1 Kwandaga na mnt'hu yumwenga mwo mzi wa Lama mwe isi ye vigulu va Ifulaimu, zina dyakwe etangwagwa Elikana ywe dikabila dya Ifulaimu. Yehe andaga mwana ywa Yolohamu naho mwezukuluwe dya Elihu ywe mp'huga ya Tohu naho ni yumwenga mwo lukolo lwa Sufi. 2 Elikana andaga na wakaziwe waidi, yumwenga etangwagwa Hana ywa kaidi etangwagwa Penina, Penina andaga na wana, mna Hana andaga na wana. 3 Kila mwaka Elikana andaga akakwela kulawa mwo mzi wawe vileke wakavike na kumlavila nt'hambiko Zumbe Mnungu mta udahi kudya Shilo, uko Ofini na Fenehasi awo wana waidi wa Eli wandaga walavant'hambiko wa Zumbe. 4 Kila lupisi umwo Elikana akalava nt'hambiko, amwink'haga mkaziwe Penina manda imwenga ya nyama ya nt'hambiko na manda imwe imwe kwa kila mwana wa kilume na wakike. 5 Mna Elikana amwink'haga Hana manda nk'hulu kwaviya amuungisaga, hamwenga na kugamba Mnungu hamwink'haga cheleko. 6 Mna mke miyakwe, uyo Penina uyo miyakwe andaga akambela Hana na kumgela maya kwaviya Mnungu hamwink'haga cheleko. 7 Mbuli izi nezigendeela mwaka mpaka mwaka. Kila aho Hana akwelaga kwe Nyumba ank'hulu ya Mnungu, Penina agendeelaga kumbela. Hana andaga mnt'hu ywa kuila niyo alemela kudya nk'hande. 8 Elikana amuuzaga mkaziwe, "Hana wailai? Nii walemela ukudya? Naho nii una kinyulu mwo moyo wako? Togola miye hi ywedi kujink'ha wana mlongo we kilume?"

9 Zuwa dimwenga aho weze wabinde ukudya na kunywa mwe nyumba ya Zumbe Mnungu uko Shilo. Hana niyo akimala mwo lupisi ulwo, mlavant'hambiko Eli andaga kekala mwe difumbi hagihi no mkola we Nyumba ya Mnungu. 10 Hana ailisaga kwa usungu na kumlombeza Zumbe. 11 Naho aikaga kilapi akagamba, "Zumbe Mnungu mta udahi, uneva unanikaula miye mndima ywako niyo wanikumbukila na kunink'ha mwana kilume, niho nenimwink'hize kwa Zumbe kwa mazuwa yose yo wikazi wakwe naho fili zakwe hezimogwe kwaviya kalavigwa kwajili ya Zumbe."

12 Umwo Hana akagendeela kulombeza kwa Zumbe Mnungu, Eli andaga akaukaula mnomo wakwe. 13 Hana naakalombeza kwo moyo wakwe, milomo yakwe nayo yandaga ikazingiza, mna izwi dyakwe hedikevika, Eli afanyanyaga kugamba uyo mvele kakolwa, 14 niyo amgamba weye nounde mkozi mpaka ini, "Usekugendeela kuvata mp'hombe!"

15 Hana niyo amhitula, "Mkulu hiyo ivo, miye ni mvele nna kinyulu, miye hivatile mp'hombe, naho nehamlombeza Zumbe Mnungu hamgambila makunt'ho yangu, 16 usekugamba mndima ywako himvele kint'hu, miye nehalombeza ivi kwaajili ya makunt'ho yangu."

17 Eli niyo amgamba, "Ita kwa utondowazi, Mnungu ywa Izilaeli akwink'he kiya ulombeze."

18 Hana niyo agamba, "Nakulombeza unifanyayile yedi." Hana niyo akeitila, adyaga nk'hande, handile na kinyulu naho.

19 Zuwa ditimile kilokilo, Elikana ne mp'huga yakwe wagendaga kumvika Zumbe, weze wajike ukuvika wauyaga kwe kaya yawe uko Lama. Elikana agonaga na mkaziwe Hana, Zumbe Mnungu niyo amhitula ukulombeza kwakwe. 20 Ivo niyo Hana enula ubovu, no kwingila nyumba mwana kilume, niyo amwink'ha zina dyakwe Samweli, "Kwaviya amlombezaga mwana uyo kwa Zumbe."

21 Umwo Elikana akwelaga hamwenga ne mp'huga yakwe kwo kulava nt'hambiko ya kila mwaka kwa Zumbe Mnungu na kukint'hiza ikilapi kiya, 22 Hana yehe haitaga. Mna amgamba mgosiwe, "Aho mwana akeza kuleka konk'ha, nenimwigale na kumwiika ha Zumbe Mnungu, naho neekale aho mazuwa yose."

23 Elikana uyo mgosiwe niyo amgamba, "Haya damanya ivo ukuona ni vedi kwako, gojela mpaka mwana aleke ukonk'ha, Zumbe naatende kilapi chako kunda kindedi," Ivo yudya mvele ekalaga kaya akamwonk'heza umwana mpaka aho alekaga konk'ha.

24 Yudya mwana eze aleke konk'ha, amwigalaga hamwenga na njeku ya miyaka mitatu, na nt'hangulu ya unga na kizembe cha divai, amwigalaga mwana uyo kwe nyumba ya Zumbe Mnungu uko Shilo. 25 Weze wajike kuchinja injeku niyo wamwigala uyo umwana kwa Eli. 26 Yudya mvele niyo amgamba Eli, "Enga ivo Zumbe ywangu akukutenda unde mgima, togola wanikumbukila? Miye ni yudya mvele wamuonaga kakimala aha akamlombeza Zumbe. 27 Namlombezaga anink'he umwana uyu, niyo Zumbe Mnungu anink'ha kiya nimlombeze. 28 Naivo elo namwink'hizaga umwana uyu kwa Zumbe Mnungu, mwo ugima wakwe wose naande ywa Zumbe." Eze ajike kulonga ayo amvikaga Mnungu hadya.