1 Niyo Samweli awagamba want'hu wa Izilaeli, "Hiyategeleza yose mnigambile, naho hiwenk'hani seuta awalongozeni. 2 Haluse mpata seuta kilongozi ywenyu, miye hidalahala naho nna fi na wanangu wa kilume we hamwenga na nyuwe. Nehinda kilongozi ywenyu kukongela ubwanga wangu mpaka ivi dielo. 3 Hikimala aha, uneva hidamanya kint'hu chochose kiihile longeni aha ha Zumbe Mnungu na seuta amsagule. Togoleni higuha ngo'mbe ya mnt'hu hegu ph'unda yakwe nehimtowa mnt'hu hegu kumgela soni yeyose? Hihokela kint'hu chochose cha soni kulawa kwa mnt'hu yoyose? Uneva hidamanya kint'hu chochose mwa aya nitambule nenilihe icho niguhile."

4 Want'hu niyo wahitula, "Bule, hukitendele vihile naho hukihujile naho hunati uhokele matundu ya soni kwa mnt'hu yeyose."

5 Samweli niyo ahitula, "Zumbe Mnungu na seuta asagulwe ni Zumbe, ni waona wangu dielo kugamba mniona kindedi miye hina masa."

Want'hu niyo wahitula, "Heiye muwona ywetu ni Zumbe."

6 Samweli agendeelaga, "Zumbe Mnungu niye awasagulaga Musa na Haluni, naho niye awalavaga wakale ywenyu kulawa mwe isi ya Misili. 7 Haluse kimaleni aho na miye neniwalagise kwa uwona hawakumbusani udamanyi mkulu wa Zumbe Mnungu uwo awadamanyileni nyuwe vileke awayokoleni nyuwe na wakale wenyu. 8 Umwo Yakobo na mp'huga yakwe weze waite Misili niyo Wamisili wawatendela mbuli ziihile wakale wenyu, wamwiihiyaga Zumbe kwa wambizi niyo yehe amtuma Musa na Haluni uyo awalavaga woho kulawa Misili niyo awatenda nyuwe mnde aha dielo. 9 Mna want'hu nawamjala Zumbe Mnungu ywawe na ivo nakawatenda Wafilisiti na seuta ywa Moabu na Sisela mkulu ywa watowani wo mzi wa Hazoli watowane na wakale wenyu niyo wawahuma. 10 Niyo wamwiila Zumbe Mnungu kwa wambizi wakagamba, ‘Kitenda wavu kwaviya kihituka niyo chakuleka weye Zumbe, niyo chaivika mahili ya Baali na Maashitaloti. Mna haluse nekikuvike weye wikedu, kiyokola kulawa kwa wank'hondo wetu.’ 11 Zumbe Mnungu naye awatumaga Gidioni, Balaki, Yefita na Samweli wawayokoleni nyuwe kulawa kwa wank'hondo wenyu awo wawazungulukagani, niyo mwekala kwa utondowazi. 12 Mna kwaviya nomkamwogoha seuta Nehashi ywa Waamoni, niyo mwanigamba, ‘Chaunga seuta akilongoze.’ Hata uneva Zumbe Mnungu ywenyu nakanda niye seuta ywenyu.

13 "Haluse seuta muungile ni uyo aha, Mwamlombezaga Zumbe Mnungu awenk'heni seuta, naye niyo awenk'ha. 14 Mbuli zose nezigende vedi mwenyu uneva nomumvike na kumwiva na kutimila zisigilizi zakwe, naho uneva nyuwe na seuta ywenyu nomumtimile. 15 Mna hamtegeleze zisigilizi za Zumbe Mnungu niyo mwasaguka kwe zisigilizi zakwe, yehe naye naahigane na nyuwe hamwenga na seuta ywenyu. 16 Ivo elo kimaleni aaho mwili nanywe nomuone mbuli nk'hulu izo Zumbe Mnungu akuunga adamanye. 17 Togoleni haluse hi lupisi lwa uvuni wa ngano naho wandaga ni msimo wa kiangazi? Mna neni mlombeze Zumbe Mnungu egala lumwemwe na fula. Nanywe nommanye kugamba mwadamanyisaga uwihi wiihise ha Zumbe umwo mwamlombezaga awenk'heni seuta."

18 Ivo Samweli amlombezaga Zumbe Mnungu, Zumbe naye niyo aleta lumwemwe na fula mwe dizuwa idyo. Want'hu wose niyo wamwogohesa Zumbe na Samweli, niyo wagamba mkulu kilombezele kwa Zumbe Mnungu ywako vileke kisekubanika. 19 Niyo want'hu wose wamgamba Samweli, "Kilombezele kwa Zumbe Mnungu ywako vileke kise kubanika, kwaviya chongezela wiihi uno mwo wavu wetu wose kwa kukeungila seuta."

20 Samweli niyo ahitula, "Msekogoha hata uneva mdamanya wiihi uno msekuhituka mkamleka Zumbe Mnungu mna mvikeni yehe kwa mioyo yenyu yose. 21 Msekuitimila milungu yo udant'hi heiikudaha kuwambizani hegu kuwayokolani kwaviya hiyo ya kindedi. 22 Zumbe Mnungu kaika Ndagano ye kindedi naho haawalekeni nyuwe kwaviya kalamula kuwatendani nyuwe kunda want'hu wakwe. 23 Mna kwa miye henileke kuwalombezela kwa Zumbe Mnungu. Mnatenda ivo neinde hitenda vihile kwa Zumbe, nenigendeele kuwahiniza sila zedi na za uwagilwa. 24 Mtunyeni Zumbe Mnungu na kumvika kwa uhuhilwa kwa mioyo yenyu yose. Kumbukileni vint'hu vikulu amidamanyileni. 25 Mna mnagendeela kutenda wavu nyuwe hamwenga na seuta ywenyu nombanangwe pele."