1 Ivo Samweli abanikaga, na Waizilaeli wose waduganaga vileke wamhongezele na kummosela msanga kwe kaya yakwe uko Lama.

Niyo Daudi aita kwe nyika za Palani. 2 Nokunda na mnt'hu yumwenga uko kwo mzi wa Maoni uyo andaga na uchuuzi wakwe wa ngoto mwo mzi wa Kalimeli. Uko adimaga ngoto zakwe na kuzikant'ha mazoya. Andilisaga mgoli, andaga na ngoto alufu nt'hatu na mbuzi alufu imwenga. 3 Mnt'hu uyo etangwagwa Nabali mkaziwe naye etangwagwa Abigaili. Abigaili mmanyi naho mta futa yedi.

Mna Nabali andaga mnt'hu aihile naho mnk'hani, uyo andaga ywo lukolo lwa Kalebu. 4 Ivo, Daudi akanda kwe nyika evaga kugamba Nabali andaga akakant'ha ngoto zakwe mazoya uko Kameli. 5 Ivo atumaga wabwanga mlongo akawagamba, iteni kwa Nabali uko Kameli mkamgambe Daudi akulamsa. 6 Nomumgambile kugamba. "Daudi akulamsa, utondowazi unde kwako, ne mp'huga yako yose iyo unanayo. 7 Hiva kugamba wazikant'ha mazoya zingoto zako, naunga umanye wadimi wako nawanda hamwenga na suwe, suwenaswe hekiwabanange. Naho lupisi lwose wandile hamwenga na suwe mwo mzi wa Kameli, hakiwabaile ngoto yoyose. 8 Unawauza nawakugambile, haluse nakulombeza wabwanga wangu awa wapate uwagilwa hako, kwaviya kibula mwo lupisi lwa kinyemi. Nakulombeza uwenk'he chochose icho unanacho wandima wako awa na miye mwanao Daudi."

9 Wadya wabwanga wa Daudi nawagenda kumgambila Nabali enga ivo wasigiilwe ni Daudi. Woho niyo wanda kugoja. 10 Nabali niyo awagamba wandima wa Daudi, "Daudi niye ani? Mwana wa Yese niye yuhi? Mazuwa aya weyuko wandima wengi wakuwasumka wakulu wawe. 11 Togola niguhe mikate yangu, na mazi na nyama izo nichichinjile kwajili ya wakant'ha mazoya ye zingoto zangu na kuwenk'ha want'hu hiiwamanyize ukwo wakulawa!"

12 Ivo wadya wabwabga wa Daudi nawauya na kumgambila Daudi yose enga ivo wahitulwe ni Nabali. 13 "Ivo Daudi niyo awagamba want'hu wakwe!" kila mnt'hu akekake sime yakwe mwe kigudi. Naho kila mnt'hu niyo akekaka sime yakwe, Daudi naye iviaivia niyo akekaka sime. Naho want'hu wakubula magana mane wamtimilaga Daudi na want'hu magana maidi wasigalaga ne zint'hanu.

14 Mbwanga yumwenga ywa Nabali, amgambilaga Abigaeli mkaza Nabali, "Daudi atumaga want'hu kulawa kwe nyika vileke wamlamse mkulu ywetu, mna yehe awahomolaga. 15 Mna want'hu awo nawanda wedi kwetu, hawakibeile naho lupisi lwose aho chandile nawo uko kwe nyika hachaswesaga chochose. 16 Kwetu nawanda enga wamizi kilo na msi lupisi lwose chandile kikadima ngoto. 17 Haluse fanyanya mwe mbuli ino naho ukaule dyo kudamanya. Mbuli ino yadaha kwigala kint'hu kiihile kwa mkulu ywetu na kwa wambuyaze wose. Kwaviya yehe ni mnt'hu aihise naho hahali akudaha kulonga naye" 18 Abigaili adamanyaga nguzu, aguhaga mikate magana maidi na mabeti maidi ya divai, ngoto shano zikasigwe vedi, kilo mlongo na mfungate za mkazingo, vikwanya gana va zabibu zinyaile, na mikate ya tini magana maidi na vint'hu ivi vose avikwezaga mwe mp'hunda. 19 Niyo amgamba yudya mbwanga ywakwe, "Longola, miye nohutimile." Mna hamgambile dyodyose mgosiwe.

20 Umwo andile akaseela, kakwela mp'hunda yakwe na kukindilwa no mnima, aaho niyo wabwiilana na Daudi na want'hu wakwe wakeza uuko akulawa. 21 Daudi naakafanyanya mwo moyo, "Miye nehinda hamila ugoli wose wa Nabali kwe nyika haihena upati wowose, naho hahana kint'hu chochose chagile, naho yehe kaniliha yaihile kwa uwedi nimtendele. 22 Mnungu anikome miye uneva luvi kukacha neninde hinati niwakome wagosi wose we kwakwe."

23 Abigaili eze amkaule Daudi, aseelaga kulawa mwe mp'hunda yakwe, na kufunama ha Daudi, kihanga chakwe niyo chabula hasi. 24 Akeduulaga heviga ha Daudi niyo amgamba, "Mkulu, masa yose yande mwangu miye mndima ywako. Nakulombeza utegeleze mbuli akukugambila mndima ywako. 25 Nakulombeza mkulu, usekumfanyanya Nabali uyo mnt'hu aihile, enga ivo dili dizina dyakwe Nabali, nivo naye eli. Yehe etangwa Nabali, naho yehe ni mnt'hu mhezi. Mkulu, wadya wabwanga wako weyaho hadya uwasigiile, miye mndima ywako hiwaone. 26 Haluse zumbe ywangu, nakelisila kwa Zumbe Mnungu mta udahi kwaviya Zumbe Mnungu kakukindila usekulihiza kwa kwitila sakame na kukepatila lema, waleke wank'hondo wako na wadya wose wakukuungila yaihile wande wahezi enga Nabali. 27 Mkulu nakulombeza uhokele geleko idi hwigaile naho uwenk'he wabwanga ukuwalongoza weye mkulu. 28 Nakulombeza uniusile masa, miye mndima ywako. Zumbe naaitende mp'huga yako itogile kwaviya weye mkulu watoana nk'hondo ya Zumbe. Naho wiihi houoneke mwako mazua yose. 29 Kunalaila want'hu wakukutimila na kuunga kubananga wikazi wako, Zumbe Mnungu, Mnungu ywako naakwamile weye hamwenga na wagima. Mna wikazi wa wank'hondo naauduule hale, enga viya mnt'hu akuduula iwe kwa nk'humbaiwe. 30 Naho neinde Zumbe Mnungu akeza kwajika kukudamanyila yose ayedi akulagane, na kukusagula kunda kilongozi ywa Izilaeli, 31 weye mkulu, houone vihile, kwa kulihiza wiihi. Naho Zumbe akeza kukudamanyila ayedi, nakulombeza usekunijala miye mndima ywako."

32 Daudi niyo amgamba Abigaili, "Atunywe Zumbe Mnungu ywa Izilaeli uyo akusigiile kudugana na miye dielo. 33 Uvikilwe weye no umanyi wink'higwe kwa kunikindila miye dielo nisekukoma, hegu kukelihiza miye mwenye. 34 Kwa kindedi Zumbe Mnungu ywa Izilaeli kanikindila nisekukulumiza. Wandile hwasunguze kudugana na miye, kwa kindedi luvi mtondo hegu hakwandile na mgosi yeyose naakasigala kwa Nabali na want'hu wakwe." 35 Akajika Daudi niyo ahokela vint'hu vose ivo Abigaeli amwigaile, na kumgamba, "Uya kaya kwako kwa utondowazi. Kaula miye hiva yadya ulongile na malombezo yako hiyahokela." 36 Abigaili eze auye kaya, ambwiilaga Nabali akadamanya wila mwe kaya yakwe enga seuta. Nabali andaga kelelwa vitendese mwo moyo wakwe kwaviya andaga kakolwa. Ivo Abigaili hamgambile dyodyose mpaka mtondo. 37 Kuze kuche Abigaili eze amkaule mgosiwe kaleukwa, amgambilaga mbuli zose, aaho Nabali etukaga niyo mwili wakwe akugutalaga vihile. 38 Mwe dizuwa dya mlongo Zumbe Mnungu amtowaga naho Nabali na kubanika.

39 Daudi eze eve Nabali kabanika agambaga, "Atunywe Zumbe Mnungu amlihize Nabali kwa kunihomola, naho Zumbe Mnungu kanihonya miye mndima ywakwe kudamanya wiihi. Zumbe Mnungu kamsengela Nabali kwa wavu wakwe."

Niyo Daudi asigiilaga want'hu vileke amlongele lusona Abigaili ande mkaziwe. 40 Wandima wa Daudi weze wabule kwa Abigaili uko Kameli, wamgambaga, "Daudi kakisigiila kikuguhe unde mkaziwe."

41 Abigaili enukaga na kufunama hasi hakwe akagamba, "Miye ni mndima du, hizumila kusunt'ha iviga va wandima wa mkulu." 42 Abigaili asunguzaga kwinuka na kukwela mwe mp'hunda yakwe, na kutimilana na wandima wakwe we kivele washano na kuita na wandima wa Daudi, yehe naye niyo anda mkaza Daudi.

43 Naho Daudi amlombaga Ahinoamu kulawa Yezeli. Ivo wose awo niyo wanda wakaziwe. 44 Mwo lupisi ulo Sauli andaga kamloza mwanawe Mikali uyo andaga mkaza Daudi, kwa Paliti mwana ywa Laishi kulawa mzi wa Galimu.