1 Niyo Hana atogola akagamba.

"Moyo wangu wamwangila Zumbe Mnungu.

Nna kinyemi kitendese kwa yadya anitendele.

Nawaseka wank'hondo wangu kinyemi changu ni kikulu kwaviya Mnungu kanambiza.

2 Hahana akukile enga Zumbe ywetu.

Hahana yeyose enga yehe.

Hahana mwamizi enga Mnungu ywetu.

3 Lekeni kukeduvya,

Lekeni milosi yenyu ya weduvi,

Kwaviya Zumbe niye Mnungu amanyize,

Naho ayasengela yose yakutendigwa ni want'hu

4 Nyuta za wata ludole zivunika.

Mna wasokezi wapata ludole.

5 Wadya wose wandaga na nk'hande imemile ndi wanda wasumi.

Mna wadya wandaga na sala hawana sala naho.

Mna yudya mvele mgumba kengila nyumba wana kilume wabindile wingi.

Mna yudya andaga na wana wengi halekelwe hata yumwenga.

6 Zumbe Mnungu akoma, naho, aleta ugima.

Awaseleza kwo mnyongomela na kuwavuza naho.

7 Zumbe Mnungu awatenda wamwenga kunda wakiwa na wamwenga kunda wagoli,

awaseleza wamwenga niyo watuhu awakweza.

8 Awenula wakiwa kulawa mwe luvumbi,

Awenula hewena kint'hu kulawa mwe makunt'ho yawe,

Awaika hamwenga na wakulu,

Niyo awaika hant'hu ha nt'hogola,

Kwaviya nk'hongelo ze isi ni za Zumbe Mnungu,

Mwe zink'hongelo izo kazizenga isi izo zose.

9 Aamila wikazi wa want'hu wakwe wahuwilwa.

Mna want'hu wavu nawage mwo lwiza.

Kwaviya mnt'hu hakupata uhumi kwa ludole lwakwe mwenye.

10 Wank'hondo wa Zumbe Mnungu nawabanangwe pele.

Naawatowe enga lukuwa kulawa kwe mbingu.

Zumbe Mnungu naaisengele isi yose.

Neink'hize ludole kwa seuta ywakwe.

Naamongezele ludole seuta ywakwe kwa uyo amsagule."

11 Niyo Elikana auya kaya uko Lama. Mna yudya mwana kilume Samweli ekalaga Shilo niyo anda mndima ywa Zumbe Mnungu akalongozwa ni Eli mlavant'hambiko.

12 Wana kilume wa Eli wandaga hi wahuwilwa. Hawamohohaga Zumbe Mnungu, 13 hegu hata mwe vint'hu ivo vaungagwa wenk'hige walavant'hambiko. Kila aho mnt'hu andaga akalava nt'hambiko yakwe mndima ywa mlavant'hambiko ezaga na uma una meno matatu, na umwo nyama ikei yatipwilika, 14 uyo mndima asomekaga uma uwo mndani mwe nyungu iyo, naho nyama yeyose ilavigwe umwo na uma uwo yandaga ya mlavant'hambiko, Waizilaeli wose waitaga Shilo kulavila nt'hambiko zawe uuko watendelagwa iivo. 15 Mna hata umwo mavuta ye nyama yandaga yakei kokigwa, mndima ywo mlavant'hambiko ezaga niyo amgamba yudya akulava nt'hambiko, "Mlavile mlavant'hambiko nyama ya kwanikwa kwaviya yehe haaguhe nyama itipwiliswe, mna naaguhe idya imbisi."

16 Uneva mnt'hu uyo anahitula akagamba, haya goja suwe kitende ivo viwagilwe naho kinde koka amavuta niho nouguhe idya ukuunga, mndima ywa mlavant'hambiko naagambe, "Bule nink'he ivi haluse, chaivo nohupokole."

17 Wavu uno wa wabwanga wa Eli ukulisa ha Zumbe Mnungu, kwaviya wayatendelaga lubezo malavo ya Zumbe Mnungu.

18 Mwo lupisi ulwo mbwanga Samweli andaga mndima kwa Zumbe Mnungu, yehe avalaga kizibao king'aile. 19 Kila mwaka nine amsumilaga nk'hanzu ndodo niyo amwigaila mwanawe umwo yehe na mgosiwe wakakwela kugenda kulava nt'hambiko yawe ya kila mwaka. 20 Eli awavikilaga Elikana na mkaziwe akagamba, "Zumbe Mnungu naakwink'he wana watuhu mwo mvele uyu, hant'hu ha uyu yumwenga amlombezaga na kumwink'hiza kwa Zumbe." Weze wajike kuvikilwa wauyaga kaya.

21 Niyo Zumbe Mnungu amvikila Hana, niyo Hana apata wana kilume watatu na wakike waidi. Yudya mbwanga Samweli niyo akula akanda mndima ywa Zumbe Mnungu.

22 Mna Eli adahalisaga, niyo eva mbuli zose za wanawe we kilume ivo wawatendelaga Waizilaeli wose naivo wagendile na wavele wose nawakadamanya ndima he nk'hili ye Dihema dya Zumbe Mnungu. 23 Ivo niyo awagamba, "Nii mwadamanya mbuli enga izi? Neva mwa want'hu wose mwe zimbuli zo uwihi wenyu. 24 Lekeni zimbuli izi wanangu, kwaviya mbuli izi huziva kulawa kwa want'hu wa Zumbe Mnungu ziiha. 25 Uneva mnt'hu anamtendela wavu miyawe, mnt'hu adaha kumlombezela kuusilwa wavu kwa Mnungu, mna uneva mnt'hu anamtendela wavu Zumbe niani akudaha kumlombezela kuuswa wavu kwa Zumbe Mnungu?"

Woho hawamtegeleze tati yawe kwaviya Zumbe Mnungu andaga kalamula kale kuwakoma.

26 Mbwanga Samweli agendeelaga kukula na kuungiswa ni Zumbe na want'hu.

27 Mnt'hu ywa Mnungu amwizilaga Eli niyo amgamba mkulu, "Zumbe Mnungu agamba ivi, nakakelaviliza mwe nyumba ya iso umwo mwandaga watumwa ywa Falao mwe isi ya Misili. 28 Mwa makabila yose ya Izilaeli, namsagulaga iso ande mlavant'hambiko ywangu, anidamanyile ndima mwe kilingo changu, oke ubani naho wavale kizibau ho undiilo wangu. Naho nawenk'haga want'hu we mp'huga ya iso nyama zimwenga zandile zikalavigwa ni Waizilaeli kwa kokwa. 29 Woho nawazionela finju nt'hambiko zangu na malavo yangu ayo niwagambile want'hu wangu wanigaile? Eli nii kuwogohesa wanao kujink'ha miye kwa kukegimbaza wenye mwe zimanda zisagulwe za kila malavo zilavigwe ni want'hu wangu wa Izilaeli? 30 Miye Zumbe Mnungu ywa Izilaeli, ‘Nalaganaga kugamba weye ne mp'huga yako no lukolo lwako kugamba nomnde wandima wangu enga walavant'hambiko wangu mazuwa yose.’ Mna haluse nagamba hevinde ivo naho, vituhu vakwe neniwatunye wose wakunitunya, wadya nawo wakunibela name neniwabele. 31 Tegeleza, lupisi lweza aho neniwakome wabwanga wose mwe mp'huga yako no lukolo lwako, vileke kusekunda na mnt'hu mwe mp'huga yako neekale mpaka kokudalahala kwakwe. 32 Weye nounde na makunt'ho na finju umwo ukauwona uvikilwa uwo neniwenk'he want'hu watuhu wa Izilaeli, mna mwe mp'huga yako hokunde na yeyose akuunga agendeele kwikala mpaka adalahale. 33 Hata ivo nenisigaze yumwenga mwa welekwa wako kunda mgima, uyo naande mlavant'hambiko ywangu, mna naande nt'hunt'hu naho naaze makawiilo, naho welekwa wako wose nawakomwe kikwank'halu. 34 Umwo wanawo waidi Ofini na Fenehasi wakabanika wose kwa zuwa dimwenga, ino neilagise kugamba kila kiya nilongile nekinde kindedi. 35 Miye mwenye neni kesaguile mlavant'hambiko mhuwilwa kwangu naadamanye kila kint'hu huunga adamanye. Nenimwink'he welekwa wakuunga wadamanye ndima mazuwa yose ha seuta ywangu asagulwe. 36 Mwelekwa ywenyu yeyose akuunga ande mgima naaungwe aite kwa mlavant'hambiko uyo na kumlombeza masawa na nk'hande, na kulombeza naho azumilwe kuwaambiza walavant'hambiko vileke apate cho kudya."