1 Mwo kwajika ayo seuta Nahashi Waamoli abanikaga, ivo mwanawe etangwagwa Hanuni niyo anda seuta hant'hu haise. 2 Seuta Daudi niyo agamba, "Nenimtendele uwedi Hanuni mwana Nahashi enga ivo ise anitendile." Ivo Daudi niyo asigiila want'hu wakamhani. Nawo wegala ulosi wa Daudi weze wabule mwe isi ya Waamoli, 3 wakulu wa Wamoli wamuuzaga seta ywawe Hanuni, "Togola, wafanyanya kugamba Daudi kwa kuwatuma awo want'hu vileke wakuhani kamtunya iso? Togola, Daudi hawatumile want'hu awa kwako wakaule na kuipelemba isi yako vileke waitahe?"

4 Ivo, Hanuni awagwilaga wegala ulosi awo wa Daudi na kummoga nt'hendelo imwenga ye kilevula chakwe, na kuyatatula mavalo yawe mpaka kwe zink'hailo, niyo awaleka wakeitile. 5 Daudi eze agambilwe mbuli iyo atumaga want'hu wakawasingile kwaviya waonaga soni vitendese. Ivo seuta niyo awagamba, "Ikaleni mwo mzi wa Yeliko, mpaka aho nezihote zindevu zenyu, niho nomuuye kaya."

6 Waamoni weze wamanye kugamba wanda wank'hondo wa Daudi, wawaguhaga watowani wa Wasilia alufu milongo miidi wakugenda, kulawa Bete Helobu na Soba, na watowani alufu mlongo na waidi kulawa Tobu na seuta Maaka akanda na watowani alufu imwenga. 7 Daudi naye eze eve mbuli izo, amtumaga Yoabu aite na watowani wose wadahi. 8 Waamoni wafosaga na kukepanga watowane nk'hondo mwe nk'hili zo mzi wa Laba, mzi wawe mkulu, Wasilia nao kulawa Soba na Lehobu na want'hu kulawa Toba na Maaka wakepangaga mwe nyika.

9 Yoabu naye eze aone nk'hondo imzunguluka, kulongole na kunyuma, awasagulaga watowani wadahi wa Izilaeli na kuwapanga watowane na Wasilia. 10 Wadya watowani wasigale awaikaga mwo ukimalizi wa nduguye Abishai, naye niyo awapanga watowane na Waamoni. 11 Yoabu amgambaga Abishai, "Uneva Wasilia wananihuma ludole nounambibize naho uneva Waamoni wanakuhuma, nenize hwambize. 12 Mna utoge! Kitowane kigosi kwaajili ya want'hu wetu na kwaajili ye mizi ya Mnungu ywetu, naye Zumbe Mnungu naakitendele yadya yakumwelela!"

13 Ivo, Yoabu na want'hu wakwe wagendaga kutowana na Waamoni, Wasilia niyo wanyilika. 14 Waamoni weze waone kugamba Wasilia wanyilika, woho nawo wamnyilikaga Abishai na kwingila mwo mzi. Yoabu niyo aleka kutowana na Waamoni, niyo auya Yelusalemu.

15 Mna Wasilia weze waone kugamba wahumigwa na Waizilaeli, wakeduganyaga hamwenga. 16 Hadadezeli alagizaga Wasilia wandile kwe nt'hendelo ya kaidi yo mto Efulate wegalwe uko Helamu wakalongozwa ni Shobaki mtowani mkulu ywe difyo dya Hadadezeli. 17 Daudi eze eve, awaduganyaga hamwenga Waizilaeli wose, niyo wadendeluka mto Yolodani na kuita mpaka Helamu. Wasilia nawo wakepangaga wakatowane nk'hondo na Daudi. 18 Mna Wasilia wanyilikaga ha Waizilaeli. Daudi awakomaga Wasilia magana mfungate wandaga wakagendeza magali ya nk'hondo, wakugendeza zifalasi alufu milongo mine, Naho amlumizaga Shobaki mkulu ywa watowani wawe, niyo abanika aaho. 19 Niyo maseuta wose wandaga wandima wa Hadadezeli weze waone kugamba wahumigwa ni Waizilaeli, wadamanyaga mwivano na Waizilaeli, woho nawo niyo wanda wandima wa Izilaeli, Ivo Wasilia hawagezaga naho kuwaambiza Waamoni.