1 Mwo kwajika mbuli iyo, Abisalomu akeikilaga magali yakugendezwa ne zifalasi na want'hu milongo mishano wakumlongoela. 2 Abisalomu azoelaga kwinuka mtondo na kuita kukimala he sila ikuhinga kwe nk'hili yo mzi. mnt'hu yeyose mta malongelezo ayo akuunga kumwigaila seuta vileke apate ulamuzi, Abisalomu amwitangaga hank'handa mnt'hu uyo na kumuuza, "Walawa mzi wani?" Uneva mnt'hu uyo analonga kalawa mzi mtuhu we dikabila dya Izilaeli, 3 Abisalomu naamgambe, "Malongelezo yako ni ya kindedi. Mna hahali mnt'hu yeyose akuunga akutegeleze." 4 Naho, Abisalomu naamgambe, "Uneva miye nandile mlamuzi ywa Izilaeli! Kila mnt'hu mta malongelezo hegu masa naakeza kwangu, na miye nehimwink'ha uwagilwa wakwe." 5 Akajika ayo, Abisalomu aumkumbatila na kumnonela mnt'hu yeyose ezile kumfunamizila mtwi wakwe hasi kwa kumtunya. 6 Ivo, nivo Abisalomu awatendile want'hu wose wa Izilaeli wezaga kuunga ulamuzi wa seuta. Kwa kudamanya ivo, Abisalomu aungisagwa ni Waizilaeli.

7 Miyaka mine ize yomboke, Abisalomu amgambaga seuta, "Nakulombeza unilekele niite uko Hebuloni vileke nikint'hize kilapi changu icho namwikilaga Zumbe Mnungu, 8 kwaviya miye mndima ywako, umwo nekalaga kudya Geshuli mwe Asilia, nakelisilaga kwa Zumbe Mnungu hagamba uneva Zumbe Mnungu naanivuze mwo mzi wa Yelusalemu nenimvike yehe."

9 Seuta niyo amgamba, "Haya ita kwa utondowazi." Abisalomu niyo ahalawa kuita Hebuloni. 10 Mna Abisalomu atumaga wegala ulosi kwa kinyele mwe makabila yose ya Izilaeli, "Aaho nomwiive izwi dya gunda, gambeni, ‘Abisalomu niye seuta ywa Hebuloni!’ " 11 Abisalomu eze aite uko Hebuloni, aitaga na want'hu magana maidi awo awalalikaga kulawa Yelusalemu, woho nawo waitaga uko kwa wedi, naho hawamanyaga chochose mwo mzungu wa Abisalomu. 12 Aho Abisalomu andaga akalava nt'hambiko, atumaga wegala ulosi mwo mzi wa Gilo kumwitanga Ahitofeli uyo Mgilo, andaga mlangilizi wa seuta Daudi. Kusaguka kwa Abisalomu watendesaga na udahi wa want'hu andaga nawo wakatenda kugenyela.

13 Mwigala ulosi aitaga kwa Daudi niyo amgamba, "Want'hu wa Izilaeli wamuunga Abisalomu."

14 Ivo, Daudi niyo awagamba wakulu wa watowani wakwe andaga nawo uko Yelusalemu, "Inukeni kisunguze kuhalawa, vituhu vakwe hekidahe kumnyilika Abisalomu. Kikombeke sema anasunguze kwiza na kukikoma suwe na kila mnt'hu mwo mzi!"

15 Mna wandima wakwe niyo wamgamba, "Suwe wandima wako mkulu ywetu, kikeika lumwe kwa dyodyose noukigambile kidamanye." 16 Ivo, seuta niyo ahalawa na want'hu wakwe, mna niyo awaleka wawele mlongo vileke wadamanye ndima za mwe nyumba.

17 Seuta niyo ahalawa na want'hu wakwe wose, weze wabule mwe nyumba yo uheelo mwo mzi uwo waikaga nt'hulwe. 18 Wandima wose wa seuta, Wakeleti wose hamwenga na Wagati magana mtandatu wamtimile seuta Daudi kulawa mwo mzi wa Gati, wahalawaga hamwenga naye wakamtongela. 19 Niyo, seuta Daudi eze amuone Itai uyo Mgiti, amgambaga, "Nii hata weye kulongozana hamwenga na suwe? Uya wikale na seuta Abisalomu. Kwaviya weye ni mta kwiza uku, naho ni mnt'hu alawile kwawe. 20 Weye kwiza zuzi du aha. Togola houtende mnt'hu ywa kwangadika hamwenga na suwe, handa himanyize kudya huwita? Uya kwe kaya hamwenga na wanduguzo. Naye Zumbe Mnungu akulagise uwedi na uhuwilwa wakwe."

