1 Mwo lupisi lutuhu, Wafilisiti nawaduganya watowani wawe wakatowane na Waizilaeli. Akishi niyo amgamba Daudi, "Waungwa umanye kugamba weye na watowani wako mwaungwa mnde watowani wangu."

2 Daudi niyo amhitula Akishi, "Heiye nouone kint'hu mndima ywako naadamanye."

Akishi niyo amgamba, "Weye ni weye nounamile miye mwenye."

3 Mwo lupisi ulu, Samweli andaga kabanika, naho Waizilaeli wose nawanda wamhongezela kale na kummosela msanga uko kwo mzi wakwe uko Lama. Sauli andaga kawagulusa walotezi na wagangana mwe isi.

4 Wafilisiti wakeduganyaga na kuika nk'hambi yao uko Shunemu, Sauli naye awaduganyaga Waizilaeli wose na kuika nk'hambi yao kwo mnima wa Giliboa. 5 Sauli eze akaule watowani wa Wafilisiti ogohesaga na kunda na lukeng'ent'ha. 6 Hata eze amlombeze Zumbe Mnungu, Zumbe Mnungu hamhitule kwa sozi hegu kwa maiwe ya kuzungula ulosi wa Mnungu yakwitanwa Ulimu hegu kwa sila ya walotezi. 7 Niho Sauli awagamba wandima wakwe, "Nizunguileni mvele mgangana vileke niite akanikawiile mnamulo." Wandima wakwe niyo wamhitula,

"Eyaho mgangana yumwenga uko Edoli."

8 Ivo, Sauli niyo aavala mavalo matuhu vileke asekumanyika kugamba ni seuta, aitaga uko hamwenga na want'hu wakwe waidi. "Wabulaga nekilo kwa uyo mvele mgangana, akamgamba nikawiile mnamulo naho umlete mwe isi, mnt'hu yeyose huunga hugambile."

9 Yudya mvele niyo amgamba, "Weye kumanya icho adamanye seuta Sauli, kawausa walotezi na wagangana wose mwe isi ya Izilaeli. Haluse nii wanitegela vileke unigwile na kunikoma?"

10 Sauli niyo amgamba, "Nakelisa kwa zina dya Zumbe Mnungu mta udahi, hokulaile kint'hu chochose kiihile kwako mwe mbuli ino."

11 Yudya mvele niyo amuuza, "Togola hwigaile ani kulawa uko kwe isi ya wabanike?" Sauli niyo ahitula, "Nigaile Samweli."

12 Yudya mvele eze amuone Samweli, agutaga na kumgamba Sauli, "Nii kunidant'ha? weye ni seuta Sauli!"

13 Seuta Sauli niyo amgamba, "Usekogoha!" "Waona mbwai?" Yudya mvele niyo amhitula, "Naona muye akulaila mwe isi."

14 Sauli niyo amgamba mvele, "Ni mliganyizo wa ani? Yudya mvele niyo amgamba,

"Mgosi adalahale akezinganize valo akwela kulanga."

Aho Sauli niyo akombaganya kugamba uyo ni Samweli. Sauli niyo afunamiza mtwi mpaka hasi kwa kumtunya.

15 Samweli niyo amgamba Sauli, "Nii wanisulumiza kwa kunikweza uku?"

Sauli niyo amhitula, "Miye nina mank'huto makulu! Wafilisiti watowana nk'hondo na miye, naho Mnungu kanileka, naho hanihitule hata kwa sila ya walotezi hegu kwa sozi. Naivo higamba hwitange vileke unilagise dyo kudamanya."

16 Samweli niyo agamba, "Nii waunga hwambize mna Zumbe kakuleka naho kanda mnk'hondo ywako? 17 Zumbe Mnungu kakudamanyila kiya alongaga kwa kombokela miye. Zumbe kauhausa useuta wako, naho kamwink'ha Daudi uyo mnk'hondo wako. 18 Kwaviya hutimile yadya alongile Zumbe Mnungu, naho huwakomile pele Wamaleki na kila kint'hu wandile nacho enga ivo alongile Zumbe. Nivo vilekile Zumbe Mnungu kakudamanyila ivo. 19 Hamwenga na ayo, Zumbe Mnungu naakutende weye na Waizilaeli wose mhumwe ni Wafilisiti naho luvi weye na wanao nomnde hamwenga na miye, naho watowani wa Izilaeli nawahumwe ni Wafilisiti."

20 Aaho, Sauli akanda na wogohi kwajili ye zimbuli alongile Samweli agwaga kifulifuli, naho handaga na ludole lwolwose, kwaviya hadyaga kint'hu chochose kilo na msi. 21 Naho yudya mvele aitaga kwa Sauli naho eze akaule kugamba Sauli andaga na wogohi vitendese, amgambaga, "Miye mndima ywako nadaha kubanika kwaviya hikutendela kiya unigambile hudamanyile. 22 Haluse, nitegeleze miye mndima ywako, nohudamanyile cho kudya ludodo unde na ludole vileke uuye uko ulawile." 23 Mna Sauli alemelaga na kugamba, "Henidye." Mna wadya wandima hamwenga na yudya mvele wamhembelezaga adye, naye niyo awategeleza. Ivo enukaga no kwikala mwo lusazi. 24 Yudya mvele andaga na kadama kakwe kamwenga kwe kaya kagimbale, niyo akachinja. Aguhaga unga we ngano, niyo oka mkate hougeligwe ugwadu. 25 Na kumwink'ha Sauli, hamwenga na wandima wakwe, woho nawo niyo wadya na kukonga nt'hambo kilo icho.