1 Disanduku dye Ndagano dya Zumbe dyekalaga mwe isi ya Wafilisiti kwa miezi mfungate, 2 Wafilisiti wawetangaga walavant'hambiko na wagangana niyo wawauza, "Nekitende vivihi ne Disanduku dye Ndagano dya Zumbe? Nekidivuze vivihi aho dyandile?"

3 Woho niyo wahitula, "Uneva nomdivuze Disanduku dye Ndagano dya Mnungu ywa Izilaeli, mwaungwa mdivuze na malavo kwakwe, malavo ya masa yenyu. Disanduku dye Ndagano hadikuungwa kuuya haheina malavo kwa sila ino nomnde mhona naho nommanye nii nakawasulumizani."

4 Wafilisiti niyo wauza "Ni malavo yani ya masa kikuungigwa kimwigaile?"

Niyo wahitula, "Vihili vishano va zahabu vikale enga maihu na vihili vishano va zahabu vikale enga ngoso kila kimwenga kikamkimaila mkulu yumwenga ywa Wafilisiti kwaviya maihu yatumigwe kwenyu, nayatumigwa na kwa wakulu wenyu. 5 Mwaungwa mdamanye vihili vekale enga maihu na vihili vikale enga ngoso, vint'hu ivo nevikabananga isi yenyu pele, naho mmogohe Mnungu ywa Izilaeli. Mafani naaleke kuwasulumizani nyuwe ne milungu yenyu ne isi yenyu. 6 Nii mnde wank'hani? Enga Falao seuta ywa Misili na Wamisili ivo wandaga? Kumbukileni ivo Mnungu ambwalasaga mpaka aho Falao awalekelaga Wazilaeli wahalawe Misili. 7 Elo ikileni lumwe gali hya na ngombe mbili zeleke hezinati zivalwe kifungo, zifungeni izo mwe digali dikuvutwa ni zing'ombe niyo mwazivuza zindama zawe kwe didewa. 8 Guheni Disanduku dye Ndagano dya Zumbe niyo mwadigela mwe digali idyo, mnk'handa mwe Disanduku dye Ndagano ikeni viya vihili va zahabu mkumwigaila enga malavo ya kuusa masa yenyu, akajika dilekeni dikeitile. 9 Dikauliseni, uneva dyaita dikahinga kwo mzi wa Beshi Shemesi, ivo neinde kugamba ni Mnungu ywa Izilaeli akigaile makunt'ho aya yaihile. Mna uneva heditende ivo nekimanye kugamba hiyo yehe akigaile makunt'ho aya yaihile."

10 Nawatenda enga ivo wagambilwe, niyo waguha zingombe izo zimbili na kuzifunga mwe digali na kuvugaila zindama kwe didewa. 11 Nawagela Disanduku dye Ndagano dya Zumbe mwe digali hamwenga ne Ntangulu ine vihili va zahabu vikale enga ngoso na vikale enga maihu. 12 Ngombe ziya zakongaga kugenda mwe sila kuhinga Beti Shemesi, zagendaga haheina kuhituka kulume hegu kumoso uku zikaila sila yose. Wakulu washano wa Wafilisiti wazitimilaga uko mpaka kwe mihaka ya Beti Shemesi.

13 Want'hu wa Beti Shemesi wandaga wakavuna ngano mwe dikolongo, weze wakaule kudya waonaga Disanduku dye Ndagano dya Zumbe Mnugu niyo wanda na kinyemi kikulu. 14 Digali dyezaga kwo mgunda wa mnt'hu etangwagwa Yoshua uyo ekalaga Beti shemesi niyo dyakimala hadya hagihi no luwe lukulu, want'hu niyo wadibogozola diya digali na kuzichinja ziya zing'ombe na kuzoka enga malavo ya kokwa kwa Zumbe Mnugu. 15 Umwo dikanda dikei kubogozolwa Walawi, wadiselezaga Disanduku dye Ndagano dya Zumbe Mnungu ne nt'hangulu ine vihili via ve zahabu mndani, niyo waviika ho luwe lukulu. Want'hu wa Beti Shemesi walavaga malavo ya kokwa na malavo matuhu kwa Zumbe. 16 Wadya maseuta washano wa Wafilisiti wawaonaga wakadamanya ivo, weze wayaone ayo wauyaga uko Ekuloni mwe dizuwa iidyo.

17 Wafilisiti wegalaga vihili vishano va maihu kwa Zumbe enga malavo kwaajili ya masa yawe kamwenga kwaajili yo mzi wa Ashidodi, na katuhu kwaajili ya mzi wa Gaza na kamwenga kwaajili ya mzi wa Ashikeloni na katuhu kwaajili ya mzi wa Gati na katuhu kwaajili ya mzi wa Ekuloni. 18 Naho, wegalaga vihili va zahabu vikale enga ngoso, kamwenga kwa kila mzi wikailwe ni maseuta washano wa Wafilisiti, mizi yose izengelwe nk'handula ne zikaya hezizengelwe nk'handula. Diya diiwe dikulu mwo mgunda wa Yoshua uyo ekekalaga Beti Shemesi uko dyaikagwa Disanduku dye Ndagano dya Zumbe Mnungu, dikei aaho mpaka ivi dyelo kunda uwona kwa kiya chalailaga.

19 Zumbe Mnungu awakomaga want'hu milongo mfungate wo mzi wa Beti Shemesi kwaviya wasungilaga mndani mwe Disanduku dye Ndagano, want'hu wahongezaga kiya Zumbe atendaga.

20 Ivo want'hu wa Beti Shemesi niyo wauza, "Niani akudaha kukimala ho undiilo wa Zumbe Mnungu, uyu Zumbe Mnungu akukile? Haluse nekigalehi disanduku idi vileke dinde hale na suwe?" 21 Wegalaga wegala ulosi kwa want'hu wa Kiliati Yelimu, wakagamba, "Wafilisiti wadivuza Disanduku dye Ndagano dya Zumbe Mnungu, soni uku mdiguhe."