1 Ishibosheti mwana Sauli eze eve kugamba Abineli kakomigwa uko Hebuloni, engilaga chevu hamwenga na want'hu wose wa Izilaeli. 2 Ishibosheti mwana ywa Sauli, nakanda na want'hu waidi wendile vilongozi wa mwe vifyo va kutowa, yumwenga etangwagwa Baana, mtuhu naye ni Lekabu. Awo nawanda wana wa Limoni, mnt'hu wa kabila dya Benjamini kulawa mwo mzi wa Beeloti, ivo Beeloti nounda mzi wa kabila dya Benjamini, 3 kwaviya wakaya wa Beeloti nawanyilikila Gitaimu, naho wagendeela kwikala uko mpaka dyelo.

4 Yonasani mwana ywa Sauli andaga na mwana aholomp'hale iviga etangwagwa Mefibosheti. Umwo umwana uyo andaga na miyaka mishano Sauli na Yonasani wakomagwa uko kwe nk'hondo. Umwo mbuli izi ze file ya Yonasani na Sauli zize zivike kulawa Yezilaeli, malela ywa Meshibosheti amwinulaga umwana uyo na kuguluka naye mna umwo andile akagulukisa agwaga niyo iviga vo mwana uyo vavunika.

5 Lekabu na Baana wana Limoni Mbeeloti niyo waita kwe kaya ya Ishibosheti. Nawabula nomsi uko, Ishibosheti akanda kahumula kwe kaya yakwe. 6 Niyo wengila kwe kaya, enga waunga waguhe ngano, wambwiilaga Ishibosheti kagona mwo lusazi mndani mwe chumba chakwe, wamjungaga mjungo mwe zinda na kumkoma. 7 Wamk'hanta mtwi wakwe na kuita nawo, wombokelaga sila ya Alaba, wakagenda kilo na msi. 8 Niyo wamwigaila Daudi umtwi wa Ishibosheti uko Hebuloni, wakamgamba, "Seuta, kaula uno nu mtwi wa Ishibosheti, mwana Sauli mnk'hondo ywako, auzungulaga wikazi wako. Dielo ino Zumbe Mnungu kakulihizila, kwa Sauli na welekwa wakwe."

9 Mna Daudi niyo amhitula Lekabu na Baana nduguye, wana wa Limoni Mbeeloti, "Nakelisa kwa Zumbe mta udahi, yehe kanamila wikazi wangu kulawa mwe kila mnk'hondo! 10 Yudya mnt'hu ezile kunigambila kugamba Sauli kabanika, akafanyanya kugamba anigaila mbuli yedi, nehimgwila na kumkoma uko Sigilaga. Idyo nidyo digeleko nimwink'hile kwo ulosi uwo anigaile. 11 Togola, mnt'hu mwiihi anamkoma mnt'hu heena masa akanda mwo lusazi kwe kaya yakwe, togola hiyo vedi kulihiza kwajili ya kumkomela hale?" 12 Daudi awalagizaga watowani wakwe, nawo niyo wawakoma Lekabu na Baana. Na kuwakant'ha mikono yawe ne iviga vawe. niyo waihweleza mwe miti mnk'handa mwe dikawa uko Hebuloni. Mna nawaguha mtwi wa Ishibosheti na kuumosela msanga mwe kikuta cha Abineli uko Hebuloni.