1 Haluse, Wafilisiti nawaduganya watowani wawe uko Soko, mzi umwe isi ya Yuda, kukeika lumwe kwa nk'hondo. Nawatowa nk'hambi uko Efese Damimu mgati mwa Soko na Azeka. 2 Sauli na Waizilaeli nawadugana hamwenga, na kutoa nk'hambi mwa kagulu kakukaula dikolongo dya Ela. Na kukeika lumwe kutoana na Wafilisiti. 3 Wafilisiti nawakimala mwo lugulu lumwenga na Waislaeli lugulu lutuhu, kwandaga kolongo hagati yawe.

4 Kulawa mwe nk'hambi ya Wafilisiti, nakakelaviliza mnk'hondo yumwenga akwitangwa Goliati, mkaya ywa mzi wa Gati. Utali wakwe noubula mita nt'hatu. 5 Mwo mntwi wakwe nakavala nk'hofia ya shaba, na kizibau cha shaba mwe kifua cha kilo milongo mishano na mfungate. 6 Viga vakwe nevinda na wamizi wa shaba na mwe maega yakwe enulaga mjungo wa shaba. 7 Mhini wa mjungo wakwe nounda mkulu enga mfunda. Mntwi wo mjungo wakwe nounda wa kilo mfungate. Ngula yakwe neinulwa ni mnt'hu amlongoele. 8 Goliati nakakimala no kuwatoela lwasu watowani wa Izilaeli, akagamba, "Mwadamanyai aho? Togola, mwiza kutoana nk'hondo? Miye ni Mfilisiti, nyuwe ni watumwa wa Sauli. Saguleni mnt'hu ywenyu yumwenga eze kitowane. 9 Ananihuma na kunikoma, suwe nekinde watumwa wenyu. Mna nna mhuma na kumkoma iivo, nyuwe nomnde watumwa wetu wakukidamanyila ndima. 10 Niyo Mfilisiti uyo kalonga kwa kukeduvya, nawaunga watowani wa Izilaeli mwe dizuwa idi mumlave mnt'hu yumwenga eze kitowane!" 11 Sauli hamwenga na watowani wa Izilaeli weze weve ulosi wo Mfilisiti uyo, wahuzaga na kogohesa.

12 Daudi andaga mwana wa Yese, Mwefulati kulawa Betelehemu ya Yuda. Yese nakanda na wana mnane wa kilume. Aho Sauli eze ande seuta, yehe nakanda mdala, mnt'hu ywa lika kulu. 13 Wadya wana watatu wa Yese wandile wakulu nawanda watimilana na Sauli kwe nk'hondo, mazina ayo ya wanawe watatu wa Yese waitile kwe nk'hondo ni aya, nt'hula sasu Eliyabu, na ywa kaidi ni Abinadabu na ywa katatu ni Shama. 14 Daudi naye andaga niye kiziwanda mwa wose, naho awo watatu wendile wakulu nawo nawakatimilana na Sauli. 15 Mna Daudi andaga akaita kwa Sauli na kuuya vileke ande akadima zingoto za ise uko Betelehemu.

16 Kwa mazua milongo mine, yudya Mfilisiti akelavilizaga mtondo na kisingi akawabela watowani wa Waizilaeli.

17 Zuwa dimwenga, Yese amgambaga mwanawe Daudi, "Wegaile wakuluwo mkazingo kilo mlongo na mikate mlongo. Sunguza uwegaile uko kwe nk'hambi. 18 Yudya mkulu ywawe ywa watowani alufu umwigaile vibesu mlongo va samli inyaile. Kawakaule wakuluzo uneva wagendeela vedi niyo wanigila uhituzi wao. 19 Lupisi ulo seuta Sauli na wakuluze dya Daudi na watowani wose wa Izilaeli nawatowa nk'hambi kwe dikolongo dya Ela, wakakeikaa lumwe watowane na Wafilisiti."

20 Luvi yakwe, Daudi enukaga kilokilo, zingoto nazo amlekelaga mdimi. Aviguhaga vint'hu via niyo aita enga ivo Yese amsigiilaga. Eze abule mwe nk'hambi ya Waizilaeli, awabwiilaga wakepanga hant'hu hawe ha nk'hondo wakatoa nk'hunga za nk'hondo. 21 Watowani wa Wafilisiti na watowani Waizilaeli wakeikaga lumwe watowane, wakakaulana kinga'mbu king'ambu. 22 Daudi amwasiliga ink'hande mnt'hu yudya andaga akamila zint'hanu zawo, niyo awagulukila watowani niyo abula na kuwalamsa wanduguze. 23 Umwo andaga akalonga nawo, Goliati yudya mtowani mdahi ywa Wafilisiti kulawa Gati kakelaviliza ha watowani wa Izilaeli enga ivo azoele. Daudi naye amtegelezaga vedi. 24 Waizilaeli wose weze wamuone Goliati, wogohesaga na kunyilika. 25 Wakakegamba, "Togoleni, mmuona mnt'hu yudya akelavilize? Ikindedi kakelaviliza kuwabela Waizilaeli. Seuta Sauli naamwink'he ugoli utendese mnt'hu yeyose naamkome mnt'hu uyo. Mwa ayo yose namloze mwanawe ywa kike. Naho want'hu wo lukolo lwa ise nawalekelwe, hawalihe kodi."

26 Daudi niyo awauza wadya wendile hagihi naye, "Togola, mnt'hu naamkome Mfilisiti uyu na kuiyokola Izilaeli viligane na soni izi naadamanyilwe mbwai? Uyu Mfilisiti heevinilwe niye ani hegoha kuwahomola watowani wa Mnungu eli mgima?" 27 Want'hu niyo wamgambila enga ivo walongile aho nk'hongo kwa uyo naamkome Goliati.

28 Mna Eliyabu, mkuluwe Daudi eze amwive Daudi akalonga na want'hu, andaga na maya kwaajili ya Daudi, niyo amgamba, "Kubasai uku? Togola, zingoto zia zingeke kumwasila ani kudya kwe nyika? Miye himanya weduvi wako na ivo wili umoyo wako. Kwaviya weye kwiza du kukaula ink'hondo!"

29 Daudi niyo amwihitula, "Haluse hibanagai? Miye nehauza du?" 30 Daudi niyo amwihitukila mnt'hu mtuhu akamuuza enga ivo auzile, naho kila akausa apataga uhituzi uudya.

31 Want'hu awo wamwivile Daudi ivo alongile, nawaita kumgambila Sauli. Sauli niyo asigiila Daudi etangwe. 32 Daudi niyo amgamba Sauli, "Mnt'hu yeyose asekwingila chevu kwajili yo mnt'hu uyu Mfilisiti. Miye mndima ywako neniite hatowane naye."

33 Sauli niyo amgamba Daudi, "Bule, weye hukudaha kugenda kutowana na yudya Mfilisiti. Weye wi mbwanga du, mna mnt'hu uyu nakanda mtowani ywa nk'hondo kukongela aho andaga mbwanga!"

34 Niyo agamba, "Miye mndima," ywako, "Hizoela kudima ngoto za tate, kila lupisi simba hegu suwi zikeza kugwila mwana ngoto, 35 miye nazibasa no kuzitowa, na kumuyokola mwana ngoto mwo mnomo wakwe. Naho simba hegu sangalugembe inanikump'hukila, miye nazitoza zindevu zawe niyo naitowa na kuikoma. 36 Miye mndima ywako hikoma simba nyingi na sangalugembe. Haluse, hata yudya Mfilisiti hevinilwe, yudya awahomole watowani wa Mnungu eli mgima, naande enga izo zisimba ne zisangalugembe izo. 37 Yudya Zumbe aniyokole mwo mnomo we simba hegu sangalugembe, naaniyokole mwa yudya Mfilisiti."

Sauli niyo amgamba. "Ita, Mnungu naande hamwenga na weye." 38 Sauli niyo amvika Daudi zisuke zakwe ze nk'hondo, kamvika nk'hofia yakwe ya shaba mwo mtwi na kizibau cha shaba cha kukekindila mwe kifuwa chakwe. 39 Daudi niyo akenyinya sime ya Sauli mwe divalo yakwe, no kugeza kugenda, mna niyo adunduga kugenda kwaviya havizoele, niyo amgamba Sauli, "Hikudaha kutowana ne vint'hu ivi, kwaviya hivizoele." Ivo Daudi niyo azihambula. 40 Daudi aguhaga ingoda yakwe na kuitoza mwo mkono, niyo asagula maiwe mashano yedi ya mbulanga, no kuyagela mwo mfuko wakwe wa kudimila, akanda kaikalumwe nk'humbaiwe yakwe mwo mkono, niyo akonga kumbasa Goliati Mfilisiti.

41 Yudya Mfilisiti, naye akongaga kumbasa Daudi, yudya amguhile ingao yakwe naye akanda halongole hakwe. 42 Yudya Mfilisiti eze amkaule na kumuwona vedi Daudi, niyo ambela, kwaviya nakanda mbwanga du naho kadamanya va kuwagila mwa meso. 43 Goliati amuuzaga Daudi, "Haluse iyo ngoda yai? Kwani miye ni kuli vikuleka unizile na ngoda? Mfilisiti uyo niyo amligita Daudi kwa milungu yakwe ye Kifilisiti. 44 Mfilisiti niyo amgamba Daudi, So uku, name ikimba chako nenikink'hize kwa madege ya kulanga na makala ya kwe mbago."

45 Mna Daudi niyo amgamba Goliati, "Weye wanizila kwa bamba na mjungo na sime. Mna miye nakwizila kwa zina dya Zumbe Mnungu ywa watowani wa Izilaeli, yudya weye umhomole. 46 Zuwa dya dielo Mnungu naanink'he udahi wa kukuhuma. Nohuduule hasi no kuukant'ha mtwi wako, ne vimba va watowani wako Wafilisiti neniwenk'he madege ya kulanga na makala ya kwe mbago. Naho kugamba isi yose neimanye kugamba eyuko Mnungu mwe Izilaeli. 47 Want'hu wose wadugane aha dielo, nawamanye kugamba Zumbe Mnungu hakukombola want'hu kwa mijungo hegu sime. Nk'hondo ino ya Zumbe Mnungu, naye kakink'ha ludole lwa kuwahumani nyuwe nyose."

48 Goliati akongaga naho kumbasa Daudi. Daudi naye niyo amgulukila akatowane nae Goliati Mfilisiti. 49 Daudi agelaga mkono wakwe mwo mfuko na kulava iwe dimwenga niyo adiduula kwa nk'humbaiwe yakwe, nakumtoa nadyo Goliati mwe kihanga chakwe. Iwe dyatulaga kihanga cha Goliati na kwingila kundani. Goliati agwaga hasi kifulifuli. 50 Nivo Daudi amhumile Goliati kwa nk'humbaiwe ne diiwe dyakwe, na kamtoa yudya Mfilisiti. Daudi nakanda hana bamba dyodyose mwo mkono wakwe, 51 niyo aguluka nguluko, no kukimala mnanga mwa Goliati, niyo asomola dibamba dya Goliati mwe yala yakwe, niyo amkant'ha Goliati mtwi wakwe ne dibamba iidyo. Wafilisiti weze waone mtowani ywawe mdahi kakomigwa, watulaga nguluko niyo wanyilika. 52 Niho want'hu wa Izilaeli na want'hu wa Yuda, wakongaga kuguta lukunga lwa uhumi, no kuwagulusa Wafilisiti mpaka Gati, mwe nk'hili ya Ekuloni. Wafilisiti walumilaga mwe nk'hondo nawasambala mwe sila ya Shalimu mpaka Gati na Ekuloni. 53 Mna Wazilaeli weze wauye kulawa kwo kuwagulusa Wafilisiti, waitahaga ink'hambi ya Wafilisiti. 54 Daudi niyo aguha mtwi wa yudya Goliati Mfilisiti no kuwigala kwo mzi wa Yelusalemu, Mna vitoanilo vakwe aviikaga mwe dihema dyakwe.

55 Sauli eze amuone Daudi akambasa yudya Mfilisiti Goliati, nakamuuza Abineli, kilongozi ywa mtowani wakwe, "Abineli, uyu mbwanga ywaani?"

Abineli niyo ahitula, "Ikindedi miye himanyize."

56 Ivo seuta Sauli niyo amgamba, "Genda kauze kugamba mbwanga ywa ani."

57 Umwo Daudi eze ajike kumkoma Goliati no kuuya kwe nk'hambi, Abineli nakamguha no kumwiigala kwa Sauli. Lupisi ulo Daudi nakanda akei anawo umtwi wa Goliati Mfilisiti mwe mikono yakwe. 58 Sauli niyo amuuza Daudi, "Mbwanga, weye mwana anii?"

"Daudi niyo ahitula miye ni mwana mndima ywako Yese kulawa Betelehemu."