1 Samweli eze adalahale awatendaga wanawe kunda vilongozi mwe Izilaeli. 2 Mwanawe mkulu ywe kilume etangwagwa Yoeli na mdodo naye andaga Abia awo wandaga vilongozi uko Beli Sheba. 3 Mna hawatimilaga mliganyizo wa tati yawe, waungisaga du kukepatila upati, ivo wazumilaga kuhokela matundu ya soni, na kwaza uwagilwa.

4 Ivo, wadala vilongozi wose wa Izilaeli wakeduganyaga, niyo waita uko Lama kwa Samweli, 5 niyo wamgamba, "Kaula haluse wadalahala naho wanawo hawakutimila mliganyizo wako, ivo elo sagula seuta naakilongoze vileke kinde na seuta enga ivo zili isi nt'huhu." 6 Samweli helelwagwa wakagamba kisaguile seuta, ivo Samweli amlombezaga Zumbe, 7 Zumbe naye niyo agamba, "Tegeleza kila kint'hu want'hu icho wakulonga kwako, kwaviya hawakulemele weye, mna wanilemela miye nisekunda seuta ywawe. 8 Kukongela aho nawalavaga mwe isi ya Misili woho wanileka miye na kuvika milungu mituhu mpaka haluse, naho wadamanya kwako ikiya wadamanyanga kwangu. 9 Naivo wategeleze, naho uwakanyise, na kuwagambila pwilili wamanye viya nevungwe kulawa kwawe ni seuta,"

10 Samweli awagambilaga want'hu awo nawakalombeza kunda na seuta, na kila kint'hu kiya Zumbe Mnungu amgambile. 11 Ivi nivo seuta ywenyu naawatendeleni, "Naawaguhe wana wenyu wa kilume niyo awatenda wakugendeza magali na wakugendeza falasi, watuhu nawaguluke kulongole kwa magali yakwe kwaajili ya kumwamila. 12 Wamwenga naawatende vilongozi wa want'hu alufu, wamwenga nawande vilongozi wa want'hu milongo mishano. Wana wenyu nawande walimi we migunda yakwe wakavuna ulozo wakwe na kudamanya vitoanilo va nk'hondo na visonganyilo va magali yakwe. 13 Wana wenyu we kike naawaguhe wadamanye mavuta ya mhemp'he watuhu nawo naawatende wambisi na woka mikate yakwe. 14 Naaguhe migunda yenyu iyedi ya nk'hande, ne migunda iyedi ye mizabibu na iyedi ye mizeituni na kuwenk'ha wandima wakwe. 15 Naaguhe imwenga ya mlongo ye nk'hande yenyu na zabibu zenyu niyo awenk'ha vilongozi we hasi yakwe na wandima wakwe. 16 Naaguhe wandima wenyu na ng'ombe zenyu zigimbale na mp'hunda zenyu na kuzitenda zidamanye ndima kwaajili yakwe. 17 Naaguhe imwenga ya mlongo ye mifugwa yenyu, nyuwe wenye nanywe nomnde watumwa wakwe. 18 Lupisi ulo lukeza mpaka, nyuwe nomlabile kwa usungu kwajili ya masulumizo nompate kulawa kwa uyo seuta mkesaguile wenye, mna Zumbe Mnungu haategeleze kulabila kwenyu."

19 Mna want'hu hawaungile kumtegeleza Samweli, niyo wagamba, "Bule! Chaunga seuta ywetu, 20 vileke kinde enga want'hu wa si nt'huhu, kinde na seuta ywetu suwe wenye akuunga akilongoze umwo kikatowana nk'hondo yetu."

21 Samweli ategelezaga kila kint'hu walongile niyo agenda kumgambila Zumbe Mnungu. 22 Zumbe Mnungu niyo amhitula Samweli, "Damanya kiya wakuunga naho wasaguile seuta. Samweli niyo awagamba want'hu wose waite kwe zikaya zawe."