1 Mna Daudi afanyanyaga akagamba, "Diuko zuwa dimwenga Sauli naanikome. Kint'hu chedi cha kudamanya ni kunyilikila kwe isi ya Wafilisiti. Sauli naafe chevu kunizungula mwa Waizilaeli, aho niho nenikale kwa utondowazi." 2 Ivo Daudi ahalawaga yehe na want'hu magana mtandatu wandaga hamwenga naye no kuita kwa Akishi mwana Maoki seuta ywa mzi wa Gati. 3 Daudi hamwenga na want'hu wakwe ne mp'huga yakwe nawekala na Akishi uko kwo mzi wa Gati. Naho Daudi nakanda na wavele waidi, Ahinoamu ywa Yezileeli na Abigaili uyo mgosiwe Nabali ywo mzi wa Kalimeli abanikaga. 4 Sauli eze eve kugamba Daudi kanyilikila kwo mzi wa Gati, alekaga kumwogola.

5 Zuwa dimwenga, Daudi amgambaga Akishi, "Uneva kunizumila, nakulombeza unink'he mzi umwenga mwe mizi yako miye nikale uko. Hiyo vedi miye nikale na weye mwo mzi uno akwikala seuta." 6 Ivo mwe dizua idyo Akishi amwink'haga Daudi mzi wa Zikilagi, naivo mzi uwo niyo wandaga ugoli wa maseuta wa Yuda kukongela mwo lupisi ludya. 7 Daudi ekalaga mwe isi ya Wafilisiti kwa lupisi lwa mwaka umwenga na miezi mine.

8 Mwo lupisi ulwo, Daudi na want'hu wakwe wawatowaga Wageshuli na Wagilizi na Waamaleki na awo wandile wakaya we isi iyo kukongela aho nk'hongo. Awatowaga kukongela Talemu kuhinga Shuli mpaka kwe mihaka ya Misili. 9 Kila umwo Daudi autowaga mzi wowose hasigazaga hata mnt'hu yumwenga kunda mgima akanda mgosi hegu mvele na kutaha ngoto na ng'ombe na mp'hunda na ngamia na mavalo, niyo auya na kwa Akishi. 10 Uyo Akishi amuuzaga Daudi, "Diyelo ink'hondo kutowa hii?" Daudi amhitulaga kwa kuziga kugamba, nehinda Kwa mwenye mzi ya Yuda hegu Kwa mwenye mzi ya Wayelameeli hegu Kwa mwenye mzi ye isi ya Wakeni. 11 Daudi hamlekaga mnt'hu yeyose kunda mgima akanda mgosi hegu mvele vileke wegalwe mwo mzi wa Gati, afanyanyaga kugamba, sema wanalonge ikindedi kugamba Daudi adamanyaga mbuli ino hegu idya. Ivo nivo Daudi andaga akadamanya mwo lupisi lwose ekale kwa Wafilisiti. 12 Kwa ivo Akishi amhuwilaga Daudi akafanyanya kugamba, "Daudi kanda hakuungiswa ni want'hu wa Izilael, ivo naande mndima ywangu aha mazuwa yose."