1 Daudi niyo anyilikila Nayoti mwo mzi wa Lama, niyo aita mpaka kwa Yonasani, na kumgamba, "Hibanangai? Nna masa yani? Wavu wani nidamanye kwa iso vikuleka anikome?" 2 Yonasani niyo amhitula, "Idyo dinde hale na weye. Houbanike. Tate haadamanye mbuli yeyose, dinde kulu hegu ndodo, haheina kunigambila. Hata mbuli ino hakudaha kunifisa!" 3 Daudi niyo aika kilapi, akagamba, "Kindedi iso kamanya vedi ivo ukuniungisa, niyo alonga mwo moyo wakwe mwenye akagamba, Yonasani hakuungwa kumanya imbuli ino, sema anengile kinyulu. Mna nalonga kindedi ha Zumbe Mnungu mta udahi kugamba, file ihagihi na miye!"

4 Yonasani niyo amgamba, "Dyodyose noulonge nohudamanyile."

5 Daudi niyo amgamba, "Luvi ni kinyemi cho kulawa mnenge, naho nakawiilwa kudya nk'hande hamwenga na seuta. Mna nileke hakefise uko kwo mgunda mpaka zuwa dya katatu kisingi. 6 Iso hananione mwo kudya nk'hande, naho uneva ananiuza mbuli zangu mgambile, Daudi kanihembeleza nimwink'he luneka vileke aite kwo mzi kwakwe Betelehemu, kudamanya nt'hambiko ya kila mwaka hamwenga no lukolo lwakwe. 7 Uneva iso ana gamba ‘Vedi,’ Miye mndima ywako neninde na utondowazi. Mna ananda na maya, umanye akawiila kunidamanyila mbuli iihile. 8 Ivo nidamanyile kwa kuunga kwako kwaviya kuika ndagano ikukile na miye, miye mndima ywako ha Zumbe Mnungu. Mna uneva hibalanga, nikome weye mwenye, nii unigale kwa iso vileke anikome?"

9 Yonasani niyo ahitula, "Bule, fanyanyi iyo inde hale na weye, uneva namanyize kugamba tate nakakuungila yaihile weye, nehinda hikukufisa?"

10 Daudi niyo auza, "Nenimanye vivihi uneva iso nakuhitule kwa luhahila?"

11 Yonasani niyo amhitula, "Soo kite kwo mgunda!" Ivo niyo waita. 12 Yonasani niyo amgamba Daudi, "Zumbe Mnungu ywa Izilaeli ande muwona ywetu. Luvi hegu kisindo lupisi enga ulu nenimuuze tate. Inanda fanyanyi zakwe mwa weye ni zedi nohugambile." 13 Zumbe Mnungu anikome uneva Sauli afanyanya kukukoma, miye name nohwiike hale aho nowinde na utondowazi. Zumbe Mnungu ande hamwenga na weye enga ivo andile hamwenga na tate! 14 Naho uneva nenigendeele kunda mgima, weye toza kiya kilapi kikukise na unde mhuwilwa, uneva nna banika, 15 usekuleka kuwaambiza want'hu we mp'huga yangu kwa uhuwilwa mazuwa yose. Zumbe Mnungu naye, aho akeza kwiza kuwakoma pele wank'hondo wangu kulawa mwe isi, 16 Ivo Yonasani aikaga ndagano ne nyumba ya Daudi umwo akagamba, "Zumbe Mnungu awakome pele wank'hondo wa Daudi."

17 Kwa lupisi lutuhu naho, Yonasani amgambaga Daudi aike kilapi viligane na lukunde lwakwe kwa Yonasani, kwaviya amuungisaga Daudi enga ivo akeungise yehe mwenye. 18 Niyo amgamba Daudi, "Luvi ni kinyemi cho kulawa mnenge, want'hu nawaone kugamba huhali, kwaviya difumbi dyakwo hedinde na mnt'hu. 19 Naho kisindo, want'hu nawakuswese. Zuwa idyo ita hadya wakefisaga mwe mbuli ino umwo yandile hainati, ukakefise he kiumbiko cha maiwe. 20 Miye nenilase misale mitatu mnk'handa nk'handa kwa kugamba naonyekeza ahadya. 21 Niyo nenimtume mbwanga aite akaizungule misale iyo. Nna mgamba ‘Kaula imisale iyo iyaho wili, iguhe, ivo nounde na utondowazi,’ weye nawe noukelavilize hant'hu ukefisile, kwaviya naika kilapi kwa Zumbe Mnungu mta udahi, kugamba nounde na utondowazi haheina uwihi wowose. 22 Mna nnamgamba, ‘Kaula, misale ihale ya aho,’ uhalawe aho, kwaviya Zumbe Mnungu naande aunga unyilikile hale. 23 Kuligana ne vilapi kiikilane, Zumbe Mnungu naa kikaule vileke kise kujala kilapi chetu mazua yose."

