1 Zuwa dimwenga, Yonasani mwana seuta Sauli, amgambilaga yudya mbwanga nakamwinuila vitoanilo vakwe, "Soo, kite ng'ambo mwe gomela dya Wafilisiti." Mna Yonasani nakanda hamgambile ise. 2 Sauli nakaika nk'hambi hasi ya mkomamanga uko Migiloni, kuse yo mzi wa Gibea, akanda hamwenga na want'hu wabuile magana mtandatu. 3 Ahiya, mwana ywa Ahitubu ndugu dya Ikabodi mwana ywa Finehasi, naho uyo Ahiya mwizukuluwe dya Eli mlavant'hambiko ywa Mnungu mwo mzi wa Shilo, nakanda kavala kazibao ka mlavant'hambiko. Want'hu hawamanyize kugamba Yonasani nakahalawa kale.

4 Yonasani aikaga mzungu kugamba, yehe na yudya mbwanga nawaungwa kwombokela ho mwina, ni hagati ye diwawi dyo luwe lutulike, niho abule aho dili idifyo dya watowani wa Wafilisiti. Mwina umwenga ukwitangwa Bosesi, lutuhu nalo lwitangwa Sene. 5 Mwina umwenga lwandaga mkoma mahanya yo mzi wa Mikimashi, lutuhu nalo lwandaga Kwa mwenye mzi kuhinga mwo mzi wa Gibea.

6 Yonasani niyo amgamba yudya mbwanga amwinuilaga vitowanilo, "Soo, kiite kwe nt'hendelo ya kaidi kwe nk'hambi ya want'hu hewevinilwe, mafani Zumbe naachambize kwaviya Zumbe Mnungu hakuyokola kwa kuhuwila uwingi wa want'hu hegu ugeke wa want'hu."

7 Yudya mbwanga amwiinule vitowanilo niyo amgamba, "Damanya chochose miye ni hamwenga na weye kwa chochose noulamule kudamanya."

8 Niyo Yonasani amgamba, "Nenidendeluke kiwabase want'hu wadya vileke wakikaule. 9 Uneva wakigamba kigojeni aaho mpaka suwe kize, nekikale aaho naho hekiwaitile. 10 Mna uneva wanagamba, Haya nyuwe kweleni mwize, niho nekiite kwaviya Zumbe Mnungu kakink'ha udahi wa kuwahuma. Naho iki nicho nekinde kilagiso kwetu."

11 Ivo niyo wakelaviliza vileke Wafilisiti wawaone. Wafilisiti niyo wagamba, "Sinyeni wadya Waibulania walawa mwe mabome umwo wendile wakefisa!" 12 Wafilisiti wendile mwe nk'hambi wamwitanga Yonasani na mbwanga amwinuilaga vitowanilo, "Sooni uku kwetu naswe nekiwalagise kint'hu."

13 Ivo, Yonasani akwelagakwa kutambala uko kukenya akanda na yudya mbwanga. Yonasani awatowaga Wafilisiti akawakinya hasi uku yudya mbwanga akatimila kunyuma na kuwakoma. 14 Mwo kutowana kwa bosi Yonasani, akanda hamwenga na yudya mbwanga wakwe amwinuilaga vitoanilo, nakawakoma want'hu enga milongo miidi mwe nt'hendelo ya hasi dyabulaga nusu yo mgunda. 15 Mwe isi yose ya Wafilisiti, wose nawakonga kupata wogohi we nk'hondo mwe nk'hambi, want'hu mwe migunda, na want'hu wose wazingizaga, naho kwandaga na wogohi mkulu.

