1 Ivo, Wafilisiti nawatowana nk'hondo na Waizilaeli mwo mnimna Giboa na Waizilaeli wengi nawakomigwa uko mna Sauli na wanawe na Waizilaeli watuhu wanyilikaga. 2 Mna Wafilisiti wandaga wakamzungulisa Sauli na wanawe, niyo wawakoma Yonasani na Abinadamu na Malikishua awo wana Sauli. 3 Nk'hondo yatendesaga kwa Sauli. Wadya wakulasa ne misale weze wamuone wamlasaga niyo wamlumiza vihile. 4 Naho Sauli amgambaga mnt'hu enule vitowanilo, "Somola isime yako unikome, vileke want'hu awa hewevinilwe seka wakanikoma na kunibela." Mna uyo enule vitowanilo va Sauli haungile kwaviya nakogohesa. Ivo, Sauli aguhaga sime yakwe mwenye na kuketungiza mwenye. 5 Naho yudya enule vitowanilo eze akaule Sauli kabanika, na yehe niyo agweela sime yakwe, yehe naye niyo abanika 6 Ivo nivo Sauli abanike, na wanawe wa tatu, no mnt'hu enule vitowanilo hamwenga na want'hu wakwe wose mwe dizuwa idyo. 7 Na Waizilaeli wandile nt'hendelo ya kaidi ye dikolongo, na watuhu wandile ulailo wa zuwa yo mto Yolodani weze waone kugamba Waizilaeli wanyilika, Sauli naye na wanawe wabanika, wasamaga mwe mizi yawe niho Wafilisiti wagendaga kwikala mwe mizi iyo.

8 Luvi yakwe, Wafilisiti weze waite na kuguha vint'hu va wakomigwe nawabwiila vimba va Sauli na wanawe mwo mnima Giliboa. 9 Wakant'haga mtwi wa Sauli na kuviguha vint'hu vakwe, niyo wawasigiila wegala ulosi mwe isi yawe yose ya Filisiti wakabwelekeze mbuli yedi ye file ya Sauli mwe zinyumba za mahili yawe na kwa want'hu. 10 Viya vitowanilo nawaviika mwe zinyumba za Maashitaloti, niyo wahweelaza kimba chakwe mwo lukandula lwo mzi wa Beti Shani.

11 Mna wakaya wa mzi wa Yabeshi Gileadi, weze weve Wafilisiti ivo wamtendile Sauli,

12 watowani wadahi wose nawahalawa, na kugenda choo pwii, wauusaga kimba cha Sauli na vimba va wanawe kulawa mwo lukandula lwa Beti Shani, niyo weza navo mpaka Yabeshi na kuvoka. 13 Akajika, niyo waguha mavuha yawe na kuimosa msanga hasi yo mkwazu uko Yabeshi, woho nawo niyo wafunga kwa mazuwa mfungate.