24 Ivo, Daudi niyo akefisa mwo mgunda. Mwo lupisi lwe kinyemi cho kulawa kwo mnenge kize kibule, seuta Sauli ekekala vileke adye. 25 Enga ivo azoele, seuta ekekala mwe difumbi dyakwe dyandile hagihi no lukandula. Yonasani niyo ekala kulongole kwakwe, Abineli naye ekalaga hagihi na seuta. Mna hant'hu ha Daudi handaga hahana mnt'hu. 26 Mwe dizuwa idyo Sauli halongaga dyodyose, kwaviya nakafanyanya kugamba Daudi nakapata ubanike hegu yehe hazumilwe kunda mwe kinyemi icho. 27 Mwe dizuwa dya kaidi dye kinyemi cho kulawa mnenge, hant'hu ha Daudi handaga hahana mnt'hu. Sauli niyo amuuza mwanawe Yonasani, "Nii Daudi mwana ywa Yese hezile mwo kudya nk'hande gulo na dyelo?"

28 Yonasani niyo amhitula, "Anilombezaga vitendese nimlekele aite Betelehemu. 29 Anilombezesaga akagamba, ‘Nilekele nileke niite kwa wandugu zangu, kwaviya wadamanya nt'hambiko uko kwo mzi, naho ndugu yangu anigamba niite uko. Uneva kunizumila nilekele niite kwa wandugu zangu.’ Nivo vilekile hahali aha ho kudya nk'hande hamwenga na seuta."

30 Aho Sauli niyo anda na maya mwa Yonasani, na kumgamba, "Weye mwana ywa mvele asaguke naho mnk'hani! Himanya kugamba kumsagula mwana ywa Yese kwa soni zako mwenye, na kumgela soni nyokwe! 31 Togola humanyize kugamba Daudi akanda mgima, weye houpate luneka lwa kunda seuta ywe isi ino? Haluse ita ukamlete aha hangu, kwaviya vaungwa akomigwe."

32 Yonasani niyo amwihitula, "Nii akomigwe? Kabangai?"

33 Mna Sauli niyo amduila mjungo Yonasani vileke amkome. Aho niho Yonasani abunk'hulaga kugamba kindedi ise andaga akaunga amkome Daudi. 34 Aaho Yonasani akanda na maya yatendese, ahalawaga, naho hadyaga nk'hande yeyose zuwa idyo dya kaidi dye kinyemi cho kulawa umnenge. Yonasani engilaga kinyulu vitendese mwa Daudi kwaviya ise amgelaga soni. 35 Luvi mtondo, Yonasani aitaga kudya kwo mgunda, akadugane na Daudi enga ivo walagane. Aitaga uko hamwenga na mbwanga yumwenga. 36 Eze abule uko amgambaga yudya mbwanga ywakwe, "Guluka ukaizungule imisale iyo nenitoe." Yudya mbwanga umwo andaga akaguluka, Yonasani alasaga msale niyo womboka halanga ho mtwi wakwe wa uyo mbwanga. 37 Yudya mbwanga eze abule aho msale ugwele, Yonasani niyo amwitanga, "Msale ukulongole kwako. 38 Sunguza, usekukimala hant'hu aaho ni aho." Yudya mbwanga aduganyaga misale na kumwigaila zumbe ywakwe. 39 Mna yudya mbwanga hamanyaga chochose mwa udamanyi uwo. Wamanyaga ni Yonasani na Daudi du. 40 Yonasani niyo amwik'ha yudya mbwanga vitoanilo vakwe na kumgamba "Ita uuye kwo mzi."

41 Ivo yudya mbwanga eze ahalawe, Daudi niyo enuka na kulawa hant'hu akefisaga hagihi ne kiumbiko cha maiwe. Afunamizaga mtwi hasi ha ha Yonasani nk'hanana nt'hatu kwa kumtunya. Wose waidi Daudi na Yonasani wakekumbatilaga na kuila. Daudi andaga na usungu kujink'ha Yonasani. 42 Ivo Yonasani niyo amgamba Daudi, "Genda mp'heho. Kiika kale kilapi kwa Zina dya Zumbe Mnungu akikaule mazuwa yose vileke kisekujala kilapi, mwe vyeleko vako na vyeleko vangu." Daudi niyo enuka na kuita, Yonasani naye auyaga kwo mzi.