16 Na waamizi wa Sauli uko Gibea mwe isi ya Benjamini nawawaona want'hu wengi wakaguluka uku na uko. 17 Sauli niyo awagamba want'hu wandile hamwenga naye, hake kewazeni vileke kimanye niwahi hewemuli mwetu, weze wakewaze nawabunk'hula kugamba Yonasani na yudya mbwanga amwiinuilaga vitoanilo nawanda hawahali. 18 Sauli niyo amgamba Mlavant'hambiko Ahiya," Lete aha sanduku dya Mnungu." Mwo lupisi ulwo Disanduku dye Ndagano dya Mnungu nedinda hamwenga na Waizilaeli. 19 Umwo Sauli anda akalonga no Mlavant'hambiko, kwaganika mwe nk'hambi ya Wafilisiti kwagendeelesaga, Sauli niyo amgamba Mlavant'hambiko, "Leka, usekudileta naho Disanduku dye Ndagano." 20 Ivo Sauli na want'hu wakwe niyo wakeduganyaga niyo wakonga nk'hondo na Wafilisiti, mna Wafilisiti wakongaga kutoana wenye kwa wenye kwaviya nawakezaganya. 21 Ivo Waibulania awo wandaga hamwenga na Wafilisiti, na wadya waitaga nawo mwe nk'hambi, wahitukaga no kukelunga na Waizilaeli wakanda hamwenga na Sauli na Yonasani. 22 Hata Waizilaeli watuhu wandile wakefisa mwe isi ya lugulu lwa Efulaimu, weze weve ivo Wafilisiti wandile wakaguluka, woho nawo wawagulusaga na kuwatowa.

23 Ivo zuwa idyo Zumbe Mnungu awenk'haga Waizilaeli uhumi mkulu nk'hondo nayo yagendeelaga mpaka Beti Aveni.

24 Zuwa diya, Waizilaeli wazehukaga ne sala kwaviya Sauli akelisaga akagamba, "Mnt'hu yeyose naadye nk'hande umwo kisingi kikanda kikei mpaka naaligitwe." Ivo, zuwa idyo hakwandaga yeyose agezaga kudya nk'hande yeyose. 25 Fyo dyose dya watowani dize dibule hant'hu hana maziti mengi, wabwiilaga uki mwe kila ziti. 26 Mna hakwandaga na yeyose agezaga kuukwafa uki uwo kwaviya wogohaga diligito dya Sauli. 27 Mna Yonasani hamwivaga ise akalava kilapi. Ivo aonyekezaga ingoda andile nayo mwe dilala dyo uki, niyo adya uwo uki, aaho akeona kunda na ludole. 28 Mnt'hu yumwenga niyo amgamba, "Chose kizehuka na sala, mna iso kakilemeza kwa luhahila akagamba, ‘Naaligitwe yeyose naadye nk'hande yoyose diyelo.’"

29 Yonasani niyo ahitula, "Tate awagela nk'huswank'huswa awant'hu, haluse miye nakeona nna ludole kwaviya hiluma uki uno mgeke! 30 Nevindilisa vedi watowani wetu wadile ludodo kulawa mwe viya vitahigwe kulawa kwa wank'hondo wawe. Nekipata ludole na Wafilisiti wengi nawakomigwa"

31 Mwe dizuwa diya, Waizilaeli wawatowaga Wafilisiti, kukongela Mikimashi mpaka Aiyaloni. Mwo lupisi ulo Waizilaeli nawanda wasokelesa. 32 Mna nawagulukila viya vint'hu vitahigwe, niyo waguha wana ngoto, majeku na ndama, wachinjaga, niyo wadya nyama ne sakame. 33 Want'hu wamgambaga Sauli, "Kaula want'hu wadamanya yaihile ha Zumbe Mnungu kwa kudya nyama ina sakame." Sauli awagambaga want'hu.

"Nyuwe mhituka na kudamanya kint'hu kiihise!" "Tongoloseni iwe kulu aha hangu." 34 Niyo awagamba, "Iteni mkawagambile want'hu wose wegale ng'ombe na ngoto zawe aha, wazichinje na kuzidiila aaha. Msekudamanya wavu kwa Zumbe Mnungu, kwa kudya nyama ina sakame. Ivo kilo kiya chose nawegale ng'ombe zawe na kuzichinjila aaho." 35 Niyo Sauli Amzengela Zumbe Mnungu kilingo cha maiwe. Icho nicho chandaga kilingo cha maiwe cha nk'hongo Sauli amzengelaga Zumbe Mnungu. 36 Niyo Sauli awagamba want'hu, "Kiteni kiwabase Wafilisiti nekilo, kiwakump'hukile na kuutaha ugoli wao mpaka mtondo, hekimleke mnt'hu yeyose kunda mgima."

