1 Mwa mazuwa ayo umwo mbwanga Samweli akadamanya ndima ha Zumbe Mnungu akalongozwa ni Eli, kwandaga na milosi migeke kulawa kwa Zumbe Mnungu, Naho maona andaga akalagiswa ni Zumbe Mnungu yandilisaga mageke. 2 Zuwa dimwenga nekilo, Eli uyo andaga kadalahala naho meso yakwe yandaga yakonga kwaza ludole lwa kukaula, andaga kagona mwe chumba chakwe. 3 Vimuli va Mnungu vandaga mwo lwandaga lukei lwakweela, Samweli andaga kagona mwe Nyumba ya Mnungu aho dyandaga Disanduku dye Ndagano dya Mnungu. 4 Zumbe Mnungu amwitangaga Samweli, Samweli niyo etika, woe, longa mkulu. 5 Agulukaga kwa Eli niyo amgamba, "Kunitanga, hiza"

Mna Eli niyo amhitula, "Miye hikwitange ita ukagone" Ivo Samweli agendaga kugona.

6 Zumbe niyo amwitanga Samweli naho, ivo enukaga niyo aita kwa Eli niyo amgamba, weye kunitanga miye hiza.

Mna Eli niyo amhitula, "Mwanangu hikwitange, uya ukagone"

7 Samweli hamanyaga kugamba ni Zumbe Mnungu niye andaga akamwitanga, kwaviya Mnungu hanati alonge naye.

8 Katatu naho Zumbe niyo amwitanga Samweli, Samweli niyo enuka na kuita kwa Eli na kumgamba, "Kunitanga, mie hiza,"

Eli niyo abunk'hula kugamba, Zumbe Mnungu niye andaga akamwitanga yudya mbwanga. 9 Ivo niyo amgamba, "Uya kagone, uneva anakwitanga naho, umgambe, ‘Longa Zumbe, mndima ywako akutegeleza.’" Ivo Samweli auyaga kwo kugona.

10 Zumbe ezaga niyo akimala aho, niyo etanga enga viya nk'hongo, "Samweli, Samweli."

Samweli niyo ahitula, "Longa mndima ywako nategeleza"

11 Zumbe Mnungu niyo amgamba, "Kuna zuwa nenitende kint'hu cha kwitusa kwa want'hu wa Izilaeli, icho kila yumwenga naakiive neetuke. 12 Mwe dizuwa diya, nenitende kila kint'hu kiya nilongole kwe mp'huga ya Eli, kukongela nk'hongo mpaka kwo uheelo. 13 Nehimgambila kale kugamba imp'huga yako neniisengele vihile mazuwa yose kwaviya wanawe we kilume walonga mbuli ziihile kwangu. Eli amanyaga kugamba nawakadamanya ivo, mna hawalemeze. 14 Ivo nakelisa, mwe mp'huga ya Eli kugamba hahana nt'hambiko hegu malavo nayadahe kuusa masa yo wavu uno wihile mwe mp'huga ya Eli."

15 Samweli ekalaga mwo lusazi mpaka mtondo, enukaga niyo akomola zinyivi ze nyumba ya Zumbe Mnugu. Ogohaga kumgambila Eli yalongigwe ni Zumbe Mnungu. 16 Eli niyo amwitanga "Mwanangu Samweli."

"Samweli niyo etika, woe mkulu."

17 "Eli amuuzaga Samweli, Zumbe Mnugu kakugambilai? Nakulombeza usekunifisa kint'hu chochose. Mnungu naakusengele vihile uneva hunanigambile kila kint'hu alongile na weye." 18 Ivo Samweli niyo amgambila kila kint'hu hasigaze kint'hu chochose, Eli niyo agamba, "Yehe niye Zumbe Mnungu naadamanye chochose kiya kikumwelela."

19 Samweli agendeelaga kukula, Zumbe Mnungu naye andaga hamwenga naye niyo ayadamanya yose amgambilaga kunda kindedi. 20 Ivo want'hu wose we isi ya Izilaeli kulawa Dani Kasikazini mpaka Beli Sheba ya Kusini wabunk'hulaga kugamba kindedi Samweli andaga mlotezi ywa Zumbe Mnungu. 21 Zumbe Mnungu agendeelaga kukelaviliza uko Shilo, umwo amlailaga Samweli niyo alonga naye. Naho umwo Samweli andaga akalonga naye Waizilaeli wose wevaga.