1 Sauli eze ajike kulonga na Daudi, Yonasani mwana ywa Sauli nakeleleswa ni Daudi, na kumuungisa kwa moyo wakwe wose enga ivo yehe mwenye akeungise. 2 Kukongela zuwa idyo Sauli amguhaga Daudi kwita kwakwe, naho hamlekile auye kwe kaya ya Ise. 3 Kwaviya Yonasani nakambwedesa Daudi enga yehe mwenye, niyo aikaika Ndagano naye. 4 Nakahambula divalo dyakwe availe na kumwink'ha Daudi hamwenga na vitoanilo vakwe, ne sime no uta no mkanda wakwe. 5 Ivo Daudi nakaita kila hant'hu uko atumigwe ni Sauli, akadamanya kwa umanyi, Sauli niyo amwika kulanga mwa watowani. Mbuli ino niyo yanda yedi mwa want'hu wose, na mwa meso ya wandima wa Sauli.

6 Watowani weze wauye kaya, hamwenga na Daudi ivo amkomile yudya Mfilisiti, wavele kulawa kwo mzi wa Izilaeli wagendaga kumsingila seuta Sauli. Wavele nawo wakemaga wila we kinyemi, wakatoa ngoma na ving'weng'we. 7 Naho nawanda wakavina na kukema mila ya kuzumilana wakagamba, "Sauli kakoma maalufu yakwe, Daudi naye kakoma milongo ealufu yakwe." 8 Sauli helelwe, ne zimbuli zo wila uwo, ivo niyo engila maya vitendese akagamba, "Wamwink'ha Daudi milongo alufu, mna miye wanink'ha elufu du. Kisigale ni kumwink'ha Daudi useuta." 9 Sauli niyo anda hamhuwile naho Daudi kukongela dizuwa idyo.

10 Zuwa ditimile, muye mwavu atumigwe ni Mnungu amwingilaga Sauli kwa kipump'ha, niyo anda alalata enga mkilalu mwe nyumba yakwe. Daudi andaga akatoa kinubi enga ivo azoele mazuwa yose. Sauli nakanda na mjungo mwo mkono wakwe, 11 Sauli niyo amduila mjungo uwo akagamba, "Neni muwambe Daudi mwo lukazi." Mna Daudi awink'haga sili nk'hanana mbili.

12 Sauli niyo amwogoha Daudi, kwaviya Zumbe nakanda hamwenga na Daudi na kumleka Sauli. 13 Ivo, Sauli niyo amuusaga hakwe na kumtenda ande kilongozi wa watowani alufu imwenga. Daudi naye niyo alongoza vedi kwe nk'hondo. 14 Daudi andaga mpati ywa kila kint'hu kwaviya Zumbe andaga hamwenga naye. 15 Sauli eze aone kugamba kila kint'hu akudamanya Daudi chagenda vedi, amwogohesaga. 16 Mna want'hu wose wa Izilaeli na Yuda nawamuungisa Daudi kwaviya nakawalongoza vedi mwe nk'hondo na kuwavuza kwa wedi.

17 Sauli niyo amgamba Daudi, "Uyu Melabi niye mwanangu ywe kike mkulu, nohuloze ande mkazio uneva unadamanya mbuli izi zimbili. Unde mtowani ywangu mdahi naho utowane nk'hondo ya Zumbe. Sauli naakafanyanya mwo moyo wakwe akakegamba, Hiyo miye neni mkome, uyu naakomwe ni Wafilisiti!" 18 Daudi niyo amgamba Sauli, "Ni miye ani vikuleka seuta ande mkwangu?" Lukolo lwangu mwenye na mp'huga ya Tate halumanyikise mwe Izilaeli. 19 Mna, lupisi ludya Melabu mwana kike ywa Sauli uyo naakaunga lobigwe ni Daudi, nakalozwa kwa Adilieli kulawa kwo mzi wa Mehola.

20 Hata ivo, Mikali mwana kike mtuhu ywa Saulii naka muungisa Daudi. Sauli eze agambilwe nakeleleswa. 21 Sauli nakafanyanya mwenye akagamba, "Goja nimloze uyu ande lwinika kwakwe, na ivo Wafilisiti nawa mkome. Ivo Sauli kamgambaga kaidi naho, haluse nounde mkwangu." 22 Ivo Sauli awalagiza wandima wakwe, simuileni na Daudi kwa kinyele, no kugamba, "Kaula seuta akuungisa weye na wandima wakwe wose wakuungisa, weye nawe unde mkwewe dya seuta."

23 Na awo wandima wa Sauli niyo walonga mbuli izo na Daudi, Daudi niyo awagamba, "Togoleni nyuwe mwaona kugamba ni vihufu kunda mkwewe dya seuta? Miye ni mkiwa nenidahe vivihi kuliha mali kwa seuta."

24 Wadya wandima wamgambilaga Sauli enga ivo Daudi agambile. 25 Sauli naye niyo agamba, "Mgambileni Daudi, seuta hakuunga ugoli wowose, mna aunga machupu gana ya Wafilisiti hewivinilwe, vileke awatendele Wafilisiti wiihi enga ivo wamtendele." 26 Wandima wakwe nawo weze wamgambile Daudi mbuli izo, Daudi nakeleleswa kunda mkwewe dya seuta naho umwo mazua ye ndoza yandaga yakei mpaka, 27 Daudi aitaga na want'hu wakwe, niyo wawakoma Wafilisiti magana maidi. Niyo aguha machupu na kuyegala kwa seuta. Sauli naye niyo amloza mwana kike ywakwe Mikali.

28 Sauli abunk'hulaga kugamba Zumbe andaga hamwenga na Daudi, naho Mikali mwana kike ywakwe amuungisaga Daudi. 29 Sauli agendeelaga kumwogoha Daudi. Sauli niyo anda mk'hondo ywa Daudi mazuwa yose.

30 Watowani wa Wafilisiti wagendaga kutowana na Waizilaeli, mna mwe kila nk'hondo Daudi andaga mhumi kujink'ha wandima wa Sauli. Ivo Zina dya Daudi dyagendeelaga kutogoleswa.