1 Sauli andaga na miaka milongo mitatu umwo akanda seuta ailongozaga Izilaeli kwa miyaka milongo mine na miidi. 2 Sauli asagulaga want'hu alufu nt'hatu. Mwa awo alufu mbili andaga nawo uko Mikimashi na mwe isi ye vigulu va Beseli alufu imwenga awaikaga uko Gibea mwe isi ya Benjamini awo wandaga wakalongozwa na mwanaye Yonasani. Wagosi wasigalaga awavuzaga kwe zikaya zawe.

3 Yonasani na want'hu wakwe wawatoaga watowani wa Wafilisiti mwe nk'hambi uko Gibea niyo Wafilisiti weva mbuli iyo, ivo Sauli atowaga gunda mwe isi yose akagamba, "Waebulania na weve!" 4 Waizilaeli wose wevaga kugamba Sauli kaitaha ink'hambi ya watowani wa Wafilisiti naho kugamba Wafilisiti wawaihiya Waizilaeli. Ivo Waizilaeli wose wetangagwa wande hamwenga na Sauli uko Giligali.

5 Wafilisiti wandaga na magali ya nk'hondo alufu milongo mitatu na watowani alufu mtandatu wakugendeza magali ya nk'hondo, na watowani wakugenda lwa viga wabindile wengi, wose wakwelaga na kuika nk'hambi uko Mikimashi ulailo wa zuwa wa Beti Aveni. 6 Wafilisiti wawakup'hukilaga Waizilaeli kwa udahi mkulu watowani awo wa Izilaeli waonaga kugamba wekailwa vihile. Ivo wengi wekefisaga kwe zip'hanga na mwe visaka na mwe mabome ye hasi na mwe zinyuwe wamwenga na masima heyena mazi, 7 wamwenga wadendelukaga mto Yolodani mpaka kwe isi ya Gadi na Gileadi

Sauli andaga akei uko Giligali, na wadya want'hu wose wamtimilaga wakazingiza kwa wogohi.

8 Sauli agojelaga kwa mazuwa mfungate enga ivo Samweli asigiilaga atende, mna Samweli andaga akei kwiza Giligali, wadya want'hu nawo wendaga na Sauli wakongaga kumnyilika. 9 Sauli niyo agamba, "Nigaileni malavo yo kokwa na malavo yo utondowazi." Naye niyo alava malavo yo kokwa. 10 Aho eze ibinde kulava malavo yo kokwa ayo Samweli abulaga, Sauli naye agendaga kumsingila na kumhokela.

11 Samweli niyo auza, "Kudamanyai?"

Sauli niyo ahitula, "Nize nione kugamba want'hu wanyilika weye nawe nokunda hwizile mwo lupisi ulo ulongile, naho Wafilisiti nawo wakeduganya uko Mikimashi, 12 naho nehiona kugamba, Haluse ‘Wafilisiti nawaseele wanitowe aha Giligali name nehinda hinati nilombeze wambizi wa Zumbe Mnungu.’ Ivo nehifanyanya kulava malavo yo koka miye mwenye."

13 Samweli niyo ahitula, "Hudamanye viligane ne zisigilizi za Zumbe Mnungu ywako." "Wandile watimile, useuta mwa Izilaeli hegu noutoga kale kwa lupisi lwose. 14 Mna haluse useuta wako hogendeele. Kwaviya Zumbe Mnungu kazungula mnt'hu mtuhu akumwelela umoyo wakwe, kamsagula kilongozi ywa want'hu wakwe kwaviya weye hutimile viya akugambile udamanye."

15 Samweli ahalawaga kulawa Giligali na kuita Gibea mwe isi ya Benjamini. Sauli awawazaga want'hu andaga hamwenga nawo. Wandaga ni want'hu magana mtandatu du. 16 Sauli na Yonasani mwanawe na want'hu wawe watowaga nk'hambi uko Gibea mwe isi ya Benjamini, nk'hambi ya Wafilisiti yandaga uko Mikimashi. 17 Mafyo ya watowani ya Wafilisiti yalawaga kwe nk'hambi yawe niyo yagenda kutowa yakanda mwe mafyo matatu. Fyo dimwenga dikahinga Hofula mwe isi ya Shuali. 18 Fyo tuhu dikahinga Beti Haloni, tuhu nadyo dikahinga kwe mihaka ye dikolongo dya Sebohimu kuhinga kwe dijangwa.

19 Hakwandile na msani mwe isi yose ya Izilaeli kwaviya Wafilisiti hawawalekelaga kusana mijungi na sime wakagamba, "Hakinakaulise Waebulania nawadamanye sime na mijungo." 20 Mna Waizilaeli nevikawaunga kuseela kwa Wafilisiti vileke wakanole magembe yakukokotwa ne zing'ombe na mgembe na hoya na sululu yakwe. 21 Waizilaeli wandaga wakaliha vibesu viidi va masawa kwa kunoela gembe dya kulima na ng'ombe na sululu. Yombe dya kunoela hoya na mjungo yandaga vibesu viidi va masawa. 22 Na ivo mwe dizuwa dya nk'hondo hakwanda na mtowani wa Izilaeli andaga na sime hegu mjungo, mna ni Sauli na mwanawe Yonasani du nawo wandaga navo.

23 Ivo Wafilisiti wegalaga watowani wakamile umwina wa Mikimashi.