1 Niyo makabila yose ya Izilaeli yaita kwa Daudi uko Hebuloni niyo wamgamba, "Kaula, suwe ki welekwa wako. 2 Aho kale, Sauli eze ande seuta ywetu ni weye wawalongozaga Waizilaeli kwe nk'hondo, Mnungu naye akugambila kugamba nounde mdimi ywa want'hu wakwe awo Waizilaeli naho nounde kilongozi mkulu mwe Izilaeli." 3 Ivo, wadala wose wa Izilaeli wamwitila seuta Daudi uko Hebuloni, naye niyo adamanya Ndagano naye ha Mnungu, naho wamkumba Daudi mavuta ande seuta ywa Izilaeli. 4 Daudi nakanda na miyaka milongo mitatu akalongoza kwa lupisi lwa miyaka milongo mine. 5 Uko Hebuloni, nakawalongoza want'hu wa Yuda kwa miyaka mfungate na miezi mtandatu, na Yelusalemu nako nakawalongoza want'hu wa Izilaeli hamwenga na Yuda kwa miyaka milongo mitatu na nt'hatu.

6 Niyo seuta na watowani wakwe nawaita Yelusalemu wakatowane na Wayebusi wandile wakaya wa Isi iyo. Mna woho wamgambaga," Howingile mwo mzi uno, kwaviya mant'hunt'hu na waholomp'hale nawakugulusile hale." Nawamgambila ivo kwaviya nawakafanyanya kugamba Daudi haadahe kwingila mwo mzi uwo. 7 Hata ivo, seuta Daudi atahaga ink'hambi ya Sayuni, uwo nuwo mzi wa Daudi.

8 Zuwa idyo, Daudi agambaga, Mnt'hu yeyose naawatoe Wayebusi naombokele mwo mwina wa mazi vileke kuwatowa waholomp'hale na mant'hunt'hu awo moyo wangu ukuwaihiya. Nivo vikuleka want'hu wagamba, "Mant'hunt'hu na waholomp'hale hawengile mwe kaya."

9 Daudi nekekala mwe nkambi iyo, mzi uwo nao niyo awitanga, "Mzi wa Daudi." Daudi nakauzenga mzi kuuzunguluka, akakongela Milo kuhinga kundani. 10 Naye Daudi nakatendesa kunda mdahi, kwaviya Zumbe Mnungu nakamtenda ande mdahi.

11 Mna seuta Hilamu wa Tilo nakawasigila want'hu kwa Daudi, nakamwiigaila mielezi, wakusongola na wazesi awo wamzengelega Daudi inyumba ink'hulu. 12 Ivo, Daudi niyo atambula kugamba Zumbe Mnungu kamtenda ande seuta ywakwe kwaajili ya want'hu wa Izilaeli niyo aukuza useuta wakwe kwajili ya want'hu wakwe Izilaeli.

13 Daudi akeguhilaga wawele na wandima na wavele wengi wa uko kwe mzi wa Yelusalemu, ivo ajike kulawa Hebuloni. awo wamwelekela wana wengi wa kilume na wa kike. 14 Yakutimila ni mazina ya wana wa kilume na wakaziwe wamwelekele uko Yelusalemu. Shamua na Shobabu na Nasani na Selemani, 15 Ibahali na Elishua na Nefegi na Yafia, 16 Elishama na Eliyada na Elifeleti.

17 Wafilisiti weze weve kugamba Daudi kakumbigwa mavuta kunda seuta ywa Izilaeli, wose wafosaga kugenda kumzungula, mna yehe evaga imbuli iyo, niyo engila mndani mwe digomela. 18 Wafilisiti nawabula na kusambala mwe dikolongo dya Lefaimu. 19 Ivo, Daudi nakamuuza Zumbe Mnungu, "Togola niite hatowane na Wafilisiti? togola, nounink'he udahi wa kuwa huma?" Zumbe Mnungu naye niyo amgamba Daudi, "Ita, kwaviya nna kindedi kugamba nohwink'he udahi wa kuwahuma Wafilisiti."

20 Ivo, Daudi niyo abula Baali Pelasimu, na kuwahuma Wafilisiti niyo agamba, "Zumbe Mnungu mwa wank'hondo wangu nakanda enga mazi ya lawo." Kwaivo hant'hu aho niyo hetangwa Baali pelasimu. 21 Woho nawo niyo waleka milungu yawe uko, Daudi na want'hu wakwe waiduulaga hale.

22 Naho wakwelaga naho Wafilisiti na mpaka naho na kusambala mwe dikolongo dya Lefaimu. 23 Daudi eze amlombeze Mnungu, Mnungu niyo kamgamba, "Usekuwatoa kulaila aho wili, mna zunguluka na uwatoe kulongole ye miti ya mifolosadi. 24 Naho mneva zisindo mnanga mwe mifolosadi, aho mkeink'he ludole kwaviya neninde hifosa vileke hulongoele niwatowe watowani we Kifilisiti." 25 Daudi nakadamanya enga ivo Mnungu amsigile, naye niyo awatoa Wafilisiti kulawa Geba mpaka Gezeli.