1 Want'hu wa Kiliyati Yelimu wezaga niyo wadiguha Disanduku dye Ndagano dya Zumbe, na kudigala kwe nyumba ya Abinadabu uko kwe kagulu, niyo wamwiika Eliyazali uyo mwanawe ywe kilume ande mwamizi ywe Disanduku dye Ndagano dya Zumbe Mnungu.

2 Sanduku dye Ndagano dya Zumbe Mnungu dyekalaga Kiliyati Yelimu kwa lupisi lutali, yabulaga miyaka milongo miidi. Mwo lupisi ulu lwose Waizilaeli wamwiilaga Zumbe Mnungu kwa wambizi.

3 Samweli niyo awagamba want'hu wose wa Izilaeli, "Uneva mwamhitukila Zumbe Mnungu kwa miyoyo yenyu yose, mwaungwa kuileka milungu yose ya watakwiza na kuusa mahili ya Ashitaloti, mtimileni Zumbe Mnungu kwa moyo wose na kunda wandima wakwe yehe ekedu, yehe naye naawayokoleni kulawa mwo udahi wa Wafilisiti." 4 Ivo Waizilaeli wausaga mahili ya milungu ya Baali na Mashitaloti, niyo wamvika Zumbe Mnungu uuyo du.

5 Niyo Samweli agamba, "Waduganyeni Waizilaeli wose uko Mizipa, miye neni mlombeze Zumbe Mnungu kwaajili yenyu." 6 Ivo Waizilaeli waduganaga uko Mizipa, watekaga mazi niyo wayetila ha Zumbe kunda malavo. Wafungaga mwe dizuwa diya dyose, niyo wagamba, "Kidamanya wavu kwa Zumbe." Yandaga ni uko Mizipa Samweli andaga mlamuzi mwa Waizilaeli.

7 Umwo Wafilisiti weze weve Waizilaeli wakeduganya uko Mizipa, wakulu washano wa Wafilisiti waitaga wakatowane na Waizilaeli, Waizilaeli weze weve mbuli iyo wogohesaga. 8 Niyo wamgamba Samweli, "Gendeela kukilombezela kwa Zumbe akiyokole kulawa kwa Wafilisiti." 9 Niho Samweli aguhaga mwana ngoto niyo ayoka yose kunda nt'hambiko kwa Zumbe, niyo alombeza kwa Zumbe awaambize Waizilaeli, Zumbe naye niyo ahitula. 10 Umwo Samweli andaga akalava int'hambiko Wafilisiti wasogelaga vileke wawatowe Izilaeli. Mna mwe dizua diya Zumbe Mnungu niyo alonga kwa izwi dya mtint'hilo kwa Wafilisiti, niyo awazaganya Wafilisiti, Wafilisiti wawanyilikaga Waizilaeli.

11 Waizilaeli walawaga Mizipa na kuwagulusa Wafilisiti mpaka hagihi no mzi wa Betikali, na kuwakoma uko.

12 Samweli niyo aguha iwe, adiikaga hagati yo mizi ya Sheni na Mizipa, niyo agamba, "Zumbe kachambiza suwe hata ivi. Niyo adink'ha zina nidyo Ebeneza, nuko kugamba, mpaka ivi haluse Zumbe Mnungu kachambiza." 13 Ivo Wafilisiti watowagwa, Zumbe Mnungu naye awakindilaga wase kuikump'hukila Izilaeli mwo lupisi lwose aho Samweli andaga mgima. 14 Mizi yose yatahagwa ni Wafilisiti hagati ya Ekuloni na Gati yawavuzagwa kwa Izilaeli, naivo Waizilaeli waikombolaga isi yawe yose, naho kwandaga na utondowazi mwa Waizilaeli na Wakanaani.

15 Kukongela aho, Samweli agendeelaga kunda kilongozi ywa Izilaeli mwo wikazi wakwe wose. 16 Kila mwaka naakazungulukila Beseli na Giligali na Mizipa na mwose umwo andaga akawalamula Waizilaeli. 17 Mna naho andaga akauya Lama kwaviya nuko kwandaga ikaya yakwe,naho uko Lama nako andaga akawalamula Waizilaeli, naho uko nako azengaga kilingo cha Zumbe.