1 Daudi ahalawaga uku akagulukila mwe mp'hanga hagihi na mzi wa Adulamu. Wakuluze na wanduguze watuhu weze weve kugamba andaga aho, wose wagendaga kulungana naye. 2 Want'hu wose wandaga na makunt'ho, na wadya wandaga wakatigizwa, na wadya wandaga na usungu mwe mioyo yawe walunganaga na Daudi. Kwa umwenga wawe wandaga want'hu magana mane. Yehe naye andaga kilongozi ywawe.

3 Kulawa uko, Daudi aitaga mpaka Mizipa mwe isi ya Moabu, Akamgamba seuta ywa Moabu, "Nakulombeza, tate na mnala wekale aha hako mpaka nimanye Mnungu naanitendelei." 4 Ivo, Daudi awalekaga welesi wakwe wekale na seuta ywa Moabu, woho nawo wekalaga uko. Kwa lupisi ulo lwose Daudi andaga kakefisa kwe mp'hanga.

5 Niyo mlotezi Gadi amgambaga Daudi, "Usekwikala aha he mp'hanga, halawe aaha wiite mwe isi ya Yuda." Ivo Daudi niyo ahalawa, na kuita mwe mbago ya Heleti.

6 Zuwa dimwenga, Sauli andaga Gibea, ekalaga hasi yo mkwazu mwo mnima, uku akanda na mjungo wakwe mwo mkono na wandima wakwe wandaga wakimala mnk'handa mwakwe. Ivo agambilagwa kugamba Daudi na want'hu wakwe waoneka. 7 Sauli naye niyo awagamba wandima wakwe, "Haluse nyuwe want'hu we dikabila dya Benjamini nitegelezeni, togoleni mwafanyanya kugamba uyu Daudi naawenk'heni kila yumwenga mgunda wa zabibu? Hegu kugamba nawatendeni kunda watoani wa maelufu hegu wakulu wa watowani wa want'hu magana? 8 Nii nyuwe nyose mnda na mzungu mwa miye? Hehali hata yumwenga akunigambila mbuli ino, mwo lupisi mwanangu akaika Ndagano na mwana Yese. Naho nii hahali hata yumwenga ywenu ana kinyulu hegu mwanangu mwenye amsonk'heleza mndima ywangu mwa miye na kuninyatila enga ivi dyelo?"

9 Naho Doegi kulawa Muedomu uyo akimalaga hagihi na wandima wa Sauli akagamba "Nehimuona mwana wa Yese akeza Nobu kwa mlavant'hambiko Ahimeleki mwana ywa Ahitubu. 10 Ahimeleki niyo amlombezela Daudi kwa Zumbe Mnungu na kumwink'ha nk'hande na idya sime ya Mfilisiti Goliati."

11 Seuta Sauli niyo amsigiila mlavant'hambiko Ahimeleki mwana Ahitubu hamwenga ne mp'huga ya ise awo wandile walavant'hambiko uko Nobu, wetangwe. Wose niyo wamwitila seuta Sauli. 12 Sauli niyo agamba, "Haluse tegeleza weye mwana Ahitubu." Ahimeleki niyo amhitula, "Haya mkulu."

13 Sauli niyo amgamba, "Nii weye na Daudi mwana Yese mnda hamwenga mwo mzungu mwa miye? Nii nokumwink'ha mikate na sime, naho niyo wamlombezela kwa Zumbe Mnungu? Haluse kanihituka naho anongola vileke anikome."

14 Ahimeleki niyo amhitula seuta, "Mwa wandima wako Daudi ni kuhuwilwa kujink'ha wose. Yehe ni mkwe mnima ywako weye seuta, yehe ni mkulu ywa wamizi wakukwamila, naho atunywa kujink'ha wose mwe kaya yako. 15 Dielo hiyo nk'hanana ya bosi kumlombeza Mnungu kwaajili yakwe. Seuta usekunifanyanya miye hegu mnt'hu yeyose mwe mp'huga ya tate mwo mzungu uwo. Miye mndima ywako, himanyize dyodyose dinde kulu hegu dodo mwe mbuli iyo."

16 Mna seuta Sauli niyo amgamba, "Ahimeleki ikindedi noukomwe weye hamwenga na mp'huga yako na ya iso." 17 Sauli niyo awagamba wamizi wakwe wakumwamila, "Hitukeni na kuwakoma walavant'hambiko wa Mnungu kwaviya woho wazumilana na Daudi, nawamanya kugamba anyilikaga mna woho hawanigambile." Mna wamizi awo hawenulaga mikono yawe vileke wawakome walavant'hambiko wa Zumbe Mnungu. 18 Kwaivo seuta Sauli amgambaga Doegi, "Weye hituka ukawakome walavant'hambiko." Doegi kulawa Edomu aitaga na kuwakoma walavant'hambiko wose, zuwa idyo, Doegi awakomaga walavant'hambiko milongo mnane na shano awo wakuvala vizibao ving'aile. 19 Naho niyo awakoma kwa sime wakaya wose wa Nobu, mzi wa walavant'hambiko, wavele na wagosi, wana wadodo na wank'honk'ha, ng'ombe na mp'hunda na ngoto.

20 Mna Abiazali, yumwenga ywa wana kilume ywa Ahimeleki mwana ywa Ahitubu, eze anyilike aitaga kwa Daudi. 21 Abiazali amgambaga Daudi ivo Sauli awakomaga walavant'hambiko wa Zumbe Mnungu. 22 Naye Daudi niyo amgamba Abiathali, "Nehimanya du mwe dizuwa diya namuonaga Doegi kulawa Edomu kugamba naamgambile Sauli. Ivo ni miye niwahosile want'hu we mp'huga yako wakomwe. 23 Weye kikalanye naho usekogoha kwaviya Sauli aunga akikome miye na weye, kinandanya na miye houkomwe."