21 Mna Itai niyo amhitula seuta, "Enga ivo Mnungu eli mgima na ivo eli mgima seuta ywetu, hohose aho nowiite, ikanda kubanika hegu mgima, na miye mndima ywako neninde aaho."

22 Ivo, Daudi niyo amgamba Itai, "Haluse longola." Ivo Itai uyo Mgiti niyo aita hamwenga na wanawe. 23 Daudi umwo akomboka hamwenga na want'hu wakwe, want'hu wose mwe isi nawakaila kwa izwi. Seuta Daudi ombokaga mwe kazuto ka Kidiloni hamwenga na want'hu wakwe kuhinga kwe dijangwa.

24 Mlavant'hambiko Abiatali niyo afosa, hamwenga na mlavant'hambiko Sadoki hamwenga na Walawi wose uku wakenula Disanduku dye Ndagano dya Mnungu, na kudiika hasi mpaka want'hu wose weze womboke kulawa mwo mzi wa Yelusalemu. 25 Niyo seuta amgamba Sadoki, "Divuze Disanduku dye Ndagano dya Mnungu mwo mzi wa Yelusalemu. Uneva nazumilwa ha Mnungu haheina wogohi, naanivuze nidione naho Disanduku dya Ndagano na kuona hant'hu aho dikwikala. 26 Mna inanda Zumbe Mnungu hakuwaagilwa na miye, miye hizumila anitende dyodyose idyo akuunga." 27 Seuta Daudi niyo naho amgamba Sadoki, "Tegeleza, mguhe mwanawo Ahimaasi na Yonasani mwana Amitai muuye kaya kwa utondowazi. 28 Mna neninde hagoja mwo mdando uko kwe nyika, mpaka aho neniive mbuli kulawa kwako." 29 Kwaivo Sadoki na Abitai nawavuza Disanduku dya Ndagano dya Mnungu mwo mzi wa Yelusalemu, na kwikala uumwo.

30 Mna Daudi agendeelaga kukwela mwo mnima wa Mizeituni uku akaila, haheina vilatu uku mtwi wakwe ugubikwe. Hata want'hu wose andile nawo nawagubika mitwi yawe wakakwela mnima uku wakaila. 31 Mwo lupisi ulwo Daudi agambilagwa kugamba hata Ahitofeli andaga yumwenga wa wank'hondo awo wakelunganyaga na Abisalomu. Mna Daudi niyo alombeza akagamba, "Weye Zumbe nakulombeza uutende mzungu wa Ahitofeli usekukint'ha!"

32 Daudi eze abule mwo lunenengwa lwo mnima, hant'hu ha kumvika Mnungu, mnt'hu yumwenga zina dyakwe Hushai kulawa Aki ezaga vileke amsingile, mavalo yakwe yakanda yatatuka na mwo mtwi wakwe kuna luvumbi. 33 Daudi niyo amgamba, "Unaita hamwenga na miye, nounde enga nt'wika kwangu. 34 Mna uneva nouuye mwo mzi wa Yelusalemu na kumgamba Abisalomu kugamba, nounde mndima ywakwe, weye seuta enga ivo nandile mndima wa iso aho nk'hongo, ivo nounde kunambiza kwa kuutenda mzungu wa Ahitofeli usekukint'ha, 35 walavant'hambiko Sadoki na Abiatali weyaho hamwenga na weye mwo mzi, ivo chochose nowive, wagambile walavant'hambiko Sadoki na Abiatali. 36 Kaula, wana wawe waidi wa kilume weyaho. Ahimaasi mwana Sadoki na Yonatani mwana Abiatali we hamwenga na weye, na chochose nomkiive nouwasigiile weze wanigambile."

37 Ivo, Hushai mbwiyaye dya seuta Daudi, niyo auya mwo mzi naho mwo lupisi ulo Abisalomu akengila mwo mzi wa Yelusalemu.