1 Daudi niyo aita kwa mlavant'hambiko Ahimeleki uko Nobu. Ahimeleki afosaga amsingile akazingiza, na kumuuza, "Nii kwiza aha weye ukedu?"

2 Daudi niyo amwihitula, "Ni yaha viligane na ivo seuta alongile. Anigambaga nisekumgambila mnt'hu yeyose mwe mbuli idya anisigiile. Hilagana na want'hu wangu kugamba kibwilane hant'hu. 3 Togola una kint'hu chochose cho kudya? Nakulombeza mikate mishano hegu chochose kiyaho."

4 Mlava nt'hambiko Ahimeleki amgambaga, "Aha nna mikate heikudigwa ni mnt'hu yeyose. Mikate nnanayo ni idya mikate ikukile du. Mwadaha kwink'higwa mikate iyo ikanda want'hu wako hawagendile na wavele mwa mazua aya ya hagihi."

5 Daudi niyo amgamba mlavant'hambiko, "Ikindedi, umwo kikaita kwe nk'hondo wavele wandaga hale na suwe! Uneva want'hu wangu wakuka kikanda mwe ndima zizoelwe, togola hevinde vitendesa mwe ndima ino ikuungwa?"

6 Ivo mlavant'hambiko Ahimeleki niyo amwink'ha mikate iyo ikukile, kwaviya hakwandaga na mikate mituhu, yandaga ni iiyo du yaikagwa ha Zumbe Mnungu kwe Dihema dikukile, ivo niyo yasakanywa na mikate mihya kulawa kwe diziko.

7 Ivo mwe dizuwa idyo handaga na mndima ywa Sauli akuvika ha Zumbe Mnungu. Mndima uyo etangagwa Doegi kulawa Muedomu, kilongozi ywa wadimi wa Sauli.

8 Daudi niyo amgamba Ahimeleki, "Togola una sime hegu mjungo ukudaha kunink'ha? Kwaviya ndima za seuta zinitenda nisunguze kuhalawa, miye name nehihalawa haheina sime yangu hegu vitoanilo vovose."

9 Ahimeleki niyo amhitula, "nnanayo isime ya Mfilisiti Goliati uyo umkomile mwe dikolongo dya Ela, ikunyuma ye kizibau cha mlavant'hambiko inyinyigwe mwa kasodo. Uneva waunga uguhe haya guha kwaviya hahana sime nt'huhu." Daudi niyo amgamba, "Hahana sime enga iyo, nakulombeza unink'he."

10 Niyo Daudi akanda agendeela kumnyilika Sauli, na kuita kwa mlavant'hambiko Akishi ywa Gati. 11 Wandima wa seuta niyo wamgamba Akishi, "Uyu hiyo Daudi, seuta ywe isi ya Izilaeli? Togoleni hiyo uyu wakagambana mwo wila, ‘Sauli kakoma maelufu ya want'hu na Daudi kakoma milongo elufu ya want'hu?’"

12 Ulosi uwo wamtendaga Daudi ande na wengele, niyo amwogohesa seuta Akishi ywa Gati. 13 Ivo niyo aketendaga enga mkilalu, akakwangula kwangula mwa mwe zi nyivi naho malevu yakwe yandaga yaketika mwe zindevu zakwe. 14 Akishi niyo awagamba wandima wakwe, "Mmanya kugamba mnt'hu uyu mkilalu, nii mumleta kwangu? 15 Togoleni mnigaila mnt'hu uyu mkilalu kwaviya hina wakilalu aha? Hikumuunga mnt'hu uyu engile mwe nyumba yangu?"