1 Daudi amkemelaga wila Zumbe Mnungu ulosi uno mwe dizuwa diya Zumbe Mnungu amkombolaga mwo udahi wa wank'hondo wakwe wose na mwo udahi wa Sauli.

2 Zumbe Mnungu niye mwamizi ywangu,

ni unyilikilo wangu utogile.

3 Mnungu ywangu niye mwamizi ywangu

miye nakefisa kwakwe,

anamila miye enga nk'hindilo,

yehe ni mwamizi ywangu, na unyilikilo wangu.

Yehe niye myokozi ywangu.

anamila na kuniyokola kulawa mwa waihi.

4 Namwitanga Zumbe Mnungu awagilwe kutogolwa,

name nayokolwa kulawa mwa wank'hondo wangu,

5 Kwaviya mjubwaniso wa file wanizungulukaga,

malao ya ubanangi nayanigubika,

6 File nayo yanizilaga hagihi,

kikuta nekikanongola.

7 Mwe makunt'ho yangu nehimwitanga Zumbe Mnungu,

nehimwitanga Mnungu vileke anambize.

Umo mwe nyumba ya mviko adivaga diizwi dyangu,

anitegelezaga umwo haiila wambizi.

8 Aho isi niyo yazingiza na kusingisika,

mikola ya kwe mbingu niyo yazingiza,

kwaviya Mnungu engilaga maya.

9 Mosi wafunk'haga kulawa mwe zimp'hula zakwe,

moto ukoka walawaga mwo mnomo wakwe,

nk'hala zo moto zalawaga mwakwe.

10 Aupangaga ulanga niyo aseela hasi,

niyo kwanda na vunde dititihale hasi ye viga vakwe.

11 Akwelaga mnanga mwe kiumbwa kina mawawa

kikwitangwa kelubi niyo apuuluka,

ayeyaga enga dege mwo ulanga.

12 Akezungulusilaga ziza dititihale nt'hendelo zose,

ngubiko yakwe yandaga mavunde yazamile ya fula.

13 Lumwemwe lwamwekaga ha hakwe,

nk'hala za moto niyo zakim'puka.

14 Zumbe Mnungu ant'hint'hilaga kulawa kwe mbingu,

izwi dyakwe uyo ekulanga vitendese niyo dyevika.

15 Awalasaga wank'hondo misale niyo awazaganya,

na kuwatimula kwa lukuwa.

16 Zumbe Mnungu eze awativile,

kwa muye we zimp'hula zakwe,

mazi matali ye bahali nayagubulwa,

nk'hongelo ye isi niyo yaoneka.

17 Mnungu achululaga mkono wakwe kulawa kulanga,

aniguhaga kulawa mwa mazi mengi na kuniinula.

18 Aniyokolaga kulawa mwa wank'hondo wangu wata udahi,

aniyokolalaga mwa awo nawakaniihiya kwaviya wandaga na ludole lukulu lwa kunihuma.

19 Nawanikump'hukila umwo nandile na makunt'ho,

mna Zumbe Mnungu kanamila.

20 Aniguhaga na kunigala hant'hu haheina nk'humbizi,

aniyokolaga kwaviya nakaniungisa miye,

21 Zumbe Mnungu nakanigeleka viligane na uhuwilwa wangu,

aniamilaga miye kwaviya haina masa.

22 Kwaviya hitimila sila ya Zumbe Mnungu,

naho hikepagule na Mnungu ywangu kwa wiihi.

23 Hitoza sigilizi zakwe zose,

hilekile kutimila malagizo yakwe.

24 Kulongole kwakwe hina masa,

hikeamila nisekunda na masa.

25 Zumbe Mnungu kanigeleka kwaviya hina masa,

yehe kamanya uwedi wangu.

26 Weye umhuwilwa kwa wadya wahuwilwa,

uywedi kwa wadya weli wedi.

27 Weye wakelagisa huna masa kwa wadya heweina masa,

mna walagisa kuwaihia wadya waihi.

28 Weye wawayokola wajalamu,

mna wawakaula wata kuketunya na kuwaseleza.

29 E Zumbe Mnungu ni lumuli lwangu,

Mnungu ywangu ukuhausa ziza dyangu.

30 kwa wambizi wako wawatowa mafyo ya wank'hondo,

weye wanink'ha udahi wa kupuluka nk'handula zakwe.

31 Akudamanya Mnungu hakina lema

Ndagano ya Zumbe Mnungu ni ya kindedi.

32 Niani eli Mnungu uneva hiyo Zumbe Mnungu?

Niani eli luwe lwa kunyilikila vituhu vakwe ni Mnungu ywetu?

33 Mnungu uyu niye unyilikilo wangu utogile,

naho kaidamanya sila yangu inde heiina nk'huswank'huswa.

34 Katogeza viga vangu enga va nt'wika,

na kuniika vedi kulanga kwo lunenengwa.

35 Anihinyiza kutowana nk'hondo,

mikono yangu idahe kuvuta uta wa shaba.

36 Kunamila na kunikombola,

wambizi wako kuutenda mkulu.

37 Kuitenda sila yangu kunda na nk'uswank'huswa,

naho viga vangu haviteele.

38 Nihiwatimila wank'hondo wangu na kuwakoma,

hiuiye kunyuma mpaka aho nawakomile.

39 Nehiwakinya na kuwakoma wasekudaha kwinuka naho,

wagwagwa hasi ye viga vangu.

40 Weye wanink'haga udahi wa kutowana kwe nk'hondo,

wawaikaga wank'hondo wangu hasi yo udahi wangu.

41 Kuwatenda wank'hondo wangu wanyilike,

na wadya nawakaniihya nehiwakoma.

42 Wazungulaga wambizi mna hakwandaga namnt'hu wa kuwakombola,

wamwiilaga Mnungu mna hawahitule.

43 Nehiwahonda na kuwahondesa enga msanga we isi,

nehiwahonda na kuwajata enga nt'hope mwe sila.

44 Weye kuniyokola na makunt'ho ya want'hu wangu,

kunitenda kunda kilongozi ywe ziisi.

want'hu hiwa manyize nawanidamanyila ndima.

45 Wata kwiza naweza wakakeseleza,

weze weve mbuli zangu nawanizumila.

46 Wata kwiza nawengila chefu,

wezaga kulawa mwe magomela yawe wakazingiza.

47 Zumbe Mnungu mta udahi!

Atunywe mwamizi ywangu!

Atunywe Mnungu ywangu, unyilikilo wo uyokozi wangu.

48 Yehe kanitenda nidahe kuliha kilapi

na kuziika isi mwo udahi wangu.

49 Kanikombola kulawa mwa wank'hondo wangu.

Zumbe Mnungu, kunk'ha uhumi mwa wank'hondo wangu,

na kuniika hale mwa want'hu waihile.

50 Ivo nohutunye mwa want'hu wa isi nt'huhu,

nohukemele mila haditogola dizina dyako.

51 Mnungu amwink'haga uhumi mkulu seuta ywakwe,

na kumlagisa lukunde lwakwe kwa uyo amsagule,

Heiye, amwink'haga lukunde Daudi na welekwa wakwe mazuwa yose.