1 Wafilisiti weze waditahe Disanduku dye Ndagano dya Mnungu, wadiguhaga kulawa Ebenezeli niyo waita nadyo Ashidodi, 2 Wadigalaga Disanduku dya Mnungu niyo wadiika kwe nyumba hagihi ne dihili dikwitangwa Dagoni. 3 Want'hu wa Ashidodi weze wenuke kilokilo mwe dizuwa dya kaidi, waonaga hili dikwitangwa Dagoni digwa hasi mfunt'ha lomo aho he Disanduku dye Ndagano dya Zumbe, wamkimalisaga uyo Dagoni niyo wamwika hant'hu hakwe. 4 Mna kilokilo zuwa ditimile, waonaga hili dikwitangwa Dagoni digwa hasi mfunt'ha lomo naho aho he Disandugu dye Ndagano dya Zumbe, mtwi wakwe ne mikono yakwe vabogozokaga niyo vatomoka hasi he kisisilango, umwili wakwe nuwo wasigalaga du. 5 Ivi nivo vikuleka walavant'hambiko wa Dagoni na want'hu wosee wakwingila mwe nyumba ya kumvika Dagoni uko Ashidodi hawakujata he kisisilango.

6 Zumbe Mnungu awasengelaga vihile want'hu wa Ashidodi na kuwatisa. Awasengelaga vihile woho na want'hu watuhu wa mgihi nawo kwa kuwegaila manyonge ya maihu makulu. 7 Wakaya wa Ashidodi weze waone ayo yalaile niyo wagamba, "Disanduku dya Mnungu ywa Izilaeli dise kwikala aha kwaviya udahi wakwe wakisulumiza suwe na Dagoni mnungu ywetu ." 8 Ivo watumaga wegala ulosi niyo wawaduganyaga hamwenga maseuta wose washano wa Filisiti na kuwauza, "Nekitende vivihi ne Disanduku dye Ndagano dya Mnungu ywa Izilaeli?"

Wadya maseuta niyo wahitula, "Digaleni uko Gati," Ivo wadigalaga uko Gati kwo mzi mtuhu wa Wafilisiti.

9 Disanduku idyo dize dibule uko gati Zumbe awasengelaga vihile mzi uwo nawo, niyo awatenda wogohese naho awasulumizaga kwa maihu ayo yenelaga mwa want'hu wose wo mzi, kukongela wadodo mpaka wakulu. 10 Ivo wadigalaga Disanduku dye Ndagano uko Ekuloni mzi mtuhu wa Wafilisiti, mna dize dibule uko want'hu wailaga wakagamba, "Wegala Disanduku dye Ndagano dya Mnungu ywa Izilaeli aha, vileke wakikome suwe chose." 11 Ivo wawetangaga hamwenga wakulu wose wa Wafilisiti niyo wagamba, "Diuseni Disanduku dye Ndagano dya Mnungu ywa Izilaeli, diuye hant'hu hakwe vileke sema dinakikome suwe hegu want'hu wetu." Kwandaga na wogohi mwo mzi wose kwaviya Mnungu nakawasulumizisa. 12 Wadya wandaga hawabanike wahotaga maihu niyo ndilo yawe yabula mpaka kulanga.