1 Umwo seuta Daudi akanda akekala mwe nyumba yakwe yo useuta, Mnungu naye nakamwink'ha udahi kunda na utondowazi na wank'hondo wakwe kila hant'hu, 2 Seuta Daudi niyo amgamba Muwona Nasani, "Miye nekala mwe nyumba izengigwe kwa maziti ya mibani, mna Sanduku dya Mnungu dyekala mwe dihema!"

3 Nasani niyo amgamba seuta, "Ita ukadamanye chochose kiya ukufanyanya mwo moyo wako, kwaviya Mnungu ehamwenga na weye." 4 Mna kilo ikiya niyo Mnungu amgmbaga Nasani, 5 "Ita ukamgambe mndima ywangu Daudi, kugamba, ‘Togola, ni weye nounizengele nyumba ya kwikala? 6 Kukongela zuwa dia niwalavile Waizilaeli mwe Isi ya Misili mpaka ivi dyelo hiikale mwe nyumba. Higenda kila hant'hu handa nekala mwe dihema. 7 Togola, kila hant'hu aho nigendile na Waizilaeli wose nehimuuza kilongozi yeyose ywa Izilaeli yudya nimsigiile kugamba awadime want'hu wa Izilaeli, nii hunizengele nyumba ya miti ya mibani.’

8 "Kwa ivo, mgambe mndima ywangu Daudi. Zumbe Mnungu mta udahi agamba, ‘Nehikulava uko noukadima zingoto vileke unde kilongozi ywa want'hu wangu Izilaeli. 9 Kukongela lupisi ulo nehinda hamwenga na weye kokose uko uitile nehiwakoma wank'hondo wako wose hako. Nohutende kunda mkulu enga wakulu watuhu mwe isi. 10 Name neniwasaguile want'hu wangu wa Izilaeli hant'hu ho kwikala, vileke wekale hant'hu hawo kwa utondowazi. Na awo want'hu waihile wakutimila udahi wawe hawadahe naho enga aho nk'hongo, 11 nakulagana kukudima na wank'hondo wako naho nohwink'he welekwa. 12 Naho ukeza kubanika na kuumoselwa msanga hamwenga wakale wako nenimtende yumwenga mwa wanao we kilume kunda seuta naho useuta wakwe unde na ludole. 13 Yehe niye naazenge miye nyumba naho neniutende useuta wakwe unde wa mazuwa yose. 14 Miye neninde ise, naye naande mwanangu. Akadamanya yaihile, nenimvuze enga ivo want'hu wakuvuza mwanawe kwa ngoda. 15 Mna heniwausile uwedi wangu enga viya niusile kwa Sauli, nimhause hako. 16 Mp'huga yako na useuta wako nevikale mazuwa yose. Ukulu wako nounde na ludole mazuwa yose.’ "

17 Nasani nakamgambila Daudi kila kint'hu alagiswe mwe uwona uwo wa Mnungu.

18 Seuta Daudi engilaga mndani no kwikala ha Mnungu, no kulombeza akagamba, "Miye ne mp'huga yangu hakina uwagilwe wey ukibuze aha nili diyelo! 19 Naho mbuli ino neinda ndodo hako, Zumbe Mnungu, hamwenga na ayo kuwaikila mp'huga yangu mbuli nk'hulu mwe miaka mingi ikwiza, naho kunitenda niyaone ayo. 20 Miye name Daudi hugambilei naho? Kwaviya weye kummanya mndima ywako. 21 Viligane na kiya ulongile, naho viligane na viya ukuunga, kudamanya makulu ayo yose, vileke unihinize miye mndima ywako. 22 Weye Zumbe Mnungu niweye mkulu, kwaviya hakuli enga weye, naho hahali Mnungu mtuhu mna ni weye, kwaivo kivile suwe wenye. 23 Naho ni ani akwinga want'hu wako Izilaeli, Isi imwenga mwe si iyo Mnungu afosaga kugenda kuikombola kunda want'hu wakwe mwenye. Akedamanyilaga zina dyakwe na kudamanya vihungi vikulu na kweheela kwa kuwagulusa want'hu wa isi na milungu yawe kulongole kwa want'hu wako, awo uwakombole kulawa Misili. 24 Nawe kuwatenda want'hu wako Izilaeli watoge naho wande want'hu wako mazuwa yose, nawe Zumbe Mnungu kunda Mnungu ywawe.

25 "Haluse elo, Zumbe Mnungu yadya ulongile mwe mbuli ya mndima ywako, na mwe mbuli ya welekwa wangu yangu, uitende itoge mazuwa yose, udamanye enga ivo ulongile, 26 vileke zina dyako ditunywe kwa kugamba, ‘Zumbe mta udahi niye Mnungu ywa Waizilaeli. Naho nyumba ya mndima ywako, Daudi, neinde itogile hako.’ 27 Weye Zumbe Mnungu mta udahi, Mnungu ywa Izilaeli, kunitenda miye mndima ywako nimanye kagamba nohuzengele nyumba. Nivo vikuleka miye mndima ywako, hikeiva vedi mwo moyo nilombeza mbuli ino kwako.

28 "Ivo haluse, Zumbe Mnungu, weye ni weye Mnungu, na ulosi wako ni kindedi, weye nawe kumwikila mndima ywako mbuli ino iyedi, 29 ivo, haluse nakulombeza uzumile kuivikila inyumba ya mndima ywako, ipate kwikalisa mazuwa yose hako, kwaviya weye Zumbe Mnungu kulonga kugamba kwa uvikilwa wako nyumba ya mndima ywako neivikilwe mazuwa yose."