1 Sauli nakamgamba mwanawe Yonasani na wandima wakwe wose wamkome Daudi, mna Yonasani, mwanawe Sauli, nakamuungisa Daudi. 2 kwaivo, niyo amgambila, "Tate aunga akukome. Ivo, kesinyise, luvi mtondo, kefise hant'hu ha kinyele, wikale uuko. 3 Miye nenize na tate no kukimala hagihi na Tate uko kwo mgunda hant'hu nounde kukefisa. Aho nenilonge naye kwaajili ya weye, na kint'hu chochose nenibunk'hule nohugambile."

4 Yonasani naka mtogolesa Daudi kwa Ise akamgamba, "Usekudamanya wiihi kwa mndima ywako Daudi kwaviya yehe hadamanye wiihi wowose kwako; Udamanyi wakwe wose wa kukudamanyila weye ni wedi mazuwa yose. 5 Daudi hegu nakabanika umwo agendaga kutowana na Mfilisiti Goliati, Mna Zumbe Mnungu awenk'haga uhumi mkulu Waizilaeli. Weye mwenye waionaga imbuli iyo niyo wanda na kinyemi. Haluse nii waunga udamanye wiihi kwa kumkoma Daudi haheina masa?"

6 Sauli nakamtegeleza Yonasani, niyo aika kilapi, "Nakelisa ha Zumbe Mnungu mta udahi, henimkome Daudi." 7 Niyo, Yonasani kamwitanga Daudi no kumgambila mbuli izo zose. Yonasani niyo amwigala Daudi kwa Sauli, na Daudi niyo amdamnyila ndima enga aho nk'hongo.

8 Naho akajika nokunda na nk'hondo ya Wafilisiti na Waizilaeli naho. Daudi afosaga kugenda kutowana na Wafilisiti, yehe niyo awakoma Wafilisiti wengi, wasigale niyo wanyilika. 9 Zuwa dimwenga muye aihile atumigwe ni Zumbe Mnungu amwiziila Sauli umwo andile kekala mwe nyumba yakwe akanda no mjungo mwo mkono, Daudi naye andaga akatowa kinubi.

10 Sauli nakageza kumjunga no mjungo Daudi, mna Daudi niyo awink'ha sila, mjungo wa Sauli nawo niyo wakujunga kwo lukandula. Daudi niyo anyilika. 11 Kilo iicho, Sauli nakasiigila want'hu kwe kaya ya Daudi wamkaule uneva eyaho vileke amkome nomtondo. Mna Mikali, mkaziwe Daudi niyo amgambila Daudi, "Uneva huna nyilike kilo iki luvi noukomigwe." 12 Ivo Mikali niyo amwambiza Daudi kuseela mwe dilanga, naye niyo afosa na kunyilika. 13 Mikali aguhaga hili, niyo kudigoneza mwo luzazi naho mwo mtwi we dihili idyo adi vikaga mazoya ya mbuzi niyo adigubikaga dihili ne suke. 14 Sauli eze asigiile want'hu wamgwile Daudi, Mikali awagambaga Daudi mnyonge. 15 Niyo Sauli awatuma wauye uuko naho, akawasigiila kugamba akagamba, "Mleteni Daudi kwangu hata uneva emwo lusazi vileke akomigwe." 16 Wadya want'hu weze wengile mwe nyumba ya Daudi na kusinya lusazi, nawaona mna hili na mto wa mazoya ya mbuzi mwo mtwi. 17 Sauli niyo amgamba Mikali, "Nii ukanidant'hiliza ivo na kumleka mnk'hondo ywangu aninyilike?"

Mikali naye niyo amhitula Sauli, "Yehe nakanigamba, hegu nakanikoma wandile hyamwambize vileke anyilike. "

18 Daudi eze anyilike, aitaga kwo mzi wa Lama kwa Samweli. Amgambilaga zimbuli zose adamanyilwe ni Sauli. Ivo, Daudi na Samweli nawaita kwikala Nayoti niyo inyumba ya walotezi. 19 Sauli naye niyo agambilwa kugamba Daudi nakanda mwe nyumba ya walotezi mwo mzi wa Lama. 20 Niho Sauli atumaga want'hu wakamgwiile. Mna weze wabwiile difyo dya walavant'hambiko dikalotela Samweli naye akadilongoza. Muye ywa Mnungu nouwezila wadya wegala ulosi wa Sauli, woho nao niyo wakonga kulotela uku wakavina na kubongeela. 21 Sauli eze agambilwe mbuli izo, atumaga wandima watuhu, woho nawo iviyaiviya niyo wakonga kulotela uku wakavina na kubongeela. Sauli eze atume wandima watuhu katatu, iviyaiviya nawakonga kulotela uku wakavina na kubongeela. 22 Naho akajika aitaga Lama yehe mwenye. Eze abule mwe disima dikulu dili uko Seku, auzaga kugamba, "Samweli na Daudi we hii?" Uyo mnt'hu niyo amhitula, "Weyaho Nayoti, mwo mzi wa Lama." 23 Sauli naye niyo aita uko Nayoti kwo mzi wa Lama. Eze abule uko, Muye ywa Mnungu amwiziilaga, naye niyo akonga kulotela sila yose mpaka Nayoti mwo mzi wa Lama. 24 Ahambulaga mavalo yakwe niyo alotela ha Samweli. Ekalaga kimbwigili kwa zuwa dimwenga, kilo na msi. Kwa ivo want'hu nawakonga kukeuza, "Togola, Sauli naye kanda yumwenga ywa walotezi?"