1 Mbuli ya Zumbe yezaga kwa Samweli na Izilaeli yose. Mwo lupisi ludya Wafilisiti wakeduganyaga wakatowane na Waizilaeli, ivo Waizilaeli waikaga nk'hambi uko Ebenezeli, Wafilisiti nawo waikaga nk'hambi yawe uko Afeki. 2 Wafilisiti wakepangaga watowane na Wazilaeli. Umwo nk'hondo ize yenele Waizilaeli watowagwa ni Wafilisiti. Wakomagwa want'hu alufu nne kwe nk'hondo. 3 Want'hu weze wauye kulawa kwe nk'hondo, vilongozi wa Izilaeli wauzaga, "Nii Zumbe kawaleka wafilisiti wakitowe dyelo? Kiteni kikadiguhe Disanduku dye Ndagano kulawa Shilo, vileke ande hamwenga na suwe na kukiyokola kulawa kwa wank'hondo wetu." 4 Ivo watumaga wegalaga ulosi uko Shilo, niyo wadileta Disanduku dye Ndagano dya Zumbe Mnungu mta udahi uyo akwikala mnanga mwe viumbwa vina mawawa vikwitangwa Makelubi. Naho wadya wana waidi we kilume wa Eli, Ofini na Fenehasi waitaga wakanda ne Disanduku dye Ndagano dya Mnungu.

5 Sanduku dye Ndagano dya Zumbe dize dibule kwe nk'hambi, Waizilaeli wose wenulaga maizwi yawe vatendaga isi isingisike. 6 Wafilisiti weze weve ukwanga uko wauzaga, "Maizwi aya yose mwe nk'hambi ya Waibulania niyo imbwai?" Umwo weze wabunk'hule kugamba Disanduku dye Ndagano dya Zumbe Mnungu dibula mwe nk'hambi ya Waibulania. 7 Wafilisiti wogohaga niyo wagamba, "Milungu iza mwe nk'hambi yawe. Hangi suwe wenye, kint'hu enga iki hakinati kilaile kukongela nk'hongo! 8 Hangi suwe wenye! Niani akuunga akiyokole kulawa umu mwe milungu ina udahi? Ino niyo milungu yawachinjaga Wamisili uko kwe dijangwa. 9 Wafilisiti mtoge naho mtowane kigosi, chaivo nomnde watumwa wa Waibulania, enga ivo woho weli watumwa wetu. Ivo towaneni kigosi."

10 Wafilisiti nawatowana nk'hondo niyo wawahuma Waizilaeli. Waizilaeli awo wanyilikilaga kila yumwenga kwe kaya yakwe. Naho nokunda na ukomi mkulu watowani wa Izilaeli milongo mitatu alufu wakugenda lwa viga, wakomagwa. 11 Disanduku dye Ndagano dya Mnungu dyatahagwa, naho wana Eli Ofini na Fenehasi wose wakomagwa.

12 Mnt'hu yumwenga kulawa mwe dikabila dya Benjamini anyilikaga kulawa kwe nk'hondo mpaka Shilo niyo abula uuko mwe dizuwa idyo, kulagisa ikinyulu chakwe atatulaga zisuke zakwe niyo aketiila luvumbi mwo mtwi wakwe. 13 Mnt'hu uyo eze abule Eli andaga kekala mwe difumbi dyakwe mnk'handa mwe sila akagojela, kwaviya moyo wakwe nouzingiza kwaajili ye Disanduku dye Ndagano, mnt'hu yudya eze engile mwo mzi na kubwelekeza want'hu wose wo mzi wailaga. 14 Eli eze eve indilo auzaga, "Iyo ndilo yani?" Yudya mnt'hu asunguzaga kuita kwa Eli akamgambile. 15 Eli andaga na miyaka milongo kenda na mnane, naho andaga nt'hunt'hu. 16 Yudya mnt'hu niyo agamba, "Miye hinyilika kulawa kwe nk'hondo niyo naguluka mpaka aha diyelo."

Eli niyo auza, "Mwanangu kulawahi?"

17 Yudya egale ulosi agambaga, "Waizilaeli wanyilika kulawa kwa Wafilisiti, nokunda na ukomi mkulu mwa suwe Waizilaeli, naho wanawo Ofini na Fenehasi wakomwa, Disanduku dye Ndagano dya Mnungu nadyo ditahigwa!"

18 Yudya mnt'hu eze atambule Disanduku dya Mnungu, Eli agwaga mangali kulawa mwe difumbi dyakwe dyandaga hagihi ne nk'hili. Andaga kadalahala naho andaga mnt'hu azamile, agwaga niyo agogojola isingo yakwe niyo abanika. Andaga mlamuzi ywa Izilaeli kwa miyaka milongo mine.

19 Mkamwana ywa Eli uyo mkaziwe dya Finehasi andaga mbovu, naho lwandaga ni lupisi lwakwe lwo kwingila nyumba nolubula, aho eze eve Disanduku dye Ndagano ditahigwa naho isevyala na mgosiwe wabanika, aaho niyo alumwa ni usungu niyo engila nyumba. 20 Umwo andile akabanika, wank'hunga wamgambaga "Usekogoha! Una mwana kilume." Mna yehe hawevile naho hawahitule. 21 Mna dizina amwink'haga mwanawe dyandaga Ikabodi, Nuko kugamba, "Uwedi utendese wa Mnungu umlawa mwe Izilaeli." Ni wkwa kutahigwa Disanduku dye Ndagano dya Mnungu ne file ya isevyala hamwenga ne file ya mgosiwe. 22 Niyo agamba, "Uwedi wa Mnungu utendese umlawa mwe Izilaeli kwaviya Disanduku dya Mnungu ditahigwa."