1 Daudi eze ajink'he holunenengwa lwo mnima, Siba uyo mndima ywa Mefibosheti amsingilaga Daudi akanda na mp'hunda mbili izo zinule mikate magana maidi, vikwanya gana va zabibu zinyaile na matunda gana yahomoke na shupa imemile divai. 2 Seuta Daudi niyo amuuza Siba, "Nii kwigala vint'hu ivi?" Siba niyo amhitula, "Mp'hunda ni kwaajili ya want'hu wako, na mikate na matunda ni kwaajili ya wabwanga wako wose, na divai ni kwaajili ya wadya nawasokelese mwe dijangwa."

3 Seuta niyo amuuza, "Mefibosheti mwana ywa mkulu ywako ekuhi?" Siba niyo amgamba seuta,

"Yehe kasigala Yelusalemu kwaviya afanyanya kugamba want'hu wa Izilaeli nawamvuzile useuta wa Sauli babakwe."

4 Seuta niyo amgamba Siba,

"Ivo yadya yandaga ugoli wa Mefibosheti haluse ni ugoli wako." Siba niyo amgamba, "Nivedi mkulu ywangu seuta, na miye naunga wedi hako mazuwa yose!"

5 Mwo lupisi Daudi eze abule Bahulimu, alailaga mnt'hu yumwenga ywa lukolo lwa Sauli, zina dyakwe etangwa Shimei mwana Gela, niyo akonga kumligita Daudi. 6 Shimei akongaga kumvigitila maiwe Daudi hamwenga na wakulu wakwe wa watowani, hata ivo seuta Daudi andaga kazunguluwa ni wakulu wa watowani na wamizi wakwe kulume na kumoso. 7 Shimei amligitaga Daudi akagamba, "Halawe aha, weye mnt'hu mkomi, mnt'hu hi kint'hu! 8 Zumbe Mnungu kakulihila kilapi kwaviya ya kuitila sakame yose ya want'hu wa Sauli, uwo haluse weye kuuguha useuta wakwe. Haluse Zumbe Mnungu kamwink'ha Abisalomu mwanawo. Kaula ubanangi ukupata kwaviya weye mkomi!"

9 Niho Abishai mwana Seluya, akamgamba seuta, "Nii kuli idi dibanike dikuligite mkulu? Nilekele niite na miye nenikant'he mtwi wakwe!"

10 Mna seuta niyo amgamba, "Togoleni kuna mbwai mwa miye na Seluya? Uneva Zumbe Mnungu kamgamba, Mligite Daudi, niani akudaha kuuza kugamba nii ukadamanya ivo?" 11 Naho seuta Daudi niyo amgamba Abishai na wandima wakwe wose, "Uneva mwanangu mwenye aunga anikome, togoleni hi kujink'ha ya mnt'hu we dikabila dya Benjamini? Nyuwe mlekeni aniligite kwaviya Zumbe Mnungu kamgamba aniligite. 12 Mafani Zumbe Mnungu naakaule makunt'ho yako, yehe naye niyo aniliha uwedi kwa ligito idi hupata dyelo." 13 Ivo seuta Daudi na want'hu wakwe wagendeelaga ne nt'hambo yawe uku Shimei akamtimila kunyuma na kumduila maiwe na kumyagila sanga seuta Daudi. Shimei andaga akagenda mwe diwandamo dyo mnima, mnk'handa na seuta Daudi. 14 Niyo seuta hamwenga na want'hu wakwe wandile hamwenga naye, wabula ho mto Yolodani wakanda wasokelesa. Ivo niyo waika nt'hulwe.

15 Mwo lupisi ulwo, Abisalomu na want'hu wakwe wose wa Izilaeli waitaga mwo mzi wa Yelusalemu hamwenga na Ahitofeli. 16 Hushai wo mzi wa Aliki mbwiyaye Daudi, amwitilaga Abisalomu, akamgamba, "Wikalise mazuwa yose seuta!"

17 Abisalomu niyo amuuza Hushai, "Togola, ulu nulo lukunde lwako kwa mbwiyayo Daudi? Nii huitile hamwenga na mbwiyayo?"

18 Hushai niyo amhitula, "Bule! Kwaviya yudya kasagulwa ni Zumbe Mnungu na want'hu awa hamwenga na want'hu wose wa Izilaeli, uyo niye neninde naye mazuwa yose. 19 Akajika ayo, togola ni yuhi nenimdamanyile ndima? Ivo, enga ivo nimdamanyile ndima iso nivo nohudamanyile weye."

20 Niho Abisalomu amgambaga Ahitofeli, "Nigambile kidamanyei?"

21 Ahitofeli niyo amgamba Abisalomu, "Gona na wawele wa iso awo awasaga wakaulage inyumba yakwe. Aho niho kila yumwenga mwe Izilaeli naamanye kugamba iso akuona kunda mnk'hondo ywakwe, ivo wose we hamwenga na weye nawpate ludole." 22 Ivo, want'hu niyo wamwikila Abisalomu hema kulanga kwe ditembe, naye niyo agona uuko na wawele wa ise, want'hu wose wa Izilaeli wakanda wakaula.

23 Zuwa idyo, ulangilizi wowose alavile Ahitofeli nounda enga ulavigwa ni Mnungu. Na ulangilizi wowose alavile Ahitofeli nouzumilwa ni Daudi na Abisalomu.