1 Zumbe Mnungu niyo amgamba Samweli, "Noumwiile Sauli mpaka ini? Miye himlemela kunda seuta ywa Izilaeli. Haluse memeza imp'hembe mavuta ya zeituni niyo waita Betelehemu kwa mnt'hu akwitangwa Yese, kwaviya hisagula yumwenga mwa wanawe we kilume ande seuta."

2 Samweli niyo auza, "Nadaha vivihi kutenda ivi?" "Uneva Sauli eneva mbuli iyo, naa nikome!"

Zumbe Mnungu niyo ahitula, "Guha moli imwenga niyo waita nayo, niyo wagamba weye kwiza kumlavila Zumbe Mnungu nt'hambiko. 3 Mlalike Yese mwe nt'hambiko iyo na miye nohugambile kint'hu cho kudamanya. Noumkumbe mavuta kwajili yangu ande seuta yudya mnt'hu nohugambile."

4 Samweli adamanyaga enga ivo agambilwe ni Mnungu, niyo aita Betelehemu. Wadala wo mzi uwo niyo wafosa na kumsingila wakanda wazingiza, niyo wamuuza, "Togola, kwiza kwa utondowazi?"

5 Samweli niyo ahitula, "Heye, Hiza kwa utondowazi. Hiza kumlavila nt'hambiko Mnungu. Kekukizeni naho soni kinde hamwenga mwe nt'hambiko." Naho amkukizaga Yese na wanawe, na kuwalalika mwe nt'hambiko.

6 Umwo weze wabule, Samweli amounaga Eliyabu mwana Yese, afanyanyaga mwenye, "Mnt'hu uyu akimale aha ha Zumbe ikindedi niye asagulwe." 7 Mna Zumbe Zumbe niyo amgamba Samweli, "Usekumsinya futa yakwe na utali wakwe kwaviya miye himlemela. Kwaviya Zumbe hakukaula mwe vint'hu viya vikukaulwa ni want'hu. Want'hu wakaula enga ivo mnt'hu eli kwa kuse, mna Zumbe Mnungu akaula kwo moyo wo mnt'hu."

8 Ivo, Yese niyo amwitanga mwanawe Abinadabu no kumleta kwa Samweli. Mna Samweli niyo agamba, "Bule, Zumbe Mnungu hamsagule hata uyu." 9 Yese niyo amleta Shamea. Samweli niyo agamba, "Bule, Zumbe Mnungu hamsagule hata uyu," 10 Yese niyo anda kawaleta wanawe wose mfungate kwa Samweli. Mna Samweli amgambaga Yese, "Bule Zumbe Mnungu hasagule yeyose mwa awa." 11 Samweli niyo amuuza Yese, "Togola, una wana watuhu?"

Yese niyo ahitula, "Kasigala mbwanga kamwenga, mna hakahali e kwo kudima zingoto."

"Samweli niyo amgamba, kagambe keze aha, hekikale hasi kidye mpaka uyo mbwanga keze aha." 12 Ivo Yese niyo asigiila mnt'hu, niyo agenda kumguha. Andaga kabwanga katana, kata meso yasangaale. Mnungu niyo amgamba Samweli, "Hoo, haluse uyu niye nimsagule, mkumbe mavuta ande seuta." 13 Samweli niyo aguha mp'hembe yakwe ina mavuta no kumgidila mavuta ha wakuluze, aaho Muye ywa Mnungu amwizilaga Daudi kwa udahi, nae andaga naye kukongela dizua diya na kugendeela. Ivo Samweli niyo auya kwo mzi wa Lama.

14 Ivo, Muye ywa Mnungu afosaga mwa Sauli, niyo muye aihile atumigwe ni Zumbe Mnungu amgela makunt'ho. 15 Niho wandima wakwe Sauli wakamgamba, "Kimanya kugamba, muye aihile atumigwe ni Mnungu akugela makunt'ho. 16 Haluse, weye zumbe ywetu, wagambe wandima wako wamzungule mnt'hu amanyize kutoa kinubi, umwo muye aihile atumigwe ni Mnungu aho akwiziila, mnt'hu uyo naatoe kinubi, weye nawe nounde ywedi naho."

17 Sauli niyo awagamba wandima wakwe, "Nizunguileni mnt'hu amanyize kutoa kinubi, mnigaile aha."

18 Mbwanga yumwenga mwa wandima wakwe niyo agamba, "Himuona mbwanga yumwenga mwana Yese, wo mzi wa Betelehemu. Mbwanga uyo kamanya kutoa kinubi. Uyo mbwanga ni mtowani, ni mhumi wa kutoana nk'hondo, ana ulosi wedi naho mta futa yedi, Mnungu ehamwenga naye."

19 Ivo, Sauli asigiilaga ulosi kwa Yese, akagamba, "Nitangile mwanawo Daudi, mdimi ywe zingoto na mbuzi." 20 Yese amtumaga Daudi aite kwa Sauli akanda na mbuzi na mp'hunda inule mikate na bete dimemile divai. 21 Daudi ezaga kwa Sauli niyo engila mwe ndima yakwe. Sauli niyo amuungisa Daudi, aho amwink'haga ndima ya kwinula vitowanilo vakwe. 22 Ivo Sauli egalaga ulosi kwa Yese akagamba, "Namuunga Daudi, ekale aha ande mndima ywangu." 23 Lupisi lwolwose kukongela aho na kugendeela, yudya muye aihile atumigwe ni Mnungu akamwiziila Sauli, niho Daudi aguhaga kinubi chakwe niyo atowa. Muye yudya aihile niyo amlekela. Aho Sauli akeivaga vedi.