Want'hu niyo wamgamba, "Damanya kiya ukuona ni chedi kwako," Mna mlavant'hambiko niyo amgamba,

"Kinde kumuuza Zumbe Mnungu." 37 Ivo, Sauli niyo amuuza Mnungu, "Togola niite hawatowe Wafilisiti? Weye noukink'he ludole lwa kuwahuma?" Mna Mnungu hahitule mwe dizuwa idyo. 38 Niyo Sauli agamba, "Nyuwe vilongozi wa want'hu, soni kimanye ni wavu wani kidamanye diyelo. 39 Nakelisa kwa zina dya Zumbe Mnungu akuiyokola Izilaeli, hata uneva ni mwanangu Yonasani ni vedi akomigwe." Mna hakuna mnt'hu alongile dyodyose. 40 Ivo, Sauli niyo awagamba, "Nyuwe nyose kimaleni nt'hendelo idya, miye name na Yonasani mwanangu kikimale nt'hendelo ino." Woho niyo wahitula,

Woho niyo wahitula wakamgamba, "Damanya kiya ukuona chedi kwako," 41 Niyo Sauli agamba, "We Zumbe Mnungu ywa Izilaeli, nii hunihitule miye mndima ywako? Weye Zumbe Mnungu ywa Izilaeli, uneva masa ye kwangu hegu kwa Yonasani, weye hitula kwa iwe dya Ulimu dya kuuza ulamuzi wako. Mna uneva masa ye kwa want'hu wa Izilaeli hitula kwa iwe dya Tumimu dya kuuza ulamuzi wako." Yonasani na Sauli nawaonwa kunda na masa mna want'hu hawaonekaga kunda na masa. 42 Sauli niyo agamba toeni kula mwa miye na mwanangu Yonasani. Yonasani niyo abwiilwa na masa. 43 Niho Sauli amgamba Yonasani, nigambile idyo udamanye.

Yonasani niyo ahitula, "Nehidya uki mgeke kwa kudokola ne ngoda nnanayo mwo mkono, Naho uneva ni kubanika goja nibanike."

44 Sauli niyo agamba, "Heiye Yonasani waungwa kubanika, Mnungu anitowe na kunikoma uneva huna banike kwajili ye mbuli ino!"

45 Mna want'hu niyo wamgamba Sauli, "Nii Yonasani uyo awakombole Izilaeli akomigwe? Ni mbwani akomigwe? Chakelisa kwa zina dya Zumbe Mnungu, hata lufili lwo mtwi wakwe holugwe hasi. Iki adamanye dyelo kadamanya kwa wambizi wa Mnungu." Ivo want'hu nawamyokola Yonasani, naye niyo hakomigwe.

46 Niyo Sauli aleka kuwatimila Wafilisiti, Wafilisiti nawo wauyaga kwe zikaya zawe.

47 Kukongela aho Sauli andaga seuta ywa Ezilaeli, atowanaga na wank'hondo wakwe kila hant'hu. Wamoabu na Waamoni na Waedomu na maseuta wa Soba, na Wafilisiti. Kila aho atowane nk'hondo andaga mhumi. 48 Atowanaga haheina kogoha, no kuwahuma Waameleki. Nakawayokola Waizilaeli mwa want'hu wose wandaga wawatahaga.

49 Wana kilume wa Sauli wandaga ni Yonasani na Ishivi na Malikiishua. Naho andaga na wanakike waidi. Mwelekwa ywa nk'hongo nakanda eketangwa Melabu, mdodo naye etangwagwa Mikali. 50 Mkaza Sauli etangwagwa Ahinomu mwana Ahimaasi. Mtowani wa watowani wa Sauli etangwagwa Abineli, uyo Neli mhwawe ywa Sauli. 51 Kishi niye Ise dya Sauli, Ise dya Abineli naye andaga ni Neli. Awa wose wandaga wana Abieli.

52 Kwandaga na nk'hondo nk'hulu mwa Waizilaeli na Wafilisiti mazuwa yose umwo Sauli andaga seuta, na kila aho Sauli eze ampate mnt'hu mta ludole hegu mta udahi wa nk'hondo, Sauli amguhaga vileke ande hamwenga na watowani wakwe.