1 Niyo Samweli aguha kasupa kadodo ka mavuta ya zeituni niyo ayagida mwo mtwi wa Sauli niyo amnonela akagamba, "Zumbe Mnungu kakutenda unde seuta ywa Izilaeli. Nou walongoze want'hu wakwe. 2 Dyelo ukahalawa noubwilane na want'hu waidi hagihi ne kikuta cha Laheli uko Selisa mwe mihaka ye isi ya Benjamini. Nawakugambile kugamba zimp'hunda ziya noukazungula zioneka, iso hakugendeela kogohesa mwe zimbuli ze zimp'hunda izo mna akeuza, ‘Nenitende vivihi mwe mbuli ya mwanangu?’ 3 Kulawa aho nowiite mpaka kwo mti ukukile uko Taboli. Uko nouwabwiile want'hu watatu mwe sila wakugenda kumlavila nt'hambiko Mnungu uko Beseli. Yumwenga naande asaka mabehela matatu, yumwenga naye naande kenula mikate mitatu, yumwenga naye naande kenula bete dye divai. 4 Nawakulamse niyo wakwink'ha mikate miidi nawe noiihokele. 5 Akajika nowiite kwa kagulu uko Gibea ya Mnungu, uko kune nk'hambi ya Wafilisiti. Aho ho mwingilo wo mzi noudugane na fyo dya walotezi wakaseela kulawa kwe kilingo uko kwo kulavila malavo wakatowa ving'weng'we na vigoma na miluli na mazeze nawande walotela. 6 Aaho Muye ywa Zumbe Mnungu naakwizile mwako kwa udahi, weye nawe noukonge kulotela na kuhituka kunda mnt'hu mtuhu. 7 Umwo aya yose yakalaila damanya chochose kiya Mnungu naakulongoze kudamanya. 8 Nounilongoele kuita Giligali uko noubwiile hant'hu ha kulavila nt'hambiko ya kokwa na nt'hambiko ya utondowazi. Unigoje hadya kwa mazuwa mfungate mpaka nize hugambile cho kudamanya."

9 Sauli eze ahituke na kwasana na Samweli, Mnungu azihitulaga moyo wa Sauli. Naho kila kint'hu kiya Samweli amgambile nekilaila mwe dizuwa diya. 10 Umwo Sauli na mndima ywakwe weze wabule Gibea fyo dya walotezi nedimsingila. Aaho muye ywa Mnungu yamwizilaga, niyo akelunga nawo mwo kulotela. 11 Want'hu wammanyaga aho nk'hongo weze wamuone akadamanya ivo, wakeuzaga wakagamba, "Mbuli yani ino ikulaila aha kwa mwana ywa Kishi dyelo, Sauli kanda mlotezi? " 12 Mnt'hu yumwenga ywa aaho auzaga, watati zawe ni wahi? Ivi nivo nawakalonga wakagamba, "Hata Sauli kanda mlotezi?" 13 Sauli eze ibinde kulotela aitaga naho hant'hu ha kulavila nt'hambiko.

14 Esemdodo dya Sauli eze awaone Sauli na mndima ywakwe awauzaga "Nomnda hii?"

Sauli niyo ahitula, "Nekikazizungula zimp'hunda, kize kinde hakizione nekiita kwa Samweli."

15 Ise mdodo dya Sauli amgambaga, "Haya longa kiya akugambile Samweli."

16 Sauli niyo ahitula, "Nakakigamba zimp'hunda zioneka." Mna hamgambile ise mdodo kiya alongile Samweli mwe mbuli ya yehe kunda seuta.

17 Niyo Samweli awaduganyaga Waizilaeli ha Zumbe Mnungu uko Mizipa. 18 Niyo awagamba, "Zumbe Mnungu ywa Izilaeli agamba, ‘Nawalavagani nyuwe kulawa Misili na kuwayokolani kulawa kwa Wamisili naho isi zose nezikawatendelani vihile. 19 Ni miye Mnungu ywenyu uyo awayokoleni kulawa mwe makunt'ho na masulumizo yenyu, mna dyelo mnilemela, naho mnilombeza niwenk'heni seuta. Ni vedi, keduganyeni nyuwe wenye ha Zumbe Mnungu mkanda mwe makabila yenyu ne zink'holo zenyu.’"

20 Umwo Samweli ayaletaga makabila ya Izilaeli hagihi, kabila dya Benjamini dyasagulagwa kwa kutoa kula. 21 Niyo adigala kulongole dikabila dya Benjamini lukolo kwa lukolo, lukolo lwa Matili niyo lwasagulwa, niyo asagulwa Sauli mwana Kishi. Mna umwo weze wamzungule nakanda haoneke. 22 Ivo wamuuza naho Zumbe Mnungu, "Togola mnt'hu uyu keza kale aha?"

Zumbe niyo ahitula, "Heiye kakefisa mwe zint'hanu."

23 Ivo wasunguzaga kuguluka niyo wampata na kumleta Sauli kwa want'hu, niyo waona kugamba andaga mnt'hu mtali kujink'ha mnt'hu yeyose. 24 Samweli niyo awagamba want'hu, "Uyu ni mnt'hu asagulwe ni Zumbe Mnungu, hahana mtuhu yeyose mwa suwe enga yehe."

Want'hu wose niyo wanga wakagamba, "Seuta wikalise mazuwa yose!"

25 Samweli awatambalisaga want'hu uwagilwa no undima wa seuta, niyo auwandika mwe kitabu icho chaikagwa ha Zumbe Mnungu aho niho awalagaga, kila yumwenga auye kwe kaya yakwe. 26 Sauli naye auyaga kwe kaya uko Gibea, fyo dya want'hu dyaitaga na Sauli kwaviya ni Mnungu awatendaga waite hamwenga naye. 27 Mna want'hu wata lubezo niyo wagamba, "Mnt'hu uyu hakudaha kukiyokola kulawa kwa wank'hondo wetu, wambelaga Sauli naho hawamwink'hile mageleko yeyose. Mna Sauli halongile dyodyose.?"