1 Kwandaga na mnt'hu mgoli naho amanyikise zina dyakwe etangwagwa Kishi ywe dikabila dya Benjamini. Andaga mwana Abieli naho mwezukuluwe dya Zela ywe mp'huga ya Bekolati ywo lukolo lwa Afia. 2 Andaga na mwana kilume etangwagwa Sauli. Sauli andaga mbwanga naho hakwandaga na mnt'hu aliganaga na Sauli kwa ubwanga mwe Izilaeli, Sauli andaga mtali kujink'ha mnt'hu yeyose, want'hu wose mwo utali wawe waheelaga mwa maega yakwe.

3 Zuwa dimwenga mp'hunda za Kishi ise dya Sauli zagaga, ivo Kishi amgambaga Sauli, "Guha mndima yumwenga mwitanye mkazizungule." 4 Wagendaga kuzizungula kwe isi ye vigulu ya uko Ifulaimu na uko Shalisha, mna hawazionaga uko. Niyo wabula Shalimu uko nako hawazione, naho wazizungulaga mwe isi ya Benjamini uko nako hawazione. 5 Weze wabule kwe isi ya Sufu, Sauli amgambaga mndima ywakwe, "Kiuye kaya, chaivo tate naaleke kufanyanya zimp'hunda, niyo anda na kiyangayanga kwaajili yetu."

6 Niyo yudya mndima ahitula, "Mwo mzi uno kuna mnt'hu ywa Mnungu naho akuzumiliswa kwaviya kila kint'hu akulonga chanda kindedi. Goja kiite kwakwe naakadaha kukigambila kigende sila yani."

7 Sauli niyo auza "Uneva kinaita kwakwe nekimwink'hei? Hakina nk'hande isigale mwe mifuko yetu naho hakina kint'hu cha kumwink'ha?"

8 Yudya mndima niyo ahitula "Miye nna kasawa kadodo nadaha kumwink'ha aako na ivo naakigambile uko nekizione."

9 Aho nk'hongo mwe Izilaeli uneva mnt'hu akaunga amlombeze Mnungu mbuli agamba ivi, Haya kiite kwo muwoni kwaviya mnt'hu akwitangwa mlotezi mwa mazuwa ayo etangwagwa muwona.

10 Sauli niyo ahitula "Ivo kufanyanya vedi haya kite." Ivo niyo waita kudya kwo mzi wa uyo mnt'hu ywa Mnungu.

11 Umwo wandile wakakwela kwa kalima kwo mzi uwo waduganaga na wandele wandaga wakeza kuteka mazi, "Niyo wawauza wadya wandele togolani yudya muwoni eyuko uko kwo mzi?" 12 Niyo wahitula, "Heiye eyuko, naho ekulongole kwenyu. Mnakombeka nomumbwiile. Keza kwo mzi dyelo kwaviya want'hu walava nt'hambiko uko kwe kagulu. 13 Aho mkeza kwingila mwo mzi nomumbwiile hanati aite hant'hu ha kulavila nt'hambiko vileke akadye. Kwaviya want'hu hawadyaga ink'hande mpaka yehe aivikile nt'hambiko iyo. Akajika wadya walalikwe niho nawadye, ivo kombekeni kuita, nombwiilane naye."

14 Ivo Sauli no mndima ywakwe wagendeelaga kuita kwo mzi. Naho umwo wakengila mwo mzi wamuonaga Samweli akeza kuhinga kwawe umwo andile akaita hant'hu ha kuvikila.

15 Zuwa dimwenga umwo Sauli andaga hanati kuita kwa Samweli Zumbe Mnungu amlagisga Samweli imbuli ino akamgamba, 16 "Luvi mwo lupisi enga ulu, nohwigaile mnt'hu ywe dikabila dya Benjamini, umtende ande kilongozi ywa want'hu wangu Izilaeli, yehe naawakombole kulawa kwa Wafilisiti. Hiona masulumizo ya want'hu wangu naho hiiva indilo yawe ya kuunga wambizi kwangu."

17 Samweli eze amuone Sauli, Zumbe Mnungu niyo amgamba, "Uyu niye mnt'hu nakugambile. Naawalongoze want'hu wangu." 18 Niyo Sauli aitaga kwa Samweli hagihi ne nk'hili, niyo amgamba, "Nakulombeza unilagise nyumba yo muwona?"

19 Samweli niyo ahitulai, "Muwoni ni miye. Haya longoleni hant'hu ha kulanga, nyuwe nyose nomnde hamwenga na miye dyelo, luvi mtondo neniwagambileni zimbuli zenyu zose mnanazo, na kuwalekelani mwite. 20 Na kwe mbuli ye zimp'hunda zagile mwe mazuwa matatu yomboke, usekogoha, zioneka kale. Mna niani uyo akuungiswa ni want'hu wa izilaeli? Togola hiyo weye hamwenga ne mp'huga ya iso?"

21 Sauli niyo ahitula, "Miye ni ywe dikabila dya Benjamini kabila ditendesa udodo mwe Izilaeli, naho mp'huga yangu niyo itendese udodo mwe dikabaila dya Benjamini, mna nii walonga mbuli enga izi kwangu?"

22 Niyo Samweli awegala Sauli na mndima wakwe kwe chumba kikulu, niyo awaika hant'hu aho wekale wakulu wose walalikwe. Want'hu awo wose wandaga milongo mitatu. 23 Samweli niyo amgamba mwambisi, "Guha kihendo cha nyama kiya nakugambile ukiike hank'handa." 24 Ivo mwambisi aguhaga kihendo kiya ne kiga niyo akileta kwa Sauli. Samweli niyo agamba, kihendo iki ni kiya wagambile hwikile dya, kwaviya nokuikilwa weye vileke udye hamwenga na wose walalikwe.

Ivo mwe dizuwa idyo Sauli adyaga hamwenga na Samweli,

25 Weze waseele kulawa hant'hu ha ho mviko mpaka kwo mzi, Samweli amguhaga Sauli niyo waitanya kwe chumba cha kulanga kwe nyumba niyo aika lumwe ugono kwajili ya Sauli.

26 Niyo agona aaho. Wenukaga mtotondo Samweli niyo amgamba Sauli uko kwe digulu, "Funganya, hulage." Sauli eze ajike kufunganya, wafosaga kuse hamwenga na Samweli. 27 Umwo wandaga wakaseela kunk'handa yo mzi, Samweli amgambaga Sauli, "Mgambe mndima uyo alongole. Weye goja ludodo vileke hwink'he ulosi kulawa kwa Mnungu."