1 Boazi niyo aita hant'hu hadya ho kudamanyila mdugano ho mnango ho mzi niyo ekala hasi. Yudya ndugu dya Elimeleki yudya alongigwe ni Boazi, ombokaga hagihi. Boazi niyo amwitanga, niyo agamba, "Soo wikale aha." Yudya mnt'hu ezaga na kwikala hadya. 2 Niyo Boazi awetanga wadala mlongo wo mzi, niyo awagamba wekale. Wadya wadala niyo wekala. 3 Boazi niyo amgamba yudya nduguye mto kwaga, "Haluse Naomi kauya kulawa mwe isi ya Moabu, aunga aitage nk'honde idya yandile ya ndugu yetu Elimeleki. 4 Ivo waungigwa umanye mwe mbuli ino. Haluse inanda waiunga nk'honde ino, ugule hameso ya wadala na want'hu wangu, unanda waiunga longa hegu hukuiunga longa, kwaviya weye una lupwapwazi lwa nk'hongo miye name ni ywa kaidi. Akuunga aikombole ni weye." Naye niyo agamba, "Nenikombole miye."

5 Boazi niyo agamba, "Ni vedi mna unagula ink'honde iyo kulawa kwa Naomi Mmoabu, waungigwa umlombe Luti uyo abanikilwe ni mgosiwe vileke nk'honde iyo isigale mwa wandugu wa uyo mtokwaga."

6 Yudya ndugu niyo amhitula, "Inanda niivo miye hikudaha kuikombola nk'honde iyo, kwaviya kugamba neniubanange ukipe wa wanangu. Uneva niivo guha lupwapwazi lwangu lwa kukombola weye kwaviya miye hikudaha kuikombola."

7 Mazuwa yadya kwandaga na kihendo mwe Izilaeli, uneva mnt'hu aungaga kukombola hegu kwink'hana kint'hu, mnt'hu uyo aungwagwa alagise kwa kuhambula makwapa yakwe na kumwink'ha miyawe. Kwa kudamanya ivo Waizilaeli walagisaga kugamba mbuli zikala vedi.

8 Ivo, mnt'hu uyo niyo amgamba Boazi, "Ikombole weye ink'honde iyo," Niyo ahambula kwapa dyakwe na kumwink'ha Boazi. 9 Niho Boazi awagambaga wadala na want'hu wose wandile aho "Dyelo nyuwe nomnde waona wangu. Muwona kugamba higula nk'honde kulawa kwa Naomi na vose vandile va Elimeleki na Kilioni na Maholoni. 10 Naho yudya Luti Mmoabu abanikilwe ni mgosiwe Maholoni, himgula vileke ande mkazangu. Hidamanya ivo vileke ugoli wo uyo mtokwaga no lukolo wakwe usigale kwa want'hu wakwe mwo mzi uno. Naho nyuwe mwi waona."

11 Ivo wadya wadala wandile hadya na want'hu wose niyo wamhitula, "Heye, suwe ni waona. Mnungu amtende mkazio ande enga Laheli na Lea awo wamwelekele Yakobo wana wengi. Nawe ukule mwo ugoli mwo lukolo lwa Efulata umanyike uko Beselehemu. 12 Zumbe akwink'he wana wengi kwombokela uyo mvele, mp'huga yako inde enga mp'huga ya Pelesi uyo Tamali amwelekaga Yuda."

13 Kwa ivo Boazi niyo amlomba Luti na kunda mkaziwe. Zumbe amvikilaga Luti niyo enula ubovu, niyo engila nyumba mwana kigosi. 14 Niyo wavele wo mzi uwo wamgambaga Naomi, "Mtogole Zumbe uyo heekudaha kukuleka dyelo haheina ndugu ywa kukulela, naho yehe ande mta nt'hogola nk'hulu mwe Izilaeli. 15 Mwana uyo naautende naho wikazi wako kunda uhya na kukulela mwo udala wako, kwaviya nyokwe vyala akukuunga kadamanya vedi kujink'ha wana kigosi mfungate kwaviya kamwink'ha cheleko." 16 Ivo Naomi amguhaga mwana uyo na kunda mlezi ywake mazuwa yose.

17 Wadya wavele wandile hagihi wamwitangaga mwana uyo zina dyakwe niye Obedi niyo wagamba, "Mwana kelekwa kwa Naomi."

Naho Obedi amwelekaga Yese uyo amweleke Daudi.

18 Ivi nivo vyeleko va Pelesi, Pelesi amwelekaga Heziloni, 19 Heziloni amwelekaga Lami, Lami amweleka Aminadabu, 20 Aminadabu amwelekaga Nashoni na Nashoni amwelekaga Salimoni, 21 Salimoni amwelekaga Boazi, Boazi amweleka Obedi, 22 Obedi amweleka Yese, Yese naye niyo amweleka Daudi.