1 Aho kale Walamuzi wandaga wakalongoza mwe isi ya Izilaeli, halailaga gumbo mwe isi. Mnt'hu yumwenga kulawa Betelehemu ya Yuda yehe hamwenga na mkaziwe na wana wawe waidi wagendaga kwikala mwe isi ya Moabu enga watakwiza. 2 Mnt'hu uyo etangagwa Elimeleki mkaziwe naye etangwagwa Naomi nuko kugamba kinyemi, wana wawe waidi we kigosi Maholoni na Kilioni. Mnt'hu uyo hamwenga na nduguye wandaga wa kabila dya Efulaimu uko Betelehemu ya Yuda. Wandaga mwe isi ya Moabu, wakekala uko. 3 Mna Elimeleki mgosiwe Naomi abanikaga niyo Naomi asigala ekedu na wanawe waidi. 4 Wabwanga wadya niyo walomba wandele wa Kimoabu, wandele awo wandaga ni Olipa na Luti. Ize ijink'he miyaka mlongo, 5 wose waidi Maholoni na Kilioni nawo niyo wabanika. Ivo Naomi asigalaga heiina hata mwana hegu mnume.

6 Naomi eze eve kugamba Zumbe kawavikila want'hu wa kwe isi yakwe kwa kuwenk'ha nk'hande, wakeikaga lumwe kulawa mwe isi ya Moabu kuuya kwawe, yehe hamwenga na wakaza wanawe. 7 Ivo wahalawaga hant'hu hadya wekalaga hamwenga na wakaza wanawe niyo wakonga kuuya mwe isi ya Yuda. 8 Naomi niyo awagamba wakaza wanawe waidi, "Uyeni kwenyu kwa wamami zenyu. Zumbe awenk'heni uwedi enga viya mwanitendelaga miye na walume zenyu wabanike. 9 Zumbe Mnungu awatendeni kila yumwenga ywenyu ande na kinyemi mwe kaya ya mnumewe."

Naomi niyo awakumbatila mna woho wakongaga kuila kwa usungu, 10 niyo wamgamba, "Bule! haikudaika, nekiite hamwenga na weye kwa want'hu wako."

11 Naomi niyo awagamba, "Bule, wanangu mwaungwa kuuya kwenyu. Nii mwanibasa miye? Haluse mwagamba neneleke wana we kigosi watuhu vileke wamilombeni? 12 Uyeni kaya wanangu, kwaviya miye hidalahala hikudaha kulombigwa naho. Hata uneva nadaha kulombigwa kilo iki na kweleka wana we kigosi, 13 haluse mwadaha kwikala haheina kulombigwa mpaka awa wakule? Bule! Mbuli ino kwangu ni ndala vidala kujink'ha nyuwe, kwaviya Zumbe niye anitendile ninde na makut'ho."

14 Woho niyo wakonga kuila naho. Niyo Olipa amkumbatila nine vyala na amlaga niyo kuuya kaya mna Luti niyo amtozeleza na kunda hamwenga na nine vyala. 15 Naomi niyo amgamba, "Luti, kaula miyao kauya kwa want'hu wakwe na kwe milungu yakwe, kwa ivo waungigwa uuye hamwenga naye."

16 Mna Luti niyo amhitula,

"Usekunihembeleza huleke weye,

naho usekunifingiza kukutimila.

Kokose nowiite name neniite,

na uko nowikale nekikalanye,

want'hu wako nawande want'hu wangu,

Mnungu ywako naye naande Mnungu ywangu.

17 Aho nobanikile name nenibanikile aho,

na aho ukumoselwa msanga naho nenimoselwe msanga name,

Zumbe Mnungu anisulumize nnakepanga na weye

mna ifile du niyo neikipange miye na weye."

18 Naomi eze aone kugamba Luti atigiza waitanye naye hagendeele kuhigana naye naho. 19 Niyo wose waidi wakonga nt'hambo mpaka Betelehemu. Weze wabule uko want'hu wose niyo wehelwa, wavele niyo wauzana, "Uyu ni Naomi kindedi?"

20 Naomi niyo agamba, "Msekunitanga naho Nahomi, nitangeni Mala, nuko kugamba usungu, kwaviya Mnungu mta ludole kautenda wikazi wangu unde na usungu vidala. 21 Umwo nahalawaga aha nehinda na vint'hu vingi, mna ivi haluse Zumbe kanivuza hiina hata kint'hu. Haluse nii mwanitanga Naomi, ikanda Zumbe kanitowa na kunisulumiza?"

22 Ivo nivo Naomi hamwenga na mka mwanawe Luti Mmoabu wauiye kulawa Moabu na kubula Beselehemu mwo lupisi ludya wakonga kuvuna shaili.