1 Wafilisiti waduganyaga mafyo ya watowani wakwe wose uko Afeka, na Waizilaeli nawaika nk'hambi uko kwe nch'hoko ye dikolongo dya Yazeleli. 2 Wakulu washano wa Wafilisiti umwo wakomboka na mafyo yawe ya watowani magana na maalufu, Daudi naye hamwenga na want'hu wakwe, hamwenga na Akishi, wandaga wakatimila kwa kunyuma mwe difyo idyo dya Wafilisiti. 3 Naho wakulu wa watowani wa Wafilisiti wauzaga, "Awa Waibulania wadamanyai aha?"

Akishi naye niyo awagamba wakulu wa watowani wa Wafilisiti, "Uyu ni Daudi andaga mndima ywa Sauli seuta ywa Izilaeli, haluse ubula mwaka umwenga na nusu akanda na miye kukongela aho wapanganaga na Sauli seuta ywa Izilaeli. Miye hione wiihi wowose kwakwe."

4 Mna wakulu watowani wa Wafilisiti wandaga na maya mwa Akishi, niyo wamgamba, "Mvuze uyu mnt'hu, auye kudya kunt'hu umwink'hile, naho umgambe asekuita na suwe kwe nk'hondo chaivo mwo lupisi lwe nk'hondo naakihituke na kunda mnk'hondo ywetu. Hukuona kugamba mnt'hu uyu naapate sila yedi ya kwiivana na mkuluwe kwa kuwakoma watowani wetu? 5 Togola, uyu hiyo Daudi uyudya wavele wakemile mbuli zakwe wakavina uku wakagamba, ‘Sauli kakoma maalufu, mna Daudi kakoma maalufu mlongo.’"

6 Akishi niyo amwitanga Daudi na kumgamba, "Nakelisila kwa Zumbe Mnungu mta udahi, kugamba kunda mhuwilwa kwangu. Neinda mbuli yedi kwangu kiite wose waidi kwe nk'hondo, kwaviya hione dyodyose diihile kwako kukongela hadya wizile kwangu mpaka dyelo ino. Hata ivo, wakulu hawakuzumile weye. 7 Ivo haluse uya kaya kwa utondowazi sema una waihiye wakulu wa watowani wa Wafilisiti."

8 Daudi niyo amgamba Akishi, "Mna hibanangai? Enga ivo ukulonga kugamba, hunione na masa yeyose kukongela zuwa diya nakongaga kukudamanyila ndima mpaka dyelo, nii kugenda kutowana nk'hondo na watowani wa mkulu?"

9 Akishi niyo amgamba, "Himanya kugamba huna masa yeyose hangu enga mtumigwa ywa Mnungu. Hata ivo, wakulu wa watowani wa Wafilisiti watigiza kugamba, Asekugeza kuita hamwenga na suwe kwe nk'hondo. 10 Haluse, weye Daudi na wandima wa mkuluwo Sauli mkelauke kilokilo mhalawe."

11 Ivo kilokilo zuwa ditimile, Daudi hamwenga na want'hu wakwe nawauya mwe isi ya Wafilisiti. Mna awo Wafilisiti wakwelaga kuita Yazileeli.