1 Mwe dizuwa dya katatu, Daudi na want'hu wakwe wauyaga Kwa mwenye mzi ya Yuda. Wamaleki wandaga waitowa kale Kwa mwenye mzi ya Yuda hamwenga no mzi wa Sikilagi na kuoka moto. 2 Wandaga wawataha wavele na want'hu wose wandile mwo mzi uwo, wakulu kwa wadodo. Awo watahigwe wahalawaga nawo wakanda wagima, haheina kumkoma mnt'hu yeyose. 3 Daudi na want'hu wakwe weze wabule mwo mzi wabwiilaga mzi wokwa moto, wavele wawe na wanawe we kilume na we kike watahigwa. 4 Naho Daudi na want'hu wakwe weze watule ndilo, wailaga niyo wasokela.

5 Wavele waidi wa Daudi, Ahinoamu kulawa Yazeli na Abigaili uyo andaga mkaziwe Nabali, woho nawo watahagwa.

6 Haluse, Daudi andaga mwe makunt'ho makulu kwaviya want'hu wakwe wandaga na usungu mwe miyoyo yawe kwa kwaza wanawe, ivo wakanda kumtisa kwa kumtowa maiwe. Mna Daudi akeink'ha moyo kwa kumhuwila Zumbe Mnungu. 7 Daudi niyo amgamba mlavant'hambiko Abiatali mwana Ahimeleki, "Lete kasuke ka ulavant'hambiko. Abiatali niyo amwigaila. 8 Daudi niyo amlombeza Zumbe Mnungu akagamba, togola niditimile fyo dya watahi awo? Naho togola neniwabwiile uko kwe sila?"

Naye niyo ahitula, "Watimile, kindedi noubwiile na kuwakombola awo watahigwe."

9 Ivo, Daudi niyo ahalawa hamwenga na want'hu magana mtandatu awo andile nawo. Weze wabule mwe kazuto ka Besoli, wamwenga wawe wasigalaga aho. 10 Mna Daudi agendeelaga kuditimila difyo idyo akanda na want'hu magana mane, na want'hu magana maidi wasigalaga aho kwaviya wasokelaga vitendese, hawadahaga kudendeluka mwe kazuto ako. 11 Wadya want'hu wandaga na Daudi wambwilaga mnt'hu yumwenga Mmisili mwe nyika, woho nawo wamwigalaga kwa Daudi. Mnt'hu uyo hadyaga chochose hegu kunywa mazi kwa lupisi lwa mazuwa matatu, kilo na msi. 12 Naho wamwink'haga mnt'hu kabesu kwo mkate na mkate wa tini na vikwasa viidi va zabibu zinyaile. Eze ibinde ukudya, apataga ludole. 13 Daudi niyo amuuza, "Mkuluwo niani? Naho kulawahi?" Yehe niyo amgamba,

"Miye ni mbwanga wa Misili. Ni mtumwa ywa Mmaleki yumwenga. mkulu anilekaga mazuwa matatu yomboke kwaviya nehinda mnyonge. 14 Suwe nekitowa mizi ya Wakeleti imwe nt'hendelo ya Yuda ne mizi ye nk'holo za Kalebi, na kuwoka mzi wa Sikilagi."

15 Daudi niyo amuuza, "Togola, wadaha kunigala mwe difyo idyo dya watahi?" yudya mbwanga niyo amhitula, "Uneva noukelisile kwa zina dya Mnungu kugamba hounikome, hegu kunivuza kwa mkulu, nohwigale." 16 Yudya mbwanga amlongozaga Daudi mpaka kudya wandaga watahi. Weze wabule uko wabwiilaga wasambala kila hant'hu kwaviya wandaga wadya na kunywa, kwaviya vint'hu watahaga kulawa kwa Wafilisiti ne isi ya Yuda zandaga zibinda wingi. 17 Daudi atowanaga nawo kukongela kilokilo mpaka kisingi. Hahandaga na mgosi yeyose ahonile, vituhu vakwe ni wadya wabwanga magana mane wakwile ngamia na kuguluka. 18 Daudi ayokolaga kila kint'hu chatahagwa na Wamaleki, hata na wavele wakwe waidi. 19 Chochose chandile cha kwawe, kikanda kidodo hegu kikulu, mwana kike hegu ywa kilume, Daudi awakombolaga. 20 Naho Daudi ayavuzaga mafyo ya ngoto na ngombe na want'hu wakwe wakasaka mifugwa iyo, wakailongoza kulongole ye mifugwa mituhu wakagamba, "Ivi ni vitahigwa va Daudi."

21 Daudi niyo awauwiya wadya want'hu magana maidi awo walekagwa kwa kazuto ka Besoli kwaviya wandaga wasokela kumtimila. Wadya want'hu weze wamuone Daudi na hamwenga na wadya wandile hamwenga naye, waita kuwasingila. Daudi eze abule hagihi na want'hu awo, awalamsaga. 22 Mna want'hu wose wank'hani na waihile mwa want'hu wamtimile Daudi, wakagamba, "Hakiwenk'he want'hu awa vitahigwe vose kikombole kwaviya hawaitile hamwenga na suwe. Ivo wawaguhe wavele wawe na wana wawe, vileke wakeitile."

23 Daudi niyo amgamba, "Hiyo ivo ndugu zangu. Homdahe kudamanya ivo kwaviya Zumbe niye akink'hile vitahigwa ivo. Achamilaga vedi, na kuwatenda kiwahume wank'hondo wetu. 24 Hahali mnt'hu naawazumileni mwe zifanyanyi zenyu izo! Yudya aitile kwe nk'hondo na yudya asigale na nt'hanu zetu, kila mnt'hu neenk'higwe viligane." 25 Daudi atendaga kihendo icho cho kupangilana viligane ivo vint'hu vitahigwe inde sigilizi, naho yatimilwa ni Waizilaeli kukongela aho mpaka dyelo.

26 Daudi eze auye Sikilagi, awaigailaga wambwiyaze, awo wadala wa Yuda, mwa viya vitahigwe akagamba, "Nawegaila mageleko ya vitahigwe mwa wank'hondo wa Zumbe Mnungu." 27 Mageleko ayo yandaga kwaajili ya wakaya wa Beteli, na wakaya wa Lomoti ya Kwa mwenye mzi ya Yuda, na wakaya wa Yatili, 28 na wakaya wa Aloeli na wakaya wa Sifomoti na wakaya wa Eshitemoa, 29 wakaya wa Lakali na wakaya we mizi ya Wayelameeli na wakaya we mizi ya Wakemi, 30 wakaya wa Holima na wakaya wa Bolashani na wakaya wa Atahaki, 31 na wakaya wa Hebuloni. Daudi awegailaga naho wakaya we mizi yose iyo yehe na want'hu wakwe wandaga wakaitalamkila.