mavuta ande seuta ywawe. Daudi eze eve kugamba want'hu wa Yabeshi uko Gileadi ni woho wammosele msanga Sauli, 5 nakawasigila want'hu uko Yabeshi Gileadi, "Zumbe awavike kwaviya mlagisa lukunde lwenyu kwa Sauli mkulu wenyu, kwa kummosela msanga. 6 Haluse, Mnungu awatendele yedi na kunda mhuwilwa kwenyu. Miye name neniwatendele yedi kwaviya nyuwe nomtenda yedi. 7 Mna mnde mtogile na wahumi. Sauli seuta ywenyu kabanika, na want'hu wa Yuda wanisagulaga na kunikumba mavuta ninde seuta ywawe."

8 Abineli mwana ywa Neli, mkulu wa watowani wa Sauli nakanda kamguha Ishibosheti mwana wa Sauli na kumwigala uko Mahanaimu. 9 Uko, Abineli kasagulwa Ishibosheti kunda seuta ywa isi ya Gileadi na Asilia na Yezileeli na Ifulaimu na Benjamini na Izilaeli yose. 10 Ishibosheti nakanda na miyaka milongo mine eze akonge kuilongoza Izilaeli, na yehe nakailongoza kwa miyaka miidi. Mna kabila dya Yuda nawanda seuta Daudi. 11 Daudi nakanda seuta wa Yuda uko Hebuloni kwa lupisi lwa miyaka mfungate na nusu.

12 Abineli mwana ywa Neli, hamwenga na wakulu wa Ishibosheti, mwana wa Sauli, nawahauka Mahanaimu na kuita Gibeoni. 13 Yoabu mwana Seluya na wandima watuhu wa Daudi, nawafosa wadugane na Abineli na want'hu wandaga nawo uko kwe dikawa uko Gibeoni. Fyo dimwenga nt'hendelo imwenga ye dikawa, fyo dituhu nadyo dituhu nadyo nt'hendelo ya kaidi ye dikawa. 14 Abineli niyo amgamba Yoabu, "Walekele wabwanga watoane ha meso yetu." Yoabu niyo ahitula, "Haya." 15 Wabwanga mlongo na waidi wa Ishibosheti mwana Sauli kulawa kwe kabila dya Benjamini niyo wasagulwa niyo naho wabwanga mlongo na waidi kulawa kwa Daudi nawo niyo wasagulwa. 16 Kila yumwenga nakamgwila mnk'hondo ywakwe mwo mtwi, niyo watungana sime, ivo wose waidi wagwa hasi niyo wabanika. Ivo, hant'hu aho hetangwa Hekiti Hazulimu. Hant'hu aho heaho uko Gibeoni.

17 Nk'hondo iyo yakulisaga zuwa diya, naye Abineli niyo ahumwa, na want'hu wa Izilaeli, ha meso ya wandima wa Daudi. 18 Na wana watatu wa Seluya nawanda uko, Yoabu na Abishai na Asaheli. Naho uyo Asaheli nakagulukisa enga nt'wika. 19 Naye Asaheli kamtimila Abineli, na mwo kuwita kwakwe hahitukile mkono wa kulume hegu kumoso mwe kumtimila Abineli. 20 Ivo Abineli niyo akaula kunyuma yakwe, akagamba, "Ni weye Asaheli?" Niyo yehe ahitula, "Heiye ni miye." 21 Ivo Abineli niyo amgambila, hituka mkono wa kulume hegu kumoso, ukamtoze yumwenga mwa wabwanga, uguhe vitoanilo vakwe. Mna Asheli hazumile kuhituka na kuleka kumtimila. 22 Niho naho Abineli amgamba Asaheli, "Usekunitimila, hukomelei? Togola nenidahe vivihi kumkaula Yoabu nduguyo?" 23 Mna Asaheli halekaga kumgulusa, ivo Abimeli amjungaga Asaheli mwe zinda zakwe no mjungo wakwe kwa kunyuma niyo mjungo walawanya kwo mgongo. Asaheli agwaga ahadya niyo abanika, niyo kila mnt'hu akimalaga na kwehelwa eze abule hadya agweelaga Asaheli na kubanika. 24 Mna Yoabu na Abishai wakamtimila Abineli na umwo zuwa dyandaga dikaswa weze wabule kwo lugulu lwa Ama, kuita Gia, mwe sila ikuhinga kwe dijangwa dya Gibeoni. 25 Want'hu we dikabila dya Benjamini wakeduganya hamwenga mwa Abineli, wakanda bunga dimwenga wakakimala mnanga mwo lugulu. 26 Niho uyu Abineli amwitanga Yoabu, niyo agamba, "Togola nekigendeele kutowana mazua yose? Humanyize kugamba kulongole hukunde kwedi? Ni ini nouwagambe want'hu wako waleke kukikulumbuza?"

27 Yoabu naye niyo ahitula, nakelisa kwa Zumbe Mnungu, "Uneva hwalongile, want'hu hegu nawagendeela kuwagulusa want'hu wa seuta ywawe hegu hawalekile mpaka mtondo."

28 Ivo Yoabu niyo atoa gunda, na want'hu wose niyo wakimala, hawatimile Izilaeli, naho hawatoane. 29 Kilo icho chose Abineli na watowani wakwe wombokelaga Alaba na kudendeluka mto Yolodani, wakagenddeela komboka Bitoli yose mpaka Mahanaimu.

30 Niyo Yoabu auya kwo kumtimila Abineli, na eze ajike kuwaduganya watowani wakwe wose hamwenga, mwa awo wandima wa Daudi nawahungukilwa ni watowani mlongo na kenda hamwenga na Asaheli. 31 Mna watowani wa Daudi wawakomaga want'hu magana matatu na mtandatu wa Benjamini, awo wandaga na Abineli. 32 Woho nawo niyo wenula kimba cha Asaheli, wakammosela msanga hagihi na kikuta cha ise uko Betelehemu. Yoabu na want'hu wakwe niyo waita ikiya ikilo, niyo kwawacheela uko Hebuloni.