1 Samweli niyo amgamba Sauli, "Mnungu kanisigila hutende seuta ywa want'hu wakwe wa Izilaeli. Haluse tegeleza kiya Zumbe alongile. 2 Zumbe mta udahi kagamba ivi, ‘Naawasulumize Waameleki kwa kuwakindila Waizilaeli umwo wandaga mwe sila wakalawa Misili. 3 Haluse kawatowe Waamaleki niyo wawakoma pele woho na kila kint'hu chawe, usekuwazigaza hata yumwenga, wakome wagosi kwa wavele, wana na vititi, ng'ombe na ngoto na ngamia na mp'hunda.’"

4 Sauli niyo awetanga watowani wakwe, niyo awaduganya hamwenga uko mzi wa Telaimu. Kwandaga na watowani magana maidi alufu wakugenda lwa viga kulawa Izilaeli, na watowani milongo alufu walawaga Yuda. 5 Sauli na want'hu wakwe waubasaga mzi wa Amaleki, niyo wakeika lumwe wakanyatila kwe dikolongo. 6 Sauli awagambaga Wakeni, "Halaweni, mlaweni mwa Waamaleki, vileke nisekuwakomani nyuwe hamwenga na woho, kwaviya mwalagisaga ukise kwa Wazilaeli wose umwo wandaga wakalawa Misili." Ivo Wakeni wahalawaga ha Waamaleki.

7 ivo Sauli na want'hu wakwe wawahumaga Wamaleki kulawa Havila mpaka Shuli, ulailo zuwa wa Misili. 8 Amgwilaga Agagi seuta ywa Amaleki akanda mgima, na wawakomaga pele want'hu wose. 9 Hiyo kugamba amlekaga Agagi kunda mgima du, mna iviyaiviya waviguhaga vint'hu vandaga vedi enga ngoto, mbuzi na ng'ombe. Waguhaga kila kint'hu chandaga chedi. Wakomaga du viya waonaga kunda hiyo vedi.

10 Zumbe Mnungu niyo amgamba Samweli. 11 "Kumbeke hitendile vedi kumtenda Sauli kunda seuta! Kanileka naho hatimile yadya nimgambile." Samweli andaga na kinyulu niyo kilo chose anda akamwiila Zumbe Mnungu. 12 Mtotondo mwe dizuwa ditimile Samweli agendaga kumkaula Sauli. Evaga kugamba Sauli kaita kwo mzi wa Kalimeli uko akezengelaga mnala wakwe, naho niyo aita Giligali. 13 Umwo Samweli eze ambwiile Sauli, Sauli agambaga, "Zumbe Mnungu akuvikile kwaviya hidamanya enga ivo anigambile nidamanye."

14 Samweli niyo amuuza, "Nii neva maizwi ya ngombe na ngoto?"

15 Sauli niyo ahitula, "Watowani wazitaha izi kwa Waamaleki wazigaza zingoto izedi na ng'ombe izedi wakamlavile nt'hambiko Zumbe Mnungu, Mnungu ywako, mna visigale wavikoma pele."

16 Samweli niyo amgamba Sauli, "Nyamala," "Goja hugambile kiya Zumbe Mnungu anigambile mwe kilo chomboke."

Sauli niyo agamba, "Nigambile."

17 Samweli niyo ahitula, "Hamwenga na kugamba wakeonaga kunda mdodo, Mnungu hakutendaga kunda mkulu mwe makabila yose ya Izilaeli? Zumbe Mnungu akutendaga kunda seuta ywa Izilaeli, 18 niyo akutuma uwakome pele want'hu wa Wamaleki awo ni wata wavu. Akugambaga uwatowe mpaka uwakome wose. 19 Haluse nii hutimile viya Zumbe Mnungu alongile? Nii wagulukila kutaha niyo wadamanya uwihi kwa Zumbe Mnungu?"

20 Sauli niyo ahitula, miye hitenda viya Zumbe Mnungu alongile, "Himwigala seuta Agagi niyo nawakoma Wamaleki wose. 21 Mna want'hu wangu waguhaga ngoto izedi na mbuzi na ng'ombe izedi mwe ziya watahile mna weza nazo aha Giligali wazilave nt'hambiko kwa Mnungu ywako."

22 Mna Samweli niyo ahitula, "Ni kihi Zumbe Mnungu akuungisa? Togola Mnungu elelwa ni malavo ya kokwa na nt'hambiko viligane na kutimila yadya akulonga? Ni vedi kutimila yadya akulonga kujink'ha kumlavila mavuta ya vulata. 23 Kusaguka kulawa kwa Mnungu kwiha enga wavu wa usai naho unk'hani ni enga wavu wa kuvika mahili. Kwaviya weye kumlemela Zumbe Mnungu yehe naye kakulemela kunda seuta."

24 Sauli niyo ahitula, "Heye hidamanya wavu," naho, "Hitendile yadya Zumbe Mnungu anisigiile hamwenga na malagizo yako. nehiwogoha want'hu kwaivo hitenda viya waungile woho. 25 Mna haluse, nakulombeza weye uniusile wavu wangu, naho kiuyanye vileke nidahe kumvika Zumbe Mnungu."

26 Samweli niyo ahitula. "Mbwitu, Heniuye hamwenga na weye. Weye kulemela sigilizi za Zumbe Mnungu, yehe naye kakulemela kunda seuta ywa Izilaeli."

27 Umwo Samweli eze ahituke vileke ahalawe, Sauli atozaga divalo dya Samweli, niyo dyatatuka. 28 Samweli niyo amgamba, "Zumbe kauhausa useuta wa Izilaeli kulawa kwako kukongela ivi dyelo, niyo awink'hiza kwa miyawo ywedi kujink'ha weye. 29 Uyo Mnungu ywa Izilaeli mta Udahi hakulonga lulimi na kuhitula zifanyanyi zakwe kwaviya yehe hiyo mnt'hu akuhitula zifanyanyi zakwe."

30 Sauli niyo ahitula, "Miye hidamanya wavu. Mna usekunigela soni aha ha wadala wa want'hu wangu na Waizilaeli wose, kiuyanye vileke hamvike Zumbe Mnungu, Mnungu ywako." 31 Ivo, Samweli auyaga hamwenga na Sauli, Sauli naye niyo amvika Zumbe Mnungu.

32 Samweli niyo agamba, "Mlete kwangu seuta Agagi. Agagi ezaga kwa Samweli kwa kinyemi akagamba, ikindedi usungu we file womboka." 33 Samweli niyo agamba, "Enga iivo sime yako iwatendile wavele wengi kubanikilwa ni wana wawe, haluse nyokwe naye naande abanikilwe ni wana mwa wavele." Ivo Samweli amdangagadangaga Agagi uko Giligali ha Zumbe Mnungu.

34 Ivo Samweli niyo aita Lama, mna Sauli aitaga kwe kaya yakwe uko Gibea. 35 Kukongela mwe dizuwa idyo Samweli hamuonaga naho Sauli, hamwenga na ayo Samweli amwiilaga Sauli, mna Zumbe niyo agamba hitendile vedi kwa kumtenda Sauli kunda seuta mwe Izilaeli. Naho Samweli hagendaga kumuwona naho Sauli mpaka kwe dizua dyo kubanika kwakwe.