1 Sauli eze auye kulawa kwe nk'hondo na Wafilisiti, agambilagwa kugamba Daudi eyuko kwe nyika za Engedi. 2 Niyo Sauli awaguha watoani alufu nt'hatu awo wandile wedi hewekogoha mwe isi yose ya Izilaeli, niyo wagenda kumzungula Daudi na want'hu wakwe mwo luwe wa mbuzi mwitu. 3 Sauli umwo andaga akaita, nakabula mwe mp'hanga imwenga imgihi mwe didewa dya ngoto na kwingila umwo, vileke azunguluke. Daudi na want'hu wakwe nawanda wekala kundani mwe mp'hanga iyo. 4 Want'hu wa Daudi niyo wamgamba, "Diya dizuwa akugambile Zumbe Mnungu kugamba nohutende uwahume kwa wank'hondo wako. Weye nawe nouwatendele ivo nouunge. diyelo zuwa idyo dibula." Niho Daudi amwitilaga Sauli kwa kinyele kwa kunyuma, na kukant'ha kalebetu ke divalo dyakwe. 5 Daudi niyo akonga kunda na kinyulu mwo moyo wakwe kwaviya akant'haga kalebetu ke divalo dya Sauli kwa kinyele. 6 Nakawagamba want'hu wakwe, "Henimtendele mbuli ino zumbe ywangu seuta kwaviya yehe kasagulwa kwa kukumbigwa mavuta kwajili ya Zumbe Mnungu. Henimtowe kwaviya yehe kakumbigwa mavuta ni Zumbe Mnungu ande seuta." 7 Kwa ulosi uwo, Daudi awalemezaga want'hu wakwe wase kumtowa Sauli. Niyo Sauli akimala na kufosa mwe mp'hanga na kugendeela ne nt'hambo yakwe. 8 Daudi niyo enuka na kufosa mwe mp'hanga na kumwitanga Sauli, "Zumbe ywangu seuta!" Seuta Sauli eze akaule kunyuma, Daudi afunamaga mpaka hasi kwa kumtunya. 9 Niyo amgamba, "Nii wawategeleza want'hu wakukugamba Daudi aunga akulumize? 10 Haluse kaula, dyelo kukeonela mwenye, umwo wandile mwe mp'hanga, Zumbe Mnungu nakanink'ha udahi wa kukugwila. Want'hu wangu wanigambaga hukome, mna nehikuleka hagamba hehukome, kwaviya kusagulwa ni Zumbe kunda seuta. 11 Tate kaula kalebetu ke suke yako nnanako mwe mikono yangu. Kwa kukant'ha kalebetu ke suke yako haheina kukukoma, ni kindedi kugamba miye hina masa yoyose kwako naho hisaguke mna weye wanongola vileke unikome. 12 Zumbe Mnungu asengele mwa miye na weye, naho Zumbe anilihizile kwako mna miye heni geze kukulumiza. 13 Kumbukila ulosi wa kale ukugamba ‘Kwa mnt'hu mwiihi kwalawa wiihi.’ Mna miye henikutowe. 14 Haluse weye seuta ywa Izilaeli kaula mnt'hu ukuunga kumkoma! Togola wamzungula ani? wazungula kuli difile hegu watimila boi! 15 Ivo Zumbe Mnungu ande mlamuzi mwa weye na miye. Yehe naakaule mbuli ino, naanigombele na kuniyokola kulawa kwako."

16 Daudi eze ibinde kulonga, Sauli niyo agamba, "Togola izwi idyo dyako weye mwanangu Daudi?" Sauli niyo ailisa. 17 Niyo amgamba Daudi, "Weye uywedi kujink'ha miye. Weye kunitendela yedi, mna miye hikutendela yaihile. 18 Dyelo kulagisa ivo wili ywedi kwangu, kwaviya hunikomile, hamwenga na kugamba Zumbe nakakwink'ha udahi wa kunikoma. 19 Togola, mnt'hu anamgwila mnk'hondo wakwe naamleke aite iviivi du? kwa diya unidamanyile dielo, Zumbe akutendele ayedi! 20 Haluse himanya kugamba kindedi nounde seuta ywa Izilaeli, na useuta ywa Izilaeli noutogezwe mwe isi yako. 21 Mna niikile kilapi kwa Zumbe kugamba houwause want'hu wangu, hegu kuusa zina dyangu mwe mp'huga ya tate." 22 Daudi niyo akelisa kwa Sauli. Sauli niyo auya kwe kaya yakwe, mna Daudi na want'hu wakwe niyo waita hant'hu hawe ha kukefisa.