1 Niyo Daudi agambigwa, "Tegeleza, Wafilisiti wakump'hukila mzi wa Keila naho wawahoka want'hu nk'hande ihetigwe mwe viwasa va kuhetela." 2 Ivo Daudi niyo amuuza Zumbe Mnungu, "Togola, niite hawatowe Wafilisiti?" Zumbe Mnungu niyo amhitula,

"Heye, ita ukawatowe Wafilisiti na kuukombola mzi wa Keila."

3 Mna want'hu wa Daudi niyo wamgamba, "Uneva kinanda aha Yuda chogoha, neinde vivihi elo kinaita Keila na kuwatowa watowani wa Wafilisiti?" 4 Daudi niyo amlombeza naho Zumbe Mnungu, naye niyo amgamba, "Inuka wiite Keila kwaviya neniwatendeni muwahume Wafilisiti." 5 Ivo Daudi niyo aita Keila hamwenga na want'hu wakwe, naho uko niko watowanaga na Wafilisiti, na kuwakoma Wafilisiti wabindile wingi na kutaha ng'ombe zibindile wingi. Ivo Daudi awakombolaga want'hu wa Keila.

6 Abiathali mwana wa Ahimeleki, eze agulukile kwa Daudi uko Keila, aitaga ne kazibao kwo ulavant'hambiko.

7 Sauli eze agambilwe kugamba Daudi kabula kale Keila, agambaga, "Mnungu kanink'ha udahi wa kumkoma kwaviya kakekindila mwenye kwa kwingila mwo mzi una gomela dina mihindo." 8 Ivo, Sauli awetangaga watowani waite Keila na kukump'hukila, vileke wamzunguluke Daudi hamwenga na want'hu wakwe.

9 Daudi eze eve mizungu yawe iyo ihile mwa yehe, amgambaga mlavant'hambiko Abiathali, "Kalete aha ako kazibau kwo ulavant'hambiko." 10 Niyo Daudi amlombeza akagamba, "Zumbe Mnungu ywa Izilaeli kindedi miye mndima ywako, hiva kugamba Sauli eza kuubalanga mzi wa Keila kwaviya miye ni mwo mzi uno. 11 Togola wakaya wa Keila nawanink'hize kwa Sauli? Togola Sauli eza kindedi enga ivo niivile miye mndima ywako? Weye Zumbe Mnungu ywa Izilaeli, nakulombeza unihitule miye mndima ywako."

Zumbe Mnungu niyo amhitula, "Sauli neeze."

12 Daudi niyo amuuza, "Togola wakaya wa Keila nawaninink'hize kwa Sauli, miye hamwenga na want'hu wangu?"

Zumbe Mnungu niyo amhitula, "Nawakwink'hize kwa Sauli."

13 Niyo Daudi na want'hu wakwe awo wandile magana mtandatu, wahalawaga na kuita hohose wadahaga kuita. Sauli eze eve kugamba Daudi kahalawa Keila, niyo aileka mizungu yakwe yose.

14 Ivo, Daudi asigalaga kwe digomela mwe dijangwa, mwe isi ye vigulu kwe zinyika za Zifu. Sauli amzungulaga kila zuwa, mna Mnungu hamwink'hile Sauli udahi wa kumgwila Daudi. 15 Zuwa dimwenga umwo Daudi andaga hagihi na Holeshi evaga kugamba Sauli andaga akaita Zifu akamzungula vileke amkome. 16 Yonasani mwana Sauli ambasaga Daudi uko Holeshi akamgela ludole akamgamba, "Utoge, Mnungu akwamila." 17 Yonasani amgambaga, "Usekogoha, tate Sauli haakupate. Weye nounde seuta ywa Izilaeli, miye neninde ywa kaidi kwako. Hata tate Sauli kamanya mbuli ino." 18 Awo wose waidi, wadamanyaga Ndagano ha Zumbe Mnungu. Daudi niyo asigala mwo mzi wa Holeshi na Yonasani niyo aita kwe kaya yakwe.

19 Sauli akanda akei uko Gibea, want'hu wa Zifu wambasaga na kumgamba, "Daudi akefisa mwe isi yetu mwe digomela uko Holeshi, mwo mnima Hakila, wili hant'hu ha Kwa mwenye mzi ya Yeshimoni. 20 Haluse seuta, soo kwetu naswe nekidamanye vovose vileke kimgwile na kumwigala kwako."

21 Sauli niyo awahitula, "Nyuwe kindedi mwanionela mbazi na Zumbe Mnungu awavikileni. 22 Iteni naho mkamanye aho akukefisila naho niani amuone hant'hu aho, kwaviya higambilwa yehe ni mbala vitendese. 23 Sinyiseni kila hant'hu mmanye aho akefisile, niyo mwanigaila ulosi ukint'hile. Naho neniite hamwenga na nyuwe naho uneva akei mwe isi iyo, miye nenimzungule mwa maelufu ya want'hu wa Yuda."

24 Ivo, wenukaga na kuita Zifu, wakamlongoela Sauli. Mwo lupisi ulwo Daudi na want'hu wakwe wandaga mwe nyika ya Maoni, mwe dikolongo dya Alaba Kwa mwenye mzi ya Yeshimoni. 25 Sauli na want'hu wakwe wakongaga kumzungula Daudi. Mna Daudi eze agambilwe mbuli izo, agendaga kukefisa mwo luwe, niyo ekala mwe zinyika za Maoni. Sauli eze eve mbuli izo, amzungulaga Daudi mwe nyika izo. 26 Sauli na want'hu wakwe nawanda nt'hendelo ya kagulu ka luwe, Daudi naye na want'hu wakwe nawanda nt'hendelo int'huhu ya kagulu ka luwe. Umwo Daudi andaga akusunguza kunyilika na want'hu wakwe, watowani wa Sauli wandaga hagihi na kumgwila. 27 Aho mnt'hu yumwenga amwitilaga Sauli na kumgamba, "Sunguza uuye Wafilisiti waitoa isi." 28 Ivo Sauli niyo aleka kumtimila Daudi na kugenda kutoana na Wafilisiti. Nivo vilekile hant'hu aho haketangwa, Sela Hammahlekoth, nuko kugamba Luwe lwa kupangana. 29 Daudi ahalawaga hant'hu aho, na kugenda kwikala mwe mp'hanga yo mzi wa Engedi.