1 Mwezi umwenga wize womboke, Seuta Nahashi ywa Amoni awalongozaga watowani wakwe wakautowe mzi wa Yabeshi mwe isi ya Gileadi na kuutaha, want'hu wa Yabeshi wamgambaga Nahashi, "Damanya mwivano na suwe nekikuzumile kunda seuta ywetu."

2 Nahashi niyo ahitula, "Nekidamanye mwivano kwa mbuli imwenga, nenimng'ole kila yumwenga ywenyu ziso dya kulume, naivo neniwagele soni Waizilaeli wose mwe ziisi zint'huhu."

3 Vilongozi wa Yabeshi niyo wamgamba, "Kink'he mazuwa mfungate kitume wegala ulosi mwe isi yose ya Izilaeli, uneva hakuna yeyose naakiyokole, nekikehonye kwako."

4 Wadya wegala ulosi weze wabule Gibea niyo walonga imbuli iyo kwa want'hu, wose wailaga kwa izwi kulu. 5 Aaho Sauli niyo eza akalawa kwo mgunda akanda ne zing'ombe zakwe, niyo auza, "Kuna kibwani kikuwatenda want'hu waile?" Niyo wamgambila kiya walongile wegala ulosi kulawa Yabeshi. 6 Sauli eze eve ivo Muye ywa Mnungu amwiziilaga, niyo anda na maya, 7 niyo aguha majeku maidi na kukant'hakant'ha, awatumaga wegala ulosi wegale vihendo ivo mwe isi yose ya Izilaeli wakagamba, "Uneva mnt'hu yeyose hanaitile kwe nk'hondo na Sauli na Samweli njeku zakwe nezisengwesengwe!"

Zumbe niyo awatenda want'hu wose wa Izilaeli wogohe kwa kiya Sauli naakaunga awatendele na wose wahalawaga kwa hamwenga.

8 Sauli niyo aduganya wose uko Bezeki, wandaga ni want'hu magana matatu alufu kulawa Izilaeli na alufu milongo mitatu kulawa Yuda. 9 Niyo wawagamba kulawa Yabeshi, "Wagambile want'hu wa Yabeshi Giliedi kugamba luvi nomsi nomnde wayokolwa." Umwo want'hu wa Yabeshi weze weve ulosi uwo wandaga na kinyemi, 10 niyo want'hu wa Yabeshi wawabela wank'hondo wawe awo want'hu wa seuta Nahashi wakawagamba, "Luvi nekikehonye kwenyu, naho mwadaha kukitendela chochose kiya mkuunga."

11 Kilokilo zuwa ditimile, Sauli awapangaga want'hu wakwe mwe vifyo vitatu, waikunp'hukilaga ink'hambi ya wank'hondo awo Waamoni niyo wawatowa. Kubula nomsi Waamoni nawanda wachinjigwa. Wadya wasigale wasambalaga kila yumwenga akegulukilaga mwenye.

12 Want'hu wa Izilaeli niyo wamgamba Samweli, "Wekuhi wadya want'hu wagambile Sauli hakudaha kunda seuta ywetu, wenk'hizwe kwetu vileke suwe kiwakome."

13 Mna Sauli niyo agamba, "Hahali yeyose naakomwe dyelo kwaviya zuwa idi dya dyelo Zumbe Mnungu kaiyokola Izilaeli."

14 Samweli niyo awagamba, "Nekiteni chose uko Giligali kikazumilane uhya kugamba Sauli agendeele kunda seuta ywetu" 15 Ivo wose waitaga Giligali, niyo aho ha Zumbe wamzumilaga Sauli kunda seuta. Walavaga malavo yawe ya utondowazi, niyo Sauli na want'hu wose wa Izilaeli wanda na kinyemi kikulu.