1 Ivo awo wagosi kulawa mzi wa Zifu nawaita kwa Sauli uko Gibea niyo wagamba, Daudi andaga akakefisa mwo mnima wa Hakila, nt'hendelo ya ulailo wa zuwa wa Yeshimoni. 2 Ivo Sauli afosaga niyo aita kwe zinyika za Zifu akanda na watowani alufu nt'hatu hewekogoha kulawa Izilaeli vileke wakamzungule Daudi. 3 Sauli niyo aika nk'hambi mwo mnima wa Hakila kwe sila ya ulailo wa zuwa wa Yeshimoni. Mna Daudi aitaga uko kwe nyika, eze amanye kugamba Sauli amzungula, 4 atumaga wapelembi, na kugambilwa kugamba ni kindedi. 5 Daudi niyo afosa, na kuita hant'hu Sauli aikaga nk'hambi. Na kuhaona hant'hu Sauli agonaga na Abineli mwana ywa Neli, mkulu ywa watowani wa Sauli, andaga kagona wakanda hagihi na Sauli. Naho Sauli agonaga hagatigati ye nk'hambi uku akazungulukwa ni watowani wakwe.

6 Daudi niyo amgamba Ahimeleki uyo Mhiti, na Abishai nguguye Yoabu, nuko kugamba nine etangwagwa Seluya, "Niani nekiitanye hamwenga kwe nk'hambi ya Sauli?" Abishai amgambaga,

"Nekiitanye na miye."

7 Nekilo, Daudi na Abishai wengilaga mwe nk'hambi ya Sauli, na kumbwiila Sauli kagona hagati ye nk'hambi iyo, na mjungo wakwe usomekwa hasi yo mtwi wakwe. Abineli hamwenga na watowani nawagona kumzunguluka Sauli. 8 Abishai amgambaga Daudi, "Dielo Mnungu kamwiika mnk'hondo mwo udahi wako. Ivo nelekele nimuwambe mwe sanga no mjungo kamwenga du, naho henivuzagize!"

9 Mna Daudi niyo amgamba Abishai, "Usekumkoma, kwaviya Zumbe Mnungu namsengele mnt'hu yeyose naageze kumkoma mndima ywakwe asagulwe kwa kukumbigwa mavuta. 10 Himanya ikindedi kugamba, Zumbe Mnungu mwenye naamkome Sauli, mafani kwo lupisi lwakwe lwo kubanika hegu umwo akaita kwe nk'hondo. 11 Mna Zumbe anikindile nnase kugeza kumkoma mndima ywa Zumbe uyo asagulwe kwa kukumbigwa mavuta. Mna kiguhe mjungo wakwe wi hagihi no mtwi wakwe hamwenga ne didumu dya mazi niyo chakeitila." 12 Ivo, Daudi aguhaga udya mjungo ne didumu dya mazi hagihi no mtwi wa Sauli niyo wakeitila. Mna hakwandaga na mnt'hu aone hegu amanyize mbuli iyo, naho hahali enuke mwe zint'hongo, kwaviya Zumbe Mnungu awatendaga wagonese.

13 Niyo Daudi aita nt'hendelo ya kaidi ye dikolongo idyo, na kukimala hale ne difyo dya Sauli. 14 Na kuditanga kwa izwi difyo dya Sauli na Abineli mwana ywa Neli akagamba, "Abineli, togola, waniiva? Abineli niyo auza,

"Weye ni weani ukumwitanga seuta?"

15 Daudi niyo amhitula, "Togola weye hiyo mgosi? Niani aligane na weye mwe Izilaeli? Nii humwamile mkuluwo seuta? Kwaviya mnt'hu yumwenga engilaga aho vileke amkome mkuluwo seuta! 16 Idyo udamanye hiyo mbuli yedi. Enga ivo eli Mnungu, mwaungwa kubanika, kwaviya hamwamile mkulu ywenyu, uyo Zumbe Mnungu amwiikile kwa ndima. Haluse kaula, mjungo wa mkuluwo hamwenga ne didumu dyakwe uneva viyaho?"

17 Sauli abunk'hulaga izwi dya Daudi, niyo amuuza, "Togola, idyo hiyo izwi dyako mwanangu Daudi?" Daudi niyo amhitula,

Heiye mkulu seuta izwi idyo dyangu. 18 Niyo agendeela kulonga, "Mna nii, weye mkulu wagendeela kunitimila miye mndima ywako? Hibangai? Ni wiihi wani hudamanyile? 19 Haluse, mkulu seuta, wive mbuli za mndima ywako. Uneva ni Zumbe Mnungu akutendile wize unitowe, haya ahokele nt'hambiko neikutende uhitule fanyanyi zakwe vileke uleke kunitimila. Mna uneva ni want'hu, haya, Zumbe Mnungu awaligite want'hu awo kwaviya wanigulusa kulawa mwo ukipe akink'hile Zumbe Mnungu wakagamba niite haidamanyile ndima milungu mituhu. 20 Usekunileka nibanikile mwe isi ya wata kwiza, hale na Zumbe Mnungu, nii weye seuta ywa Izilaeli kulawa uzungule ugima wangu enga mnt'hu akongola nk'wale mwo mnima?"

21 Naho Sauli ahitulaga, "Miye hidamanya wiihi. Daudi mwanangu uya. Henikutendele kint'hu kiihile naho kwaviya dielo ugima wangu unda hi wa bule kwako, miye hinda mhezi naho hibanangisa!"

22 Daudi niyo ahitula, "Weye mkulu, mjungo wako uno wiaha, msigile mtowani ywako yumwenga eze auguhe. 23 Zumbe Mnungu amliha kila mnt'hu mhuwilwa na muwagilwa. Dyelo Zumbe nakakuika mwo udahi wangu, mna miye hikutendile kint'hu chochose kwaviya weye kuikwa kwa ndima ya Mnungu. 24 Kaula, enga ivi dyelo hikukomile, Zumbe Mnungu anitendele iivo anihonye na makunt'ho yangu yose!"

25 Sauli niyo amgamba Daudi, "Mnungu akuvikile mwanangu Daudi. Noudamanye mbuli nk'hulu, naho nounde mhumi." Ivo, Daudi niyo akeitila, Sauli naye niyo auya kwe kaya yakwe.