1 Sauli eze ande kabanika kale, Daudi auyaga akanda kawahuma kale Waamaleki, niyo akwikala uko Sikilagi kwa lupisi lwa mazuwa maidi. 2 Mwe dizuwa dya katatu, mnt'hu yumwenga kulawa mwe nk'hambi ya Sauli, akanda kazitatula zisuke zakwe kwa usungu naho kakegela luvumbi kwo mtwi, ambasaga Daudi. Eze ambwiile, akedulaga hasi niyo afunamiza mtwi wakwe kwa kumtunya. 3 Daudi niyo amgamba, "Kulawahi?"

Uyo mnt'hu niyo amhitula, "Hinyilika mwe nk'hambi ya Izilaeli." 4 Niyo naho Daudi amuuza, "Kuna mbwai?"

Yudya mnt'hu niyo amhitula, "Want'hu wetu wanyilika kwe nk'hondo naho watowani wengi wakomigwa, mwa want'hu awo ni hamwenga na Sauli na mwanawe Yonasani." 5 Daudi niyo amuuza yudya mnt'hu, "Kumanya vivihi kugamba Sauli na mwanawe Yonasani wakomwa?"

6 Yudya mbwanga ahitulaga akagamba, "Miye nehinda kwo mnima wa Giliboa uko kwandile ne nk'hondo. Nehimuona Sauli kegamila mjungo wakwe naho magali yakwe ye wank'hondo yandaga hagihi naye. 7 Sauli eze asinye kunyuma, anionaga niyo anitanga, nize nitike, 8 aniuzaga kugamba ni miye ani, name niyo namgamba miye ni Mmaleki. 9 Aho niyo anigamba nimsogeele vileke hamkome! kwaviya kalumiziswa naho ehagihi na kubanika. 10 Ivo, nehimsogeela hagihi niyo namkoma, kwaviya nehimanya kugamba anagwa hasi naabanike du. Naho taji yandile mwo mtwi wakwe no mkowa wandile mwo mkono wakwe, vose hikwigaila weye zumbe ywangu."

11 Daudi hamwenga na want'hu wose andaga nawo wazitatulaga zisuke zawe kwa kulagisa kinyulu. 12 Wailaga na kuhongeza, naho wafungaga mpaka kisingi kwaajili ye file ya Sauli na Yonasani mwanawe, na Isi ya Waizilaeli awo want'hu wa Zumbe Mnungu, kwaviya wengi wawe nawakomigwa kwe nk'hondo.

13 Daudi niyo amuuza yudya mbwanga amgambile zimbuli, "Weye kulawa hii?" Yehe niyo ahitula, "Miye ni Mmaleki, mna nekala mwe isi yako enga mta kwiza."

14 Daudi niyo amuuza, "Neinda vivihi weye hwogohe kuchulula mkono wako na kumkoma mnt'hu asagulwe kwa ndima ya Zumbe Mnungu?" 15 Ivo Daudi amwitangaga yumwenga mwa want'hu wakwe niyo amgamba, "Mkome mnt'hu uyu!" Yudya mnt'hu amtowaga yudya Muamaleki niyo amkoma, 16 Daudi niyo amgamba, "Mbuli ino yako mwenye, kwaviya kulonga mwenye kugamba kumkoma mnt'hu asagulwe kwa ndima ya Zumbe Mnungu."

17 Ivo Daudi akemaga wila wa kuwahongezela Sauli na mwanawe Yonasani mahongezo aya, 18 enga ivo viwandikwe mwe kitabu cha Ashali kugamba, wana wa Yuda wahinizwe aya.

19 "Mwe vigulu va Izilaeli nuko wachinjilwe vilongozi wetu

Nivo wagwele wadahi wetu wa nk'hondo.

20 Msekuilonga imbuli ino mwo mzi wa Gati,

naho msekuwagambila mwe zisila za Ashekeloni

msekuwatenda wana kike wa Kifilisiti wakanga

naho msekuwatenda wana kike wa want'hu hewemmanyize Mnungu waone kinyemi.

21 Hokunde na fula hegu mnyuzu nouugwe mwe vigulu va Giliboa,

migunda yawe inde heeina kint'hu mazuwa yose.

Kwaviya uko niko nk'hindo yo mdahi igeligwe soni

naho nk'hindo ya Sauli heigendeele kukumbwa mavuta naho.

22 Kwa sakame ya awo wakomigwe na kwa vimba va awo wata ludole

Msale wa Yonasani hauwahonyaga wank'hondo,

naho sime ya Sauli hayatugaga.

23 Sauli na Yonasani, nawaungiswa vitendese.

wakanda mwe file na mwo ugima nawanda hamwenga,

Nawanda wahufu kujink'ha sumula,

kindedi, nawanda na ludole kujink'ha simba.

24 Nyuwe wana kike wa Izilaeli mwiileni sauli!

uyo awavalagani suke zink'hundu naho zikuwagila

naho awahambagani kwa mahambo ya zahabu.

25 Watowani wadahi wagwa,

wakomigwa kwe nk'hondo

Yonasani kakomelwa kwe vigulu.

26 Naona kinyulu kwajili yako weye Yonasani ndugu yangu

weye nehikuungisa

nokunda mbwiyangu ywa kwehela

ni wa kwehela kujink'ha lukunde lwa wavele.

27 Watowani wadahi wagwa,

naho vitoanilo vawe ve nk'hondo vibanangwa havina